ທ້າຍອາທິດຜ່ານມານີ້ ທ່ານ ນາງ ອາລີ ວົງໜໍ່ບຸນທຳ ປະທານຄະນະບໍລິຫານງານສູນກາງສະຫະພັນກຳມະບານລາວ ພ້ອມຄະນະໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງໂຂງ ແຂວງຈຳປາສັກ ເພື່ອຕິດຕາມ ແລະ ຊຸກຍູ້ວຽກ ງານຮອບດ້ານຂອງສະຫະພັນກຳມະບານເມືອງໂຂງ ໃຫ້ມີຄວາມເຕີບໃຫຍ່ ແລະ ເຂັ້ມແຂງ.
ການມາເຮັດວຽກຄັ້ງນີ້ ໄດ້ຮັບ ການຕ້ອນຮັບຢ່າງອົບອຸ່ນຈາກທ່ານ ວິໄຊ ສາຍອຸບົນ ປະທານແນວລາວສ້າງຊາດເມືອງ, ມີບັນດາທ່ານໃນຄະນະບໍລິຫານງານສະຫະພັນກຳມະບານເມືອງ ແລະ ແຂກຖືກເຊີນເຂົ້າຮ່ວມ; ໂອກາດນີ້ ທ່ານ ວິໄຊ ສາຍອຸບົນ ໄດ້ກ່າວຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຮອບດ້ານຂອງປະທານຄະນະບໍລິຫານງານສູນກາງສະພັນກຳມະບານລາວພ້ອມຄະນະຄັ້ງນີ້; ໂອກາດນີ້ກໍໄດ້ລາຍງານໂດຍສັງເຂບກ່ຽວກັບສະພາບຈຸດພິເສດຂອງເມືອງໂຂງວ່າ: ເມືອງຂອງພວກເຮົາຕັ້ງຢູ່ໃຕ້ສຸດຂອງແຂວງຈຳປາສັກ ມີຊາຍແດນຕິດຈອດກັບປະເທດກຳປູເຈຍ, ມີຈຳນວນ 114 ບ້ານ, ມີ 9 ກຸ່ມ 3 ຈຸດໃນດອນໂຂງ, ເປັນເມືອງທີ່ມີເກາະດອນກວມເອົາເນື້ອທີ່ 62%, ມີພົນລະເມືອງທັງໝົດ 1 ແສນກວ່າຄົນ, ມີ 17 ພັນກວ່າຄອບຄົວ ແລະ ມີ 16 ພັນກວ່າຫຼັງຄາເຮືອນ, ປະຊາຊົນສ່ວນໃຫຍ່ຖື ເອົາອາຊີບກະສິກຳເປັນສ່ວນໃຫຍ່ ແລະ ຄ້າຂາຍ-ບໍລິການເປັນອາຊີບສຳຮອງ; ທາງດ້ານເສດຖະກິດພາຍໃນເມືອງ ລວມຍອດຜະ ລິດຕະພັນພາຍໃນສະເລ່ຍຕໍ່ຫົວຄົນເກືອບ 2 ພັນໂດລາສະລັດຕໍ່ປີ, ປັດຈຸບັນໂຄງການລົງທຶນຂອງເອ ກະຊົນພາຍໃນ ແລະ ຕ່າງປະເທດມີ 22 ໂຄງການ ແລະ 1 ເຂດເສດ ຖະກິດພິເສດ ລວມມູນຄ່າ 7.198 ຕື້ກີບ. ນອກຈາກນີ້ ທ່ານ ນາງ ຈັນເພັງ ບຸນສາລີ ປະທານຄະນະບໍລິຫານງານສະຫະພັນກຳມະບານເມືອງຍັງໄດ້ລາຍຕື່ມວ່າ: ທົ່ວເມືອງມີກຳມະບານຮາກຖານ 30 ຮາກຖານ, ມີກຳມະບານໜ່ວຍທັງໝົດ 62 ໜ່ວຍ, ມີຈຳນວນສະມາຊິກທັງໝົດ 1 ພັນກວ່າຄົນ, ຍິງ 500 ກວ່າຄົນ, ມີຈຳນວນສະມາຊິກອງທຶນຊ່ວຍເຫຼືອເຊິ່ງກັນ ແລະ ກັນ (ເມືອງ)1.123 ຄົນ, ຍິງ 684 ຄົນ ແລະ ມີກຳມະບານອາຊີບ 8 ຄົນ, ຍິງ 6 ຄົນ; ຜ່ານມາໄດ້ມີການເຄື່ອນໄຫວລົງຊຸກຍູ້ວຽກງານປົກປ້ອງສິດຜົນປະໂຫຍດອັນຊອບທຳຂອງຜູ້ອອກແຮງງານ ໂດຍລົງເກັບກຳຂໍ້ມູນຕາມຫົວໜ່ວຍແຮງງານຕ່າງໆ, ໃນນີ້ ທົ່່ວເມືອງມີຫົວໜ່ວຍແຮງງານ 36 ຫົວໜ່ວຍ, ມີກຳມະກອນທັງໝົດ 145 ຄົນ, ຍິງ 97 ຄົນ, ໄດ້ມີການເຂົ້າຮ່ວມແກ້ໄຂຂໍ້ຂັດແຍ່ງແຮງງານ 3 ຄັ້ງ ແລະ ຍັງພົບເຫັນມີບາງໂຮງງານສວຍໃຊ້ແຮງງານເກີນເວລາທີ່ກຳນົດໄວ້ໃນກົດໝາຍແຮງງານ.
ໃນຕອນທ້າຍກອງປະຊຸມ ປະທານໄດ້ໂອ້ລົມ ແລະ ເນັ້ນໜັກຕື່ມວ່າ: ໃຫ້ມີການໂຄສະນາສຶກສາອົບຮົມວຽກງານແນວຄິດການເມືອງໃຫ້ແກ່ພະນັກງານຫຼາຍຂຶ້ນ ເພື່ອນຳໄປຈັດຕັ້ງປະຕິບັດພາລະບົດບາດ, ສິດໜ້າທີ່ຂອງຕົນຢູ່ບົນພື້ນຖານກົດໝາຍຂອງກຳມະບານ, ເອົາໃຈໃສ່ສ້າງຂະບວນການຕາມຂໍ້ແຂ່ງຂັນ 5 ເປັນເຈົ້າຢ່າງເປັນເຈົ້າການ ແລະ ວຽກງານອື່ນໆທີ່ຕົນຮັບຜິດຊອບ.
ຂ່າວ-ພາບ: ພຸດທະສິນ ວົງວິໄລທອງ ສະຖານີວິທະຍຸ-ໂທລະພາບເມືອງໂຂງ