ວັນທີ 25 ຕຸລາ 2022 ທ່ານ ໂຈຄຸນ ປະທານກຸ່ມບໍລິສັດໄຮ້ເຊິງ ຈຳກັດ ຜູ້ພັດທະນາເຂດເສດຖະກິດບໍ່ເຕ່ນແດນງາມ ພ້ອມດ້ວຍຄະນະ ໄດ້ນໍາເອົາເງິນຈຳນວນ 500 ລ້ານກີບ ມາມອບໃຫ້ແຂວງຫລວງນໍ້າທາ ຢູ່ທີ່ຫ້ອງຮັບແຂກຂອງ ທ່ານເຈົ້າແຂວງ ໃຫ້ກຽດຮັບໂດຍທ່ານ ຄຳໄຫລ ສີປະເສີດ ເຈົ້າແຂວງໆຫລວງນໍ້າທາມີຜູ້ຕາງຫນ້າຂະແໜງການທີ່ກ່ຽວຂ້ອງຂອງແຂວງເຂົ້າຮ່ວມເປັນສັກຂີພິຍານ.
ທ່ານ ຄໍາໄຫຼ ສີປະເສີດ ເຈົ້າແຂວງໆຫຼວງນໍ້າທາ ກໍ່ໄດ້ໃຫ້ຮູ້ກ່ຽວກັບສະພາບ ການພັດທະນາຂອງແຂວງ ໂດຍສັງເຂບ ເຖີງແມ່ນວ່າພື້ນຖານໂຄງລ່າງຂອງແຂວງ ມີການພັດທະນາຫລາຍດ້ານກໍ່ຕາມ ແຂວງຫລວງນໍ້າທາຍັງປະສົບກັບສີ່ງທ້າທາຍຫລາຍປະການອັນເນື່ອງມາຈາກການລະບາດຂອງພະຍາດໂຄວິດ – 19, ໄພພິບັດທາງທຳມະຊາດ ແລະ ທາງສັງຄົມ ເປັນຕົ້ນແມ່ນໃນລະຫວ່າງກາງເດືອນສິງຫາຜ່ານມາ ໄດ້ມີຝົນຕົກຕິດຕໍ່ກັນຫລາຍວັນເຮັດໃຫ້ແມ່ນໍ້າຫລາຍສາຍ ໄຫລຖ້ວມບ້ານ, ພື້ນທີ່ທຳການຜະລິດຂອງປະຊາຊົນ ແລະ ເຊາະເຈື່ອນເສັ້ນ ທາງ, ຂົວທາງໄປເມືອງນາແລ,ເມືອງສິງ ແລະ ເມືອງລອງ ໄດ້ເຮັດໃຫ້ການສັນ ຈອນໄປມາພົບກັບຄວາມຫຍຸ້ງຍາກ ທ່ານ ໂຈຄຸນ ປະທານກຸ່ມບໍລິສັດໄຮ້ເຊິງ ຈຳ
ກັດຜູ້ພັດທະນາເຂດເສດຖະກິດບໍ່ເຕ່ນແດນງາມ ໄດ້ລາຍງານຫຍໍ້ກ່ຽວກັບການພັດທະນາເຂດເສດຖະກິດບໍ່ເຕ່ນແດນງາມ ແລະ ເຫັນໄດ້ຄວາມສໍາຄັນໃນການປະກອບສ່ວນເຂົ້າໃນການພັດທະນາພື້ນຖານໂຄງລ່າງເວົ້າລວມເວົ້າສະເພາະແມ່ນການປັບປຸງ,ສ້ອມແປງເສັ້ນທາງລະຫວ່າງແຂວງຫາເມືອງ ເພື່ອເຮັດໃຫ້ການສັນຈອນ, ຂົນສົ່ງສີນຄ້າທັງພາຍໃນ ແລະ ຕ່າງປະເທດໄປມາໃຫ້ມີຄວາມສະດວກຂື້ນກວ່າເກົ່າ.
ໂອກາດນີ້ ທ່ານ ຄໍາໄຫຼ ສີປະເສີດ ເຈົ້າແຂວງໆຫຼວງນໍ້າທາ ໄດ້ສະແດງຄວາມຂອບໃຈ ທີ່ປະທານກຸ່ມບໍລິສັດໄຮ້ເຊິງຈຳກັດຜູ້ພັດທະນາເຂດເສດຖະກິດບໍ່ເຕ່ນແດນງາມ ພ້ອມດ້ວຍຄະນະ ເຫັນໄດ້ຄວາມສໍາຄັນ ນໍາເອົາເງີນຈໍານວນດັ່ງກ່າວມາມອບໃຫ້ແຂວງຫຼວງນໍ້າທາໃນຄັ້ງນີ້ ແລະ ຈະນໍາໃຊ້ເຂົ້າໃນການພັດທະນາໃຫ້ເກີດຜົນປະໂຫຍດສູງສຸດ.
ຂ່າວ: ມຸນຕີ
