ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ 31 ກໍລະກົດ 2023, ທີ່ ກະຊວງການຕ່າງປະເທດ, ສະຫາຍ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມອໍາລາຂອງ ສະຫາຍ ຈ່ຽງ ຈ້າຍຕົ່ງ, ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສປ ຈີນ ປະຈໍາ ສປປ ລາວ, ໃນໂອກາດທີ່ໄດ້ສໍາເລັດການປະຕິບັດໜ້າທີ່ການທູດ ຕະຫຼອດໄລຍະ 4 ປີກວ່າ ຢູ່ ສປປ ລາວ. ຕໍ່ຈາກນັ້ນ, ສະຫາຍ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ຕາງໜ້າໃຫ້ລັດຖະບານ ແຫ່ງ ສປປ ລາວ ປະດັບຫຼຽນໄຊມິດຕະພາບ ໃຫ້ແກ່ ສະຫາຍ ເອກອັກຄະລັດຖະທູດ ຈ່ຽງ ຈ້າຍຕົ່ງ ເພື່ອເປັນການຍ້ອງຍໍຊົມເຊີຍ, ສັນສະເສີນ ແລະ ຈາລຶກຄຸນງາມຄວາມດີ ຕໍ່ຜົນງານໃນການປະກອບສ່ວນເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການພົວພັນຮ່ວມມືແບບຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາ ລາວ-ຈີນ ຈີນ-ລາວ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ໃຫ້ແຕກດອກອອກຜົນຢ່າງຕໍ່ເນື່ອງ.
ໃນໂອກາດນີ້, ສະຫາຍ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການເຄື່ອນໄຫວວຽກງານຢ່າງຫ້າວຫັນຂອງ ສະຫາຍ ເອກອັກຄະລັດຖະທູດ ທີ່ໄດ້ຊຸກຍູ້ການພົວພັນ ແລະ ການຮ່ວມມື ລະຫວ່າງ ສອງປະເທດໃນຫຼາຍດ້ານ ເປັນຕົ້ນແມ່ນ ການປະກອບສ່ວນໃຫ້ແກ່ການລົງນາມ “ແຜນແມ່ບົດການສ້າງຄູ່ຮ່ວມຊາຕາກໍາ ລາວ-ຈີນ ຈີນ-ລາວ”; ຊຸກຍູ້ ແລະ ອໍານວຍຄວາມສະດວກ ໃຫ້ແກ່ການເດີນທາງຢ້ຽມຢາມ, ເຂົ້າຮ່ວມກອງປະຊຸມ ແລະ ສໍາມະນາ ທັງໃນຂອບສອງຝ່າຍ ແລະ ຫຼາຍຝ່າຍ ຂອງການນໍາຂັ້ນສູງຂອງສອງປະເທດ ຈາກສູນກາງ ແລະ ທ້ອງຖິ່ນ ຢ່າງເປັນປົກກະ ຕິ; ຊຸກຍູ້ ແລະ ຈັດຕັ້ງປະຕິບັດໂຄງການກໍ່ສ້າງ “ໜຶ່ງແລວ ໜຶ່ງເສັ້ນທາງ”, ເຊິ່ງພົ້ນເດັ່ນທີ່ສຸດກໍ່ແມ່ນໂຄງການທາງລົດໄຟ ລາວ-ຈີນ ຊຶ່ງເປັນໂຄງການໃຫຍທີ່ສຳຄັນ ແລະ ມີລັກຊະນະປະຫວັດສາດຂອງການຮ່ວມມື ລາວ-ຈີນ ລວມທັງໂຄງການກໍ່ ສ້າງທາງດ່ວນ ວຽງຈັນ-ວັງວຽງ, ໂຄງການກໍ່ສ້າງເຂດພັດທະນາກວມລວມໄຊເສດຖາ, ໂຄງການກໍ່ສ້າງໂຮງໝໍມະໂຫສົດ, ໂຄງການກໍ່ສ້າງເຂດພັດທະນາບຶງທາດຫຼວງ, 8 ໂຄງການໃຫຍ່ ທີ່ລັດຖະບານ ສປ ຈີນ ໄດ້ປະກາດໃຫ້ການຊ່ວຍເຫຼືອ ສປປ ລາວ ເປັນຕົ້ນໂຄງການບ້ານຈັດສັນ 100 x 100, ໂຄງການເຂດເສດຖະກິດ ບໍ່ເຕັນ-ບໍ່ຫານ, ໂຄງການຮ່ວມມືດ້ານພະລັງງານ ແລະ ບໍ່ແຮ່, ການສົ່ງອອກສິນຄ້າກະສິກໍາຈາກລາວໄປຈີນ ໃນນັ້ນລວມທັງການສົ່ງອອກງົວຄາຍຈາກລາວໄປຈີນ, ນອກນັ້ນຍັງໄດ້ປະກອບສ່ວນສຳຄັນໃນການຊູກຍູ້ນັກທ່ອງທ່ຽວຈີນໃຫ້ເຂົ້າມາທ່ຽວຢູ່ລາວບັນລຸ 1 ລ້ານເທື່ອຄົນໃນປິ 2019 ແລະ ໂຄງການອື່ນໆ ທີ່ພົ້ນເດັ່ນອີກຫຼາຍໂຄງການ, ເຊິ່ງທັງໝົດນີ້ ໄດ້ນໍາເອົາຜົນປະໂຫຍດສູງສຸດມາສູ່ປະຊາຊົນລາວ ກໍ່ຄື ໄດ້ປະກອບສ່ວນອັນໃຫຍ່ຫຼວງເຂົ້າໃນການຮັດແໜ້ນສາຍພົວພັນ ແລະ ການຮ່ວມມື ລະຫວ່າງສອງປະເທດ ລາວ-ຈີນ ຈີນ-ລາວ ໃຫ້ເຂົ້າສູ່ລວງເລິກ. ພ້ອມກັນນັ້ນ, ສະຫາຍ ຈ່ຽງ ຈ້າຍຕົ່ງ ໄດ້ເປັນຂົວຕໍ່ທີ່ສຳຄັນ ແລະ ຊຸກຍູ້ການຮ່ວມມືຂອງສອງປະເທດທາງດ້ານການຄ້າ, ການລົງທຶນ, ການສຶກສາ, ສາທາ ລະນະສຸກ, ການທ່ອງທ່ຽວ, ວັດທະນະທໍາ ແລະ ຂົງເຂດອື່ນໆ ນັບແຕ່ຂັ້ນສູນກາງລົງຮອດທ້ອງຖິ່ນ. ນອກຈາກນັ້ນ, ໃນໄລຍະການເກີດສະພາບການແຜ່ລະບາດຂອງເຊື້ອພະຍາດໂຄວິດ-19, ສະຫາຍ ເອກອັກຄະລັດຖະທູດ ຍັງໄດ້ຊຸກຍູ້ການຊ່ວຍ ເຫຼືອອັນລໍ້າຄ່າ ໃຫ້ແກ່ ສປປ ລາວ ໃນການຕໍ່ຕ້ານການລະບາດຂອງພະຍາດໂຄວິດ-19, ເຊິ່ງໄດ້ຊຸກຍູ້ ແລະ ປະສານກັບຝ່າຍຈີນ ໃນການສົ່ງທີມແພດຊ່ຽວຊານມາຊ່ວຍ ສປປ ລາວ ໃນໄລຍະທໍາອິດ ພ້ອມທັງໄດ້ສະໜອງວັກຊີນ ຈໍານວນ 8,9 ລ້ານໂດສ, ໜ້າກາກອະນາໄມ, ອຸປະກອນການແພດ ແລະ ການຊ່ວຍເຫຼືອດ້ານອື່ນໆ ທີ່ຈໍາເປັນ ເປັນຈໍານວນຫຼວງຫຼາຍ.
ສະຫາຍ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ຕາງໜ້າໃຫ້ພັກ, ລັດຖະບານ ແລະ ປະຊາຊົນລາວບັນດາເຜົ່າ ສະແດງຄວາມຮູ້ບຸນຄຸນຢ່າງເລິກເຊິ່ງ ໄປຍັງພັກ, ລັດຖະບານ ແລະ ປະຊາຊົນຈີນອ້າຍນ້ອງ ໂດຍສະເພາະແມ່ນ ສະຫາຍ ເອກອັກຄະລັດຖະທູດ ແລະ ພະນັກງານສະຖານທູດທຸກຄົນ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອອັນລໍ້າຄ່າແກ່ພັກ, ລັດຖະບານ ແລະ ປະຊາຊົນລາວ ໃນດ້ານຕ່າງໆ ຕະຫຼອດໄລຍະຜ່ານມາ ລວມທັງການຕ້ານ ແລະ ຄວບຄຸມການແຜ່ລະບາດຂອງພະຍາດ ໂຄວິດ-19 ກໍ່ຄື ການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ ຢູ່ ສປປ ລາວ ໃນປັດຈຸບັນ.
ສະຫາຍ ເອກອັກຄະລັດຖະທູດ ກໍ່ໄດ້ສະແດງຄວາມຂອບໃຈເປັນຢ່າງສູງຕໍ່ພັກ, ລັດຖະບານ ແລະ ປະຊາຊົນລາວ ໂດຍສະເພາະແມ່ນກະຊວງການຕ່າງປະເທດ ທີ່ໄດ້ໃຫ້ການຮ່ວມມື, ສະໜັບສະໜູນ, ຊ່ວຍເຫຼືອ ແລະ ອໍານວຍຄວາມສະດວກເປັນຢ່າງດີ ໃນຕະຫຼອດໄລຍະການປະຕິບັດໜ້າທີ່ການທູດ ຢູ່ ສປປ ລາວ ຈົນໄດ້ຮັບຜົນສໍາເລັດຢ່າງຈົບງາມ, ພ້ອມທັງໄດ້ສະແດງຄວາມປິຕິຍິນດີ ແລະ ຂອບໃຈຕໍ່ລັດຖະບານ ແຫ່ງ ສປປ ລາວ ທີ່ໄດ້ໃຫ້ການຍ້ອງຍໍຊົມເຊີຍຜົນງານ ແລະ ປະດັບຫຼຽນໄຊມີດຕະພາບ ອັນມີຄວາມໝາຍສໍາຄັນ ໃຫ້ແກ່ຕົນໃນຄັ້ງນີ້, ເຊິ່ງຈະເປັນສັນຍາລັກອັນມີຄວາມໝາຍຄວາມສໍາຄັນ ຕໍ່ການປະກອບສ່ວນຊຸກຍູ້ສົ່ງເສີມສາຍພົວພັນມິດຕະພາບອັນເປັນມູນເຊື້ອ, ການຮ່ວມມືແບບຄູ່ຮ່ວມມືຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກໍາ ລາວ-ຈີນ ຈີນ-ລາວ ໃຫ້ຈະເລີນງອກງາມຍິ່ງໆຂຶ້ນ. ພ້ອມທັງໄດ້ສະແດງຄວາມໝາຍໝັ້ນວ່າ ພາຍຫຼັງກັບຄືນປະເທດແລ້ວ ກໍ່ຍັງຈະສືບຕໍ່ປະກອບສ່ວນເຂົ້າໃນການສົ່ງເສີມການພົວພັນຮ່ວມມື ທີ່ເປັນມູນເຊື້ອອັນດີ ລະຫວ່າງ ສອງປະເທດ ລາວ-ຈີນ ໃຫ້ພັດທະນາ ແລະ ຂະຫຍາຍຕົວຍິ່ງໆຂຶ້ນ, ເຊິ່ງສະຫາຍ ເອກອັກຄະລັດຖະທູດ ໄດ້ມີຄວາມຊົງຈໍາທີ່ດີຫຼາຍດ້ານຕໍ່ລາວ ແລະ ທັງຈະສືບຕໍ່ໂຄສະນາສິ່ງທີ່ດີງາມຂອງ ສປປ ລາວ ຕໍ່ ສປ ຈີນ ກໍ່ຄື ຕໍ່ສາກົນ.
ຂ່າວ;ພາບ: ກົມການຂ່າວ, ກະຊວງການຕ່າງປະເທດ