ຕອນບ່າຍວັນທີ 20 ສິງຫາ 2024, ທ່ານ ປອ ນາງ ຈັນໂສດາ ພອນທິບ ຮອງປະທານຄະນະບໍລິຫານງານ ສູນກາງສະຫະພັນແມ່ຍິງລາວ ພ້ອມດ້ວຍຄະນະ ໄດ້ຕ້ອນຮັບ ທ່ານ CHUNG Byung-Won ຮອງລັດຖະມົນຕີກະຊວງການຕ່າງປະເທດ ຜູ້ຊີ້ນໍາວຽກງານການເມືອງ ສ.ເກົາຫຼີ ເນື່ອງໃນໂອກາດມາຢ້ຽມຢາມ ສູນສົ່ງເສີມຄວາມສະເໝີພາບ ຍິງ-ຊາຍ ແລະ ຕ້ານການໃຊ້ຄວາມຮຸນແຮງຕໍ່ແມ່ຍິງ (ສູນ GEVAW) ສູນກາງສະຫະພັນແມ່ຍິງລາວ.
ໂອກາດນີ້ທ່ານ ປອ ນາງ ຈັນໂສດາ ພອນທິບ ໄດ້ນຳສະເໜີພາລະບົດບາດ ແລະ ຄວາມເປັນມາຂອງສູນສົ່ງເສີມຄວາມສະເໝີພາບຍິງ-ຊາຍ ແລະ ຕ້ານການໃຊ້ຄວາມຮຸນແຮງຕໍ່ແມ່ຍິງ (ສູນGEVAW) ທີ່ຢູ່ພາຍໃຕ້ການຮ່ວມມື ລະຫວ່າງ ລັດຖະບານ ສປປ ລາວ ແລະ ລັດຖະບານ ສ.ເກົາຫຼີ ໂດຍແມ່ນສູນກາງສະຫະພັນແມ່ຍິງລາວ ແລະ ອົງການຮ່ວມມືສາກົນ ສ.ເກົາຫຼີ ເພຶ່ອຈັດຕັ້ງປະຕິບັດໂຄງການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ເພື່ອເຊື່ອມສານຄວາມສະເໝີພາບ ຍິງ-ຊາຍ ເຂົ້າໃນແຜນພັດທະນາ ຂອງ ສປປ ລາວ ໄລຍະເວລາ ແຕ່ປີ 2020 ເຖິງ 2024;
ສູນ GEVAW ສ້າງຂຶ້ນເພື່ອເປັນໃຈກາງໃນການສົ່ງເສີມການປ້ອງກັນ ແລະ ແກ້ໄຂຄວາມຮຸນແຮງຕໍ່ແມ່ຍິງ, ມີບົດບາດສໍາຄັນໃນການສົ່ງເສີມການປ້ອງກັນ ແລະ ຕ້ານການໃຊ້ຄວາມຮຸນແຮງຕໍ່ແມ່ຍິງໃນ ສປປ ລາວ, ສຸມໃສ່ການສ້າງຄວາມເຂັ້ມແຂງໃຫ້ການຈັດຕັ້ງໃຫ້ຄຳປຶກສາ ແລະ ປົກປ້ອງແມ່ຍິງ-ເດັກນ້ອຍ ນັບທັງຂັ້ນສູນກາງ ແລະ ທ້ອງຖິ່ນໃນທົ່ວປະເທດ.
ພ້ອມດຽວກັນນັ້ນ ຜູ້ເຂົ້າຮ່ວມໄດ້ຊົມວີດິໂອຜົນສໍາເລັດຂອງສູນ GEVAW ແລະ ໄດ້ສົນທະນາແລກປ່ຽນບົດຮຽນເຊິ່ງກັນ ແລະ ກັນ ພ້ອມທັງຢ້ຽມຊົມສູນຕື່ມອີກ.
