ໃນວັນທີ 31 ກໍລະກົດ 2024 ນີ້, ທ່ານ ບຸນເລື່ອມ ມະນີວົງ ຮອງເຈົ້າແຂວງໆຫລວງພະບາງ ພ້ອມດ້ວຍ ຄະນະກໍາມະການຄຸ້ມຄອງ ໄພພິບັດຂັ້ນແຂວງ ເຄື່ອນໄຫວຢ້ຽມຢາມ ແລະ ມອບເຄື່ອງຊ່ວຍເຫລືອເພື່ອບັນເທົາທຸກໃນເບື້ອງຕົ້ນ ໃຫ້ປະຊາຊົນ 7 ບ້ານ ຢູ່ເມືອງປາກແຊງ ຄື: ບ້ານຫາດຈາງ, ໜອງ, ຫາດພວນ, ສົບວັດ, ໂພ, ຫາດຫວານ ແລະ ບ້ານທ່າທຽນ ທີ່ໄດ້ຮັບຜົນກະທົບຈາກໄພພິພັດນ້ຳຖ້ວມ ໃນລະຫວ່າງວັນທີ 24-25 ກໍລະກົດ ຜ່ານມາ.
ໂອກາດນີ້, ທ່ານ ບຸນເລື່ອມ ມະນີວົງ ໄດ້ຕາງໜ້າໃຫ້ການນຳແຂວງ ສະແດງຄວາມເປັນຫ່ວງຕໍ່ກັບຊີວິດການເປັນຢູ່, ການດຳລົງຊີວິດຂອງປະຊາຊົນ ທັງໄດ້ຮຽກຮ້ອງໃຫ້ການນຳເມືອງ, ອົງການປົກຄອງບ້ານ ແລະ ທຸກພາກສ່ວນ ຕ້ອງເພີ່ມທະວີຄວາມສາມັກຄີ, ຊ່ວຍເຫລືອເຊິ່ງກັນ ແລະ ກັນ ພ້ອມກັນສູ້ຊົນຜ່ານພົ້ນວິກິດໃນຄັ້ງໄປດ້ວຍດີ, ປັບປຸງຊີວິດການເປັນຢູ່ ໃຫ້ກັບຄືນສູ່ສະພາບປົກກະຕິໂດຍໄວ ຕິດພັນກັບການປ້ອງກັນພະຍາດລະບາດທີ່ອາດຈະເກີດຂຶ້ນ.
ສຳລັບສະພາບຜົນກະທົບ ຈາກໄພພິບັດນ້ຳຖ້ວມທີ່ເກີດຂຶ້ນ ໃນ 7 ບ້ານ ໄດ້ສັງລວມຂໍ້ມູນໃນເບື້ອງຕົ້ນ ຄື: ບ້ານໜອງ ມີ 50 ຄອບຄົວ, ບ້ານຫາດຈາງ ມີ 15 ຄອບຄົວ, ບ້ານ ຫາດພວນ 17 ຄອບຄົວ, ບ້ານ ສົບວັດ 7 ຄອບຄົວ, ບ້ານ ໂພ 7 ຄອບຄົວ, ບ້ານຫາດຫວານ 7 ຄອບຄົວ, ບ້ານທ່າທຽນ 9 ຄອບຄົວ, ໃນນັ້ນຖືກຜົນກະທົບໜັກ ມີ 05 ບ້ານ, ມີ 96 ຄອບຄົວ ໂດຍມີເຮືອນທີ່ຖືກນໍ້າໄຫລຊຸ 06 ຫລັງ, ເຮືອນເປ່ເພ ເສຍຫາຍໜັກ ທີ່ບໍ່ສາມາດຢູ່ໄດ້ 14 ຫລັງ, ເຮືອນທີ່ຖືກນໍ້າຖ້ວມທໍາມະດາ 76 ຫລັງ. ນອກຈາກ ນີ້ ຍັງມີສັດລ້ຽງເສຍຫາຍຫລາຍຮ້ອຍໂຕ ລວມມູນຄ່າເສຍຫາຍທັງໝົດ 1,95 ຕື້ກວ່າກີບ. ປັດຈຸບັນ ເສັ້ນທາງລະຫວ່າງ ເມືອງປາກແຊງ ຫາ ເມືອງວຽງຄໍາ ຍັງສັນຈອນໄປມາບໍ່ໄດ້ ຊຶ່ງການນຳເມືອງພວມເລັ່ງແກ້ໄຂ.
ເຄື່ອງທີ່ນຳມາຊ່ວຍເຫລືອຄັ້ງນີ້ ປະກອບມີ: ເງິນສົດ 30 ລ້ານກີບ, ນໍ້າດື່ມ, ເຄື່ອງນຸ່ງຫົ່ມ, ເຄື່ອງອຸປະໂພກ-ບໍລິໂພກ ລວມມູນຄ່າ 25 ລ້ານກີບ, ພ້ອມນີ້ ພະແນກ ໂຍທາທິການ ແລະ ຂົນສົ່ງ ໄດ້ມອບປະເພດ ໝີ່ເຄິ່ງສຳເລັດຮູບ, ນ້ຳດື່ມ ລວມມູນຄ່າ 2 ລ້ານກີບ ໃຫ້ການນຳເມືອງປາກແຊງ ເພື່ອນຳໃຫ້ໄປແຈກຍາຍຕໍ່ໃຫ້ປະຊາຊົນ ທີ່ຖືກຜົນກະທົບຈາກໄພນ້ຳຖ້ວມ ເພື່ອແກ້ໄຂບັນເທົາທຸກໃນເບື້ອງຕົ້ນຕື່ມອີກ.
ຂ່າວ-ພາບ: ທະນູສີນ ອິດທິພົນ
