ວັນທີ 01 ພຶດສະພາ 2024, ທ່ານ ແກ້ວວິໄລ ໄຊຍະບຸດ ເຈົ້າເມືອງຄູນຄໍາ ແຂວງຄຳມ່ວນ, ທ່ານ ນາງ ຍົມມະລາ ເດດສັກດາ ປະທານແນວສ້າງຊາດເມືອງ ແລະ ພາກສ່ວນທີ່ກ່ຽວຂ້ອງ ໄດ້ນຳເອົາເຄື່ອງບັນເທົາທຸກຂັ້ນເບື້ອງຕົ້ນ ມອບໃຫ້ 3 ຄອບຄົວ ຢູ່ 3 ບ້ານ ທີ່ຮັບຜົນກະທົບຈາກອັກຄີໄພ ໄຟໄໝ້ເຮືອນ ລວມມູນຄ່າ ທັງໝົດ 34.530.000 ກີບ ໃນນີ້, ມີເງິນສົດ ຄອບຄົວລະ 10 ລ້ານກີບ ແລະ ເຄື່ອງໃຊ້ໃນຄົວເຮືອນເປັນຕົ້ນ ຜ້າຫົ່ມ, ໝອນ, ເສື່ອ, ສາດ ແລະ ເຄື່ອງນຸ່ງຫົ່ມຈຳນວນໜຶ່ງ ມູນຄ່າ 4,5 ລ້ານກີບ.
ຜູ້ຕາງໜ້າຈາກ ຫ້ອງການສະຫວັດດີການ ແລະ ສັງຄົມ ລາຍງານວ່າ: ໃນທ້າຍເດືອນ ເມສາ 2024 ຜ່ານມາ ໄດ້ເກີດມີອັກຄີໄພ (ໄຟໄໝ້ເຮືອນ) ປະຊາຊົນ 3 ບ້ານ ຂອງເມືອງຄູນຄໍາ ແຂວງຄຳມ່ວນ 3 ຄອບຄົວຄື: ຄອບຄົວ ທ້າວ ເອ ບ້ານຄູນມະນີ, ຄອບຄົວແມ່ເຖົ້າ ຈັນມາ ບ້ານແກ້ງ ແລະ ຄອບຄົວພໍ່ເຖົ້າແຫລ້ ບ້ານອໍ້, ໄຟໄໝ້ຄັ້ງນີ້ ເກີດຈາກໄຟໃນເຕົາດັງໄຟທີ່ມອດບໍ່ໝົດ ເນື່ອງຈາກຂາດຄວາມເອົາໃສ່ ທາງດ້ານການຮັກສາຄວາມປອດໄພ ບໍ່ໄດ້ດີເທົ່າທີ່ຄວນ, ເຊິ່ງໄດ້ເຮັດໃຫ້ເກີດຜົນເສຍຫາຍເປັນຈຳນວນຫລາຍ ໂດຍທັງສາມຄອບຄົວໄດ້ຖືກໄຟໄໝ້ເຮືອນຈົນໝົດ ພາຍໃນເຮືອນ ປະກອບມີເຄື່ອງໃຊ້ໃນຄົວເຮືອນຄື: ຕູ້ເຢັນ, ຕູ້ຊັກເຄື່ອງ, ລົດໄຖນາເດີນຕາມ, ເຂົ້າກິນ ແລະ ເຄື່ອງໃຊ້ສອຍອື່ນໆ ຄິດເປັນມູນຄ່າເສຍຫາຍໝົດ 271.035.000 ກີບ.
ຂ່າວ-ພາບ: ລັດສະໝີ ຈູມໂພຄໍາ
