ປະທານປະເທດ ຕ້ອນຮັບ ທູດຕ່າງປະເທດ ປະຈໍາລາວ ເຂົ້າຍື່ນສານຕາຕັ້ງ

ໃນວັນທີ 23 ກຸມພາ 2023, ທີ່ທໍານຽບປະທານປະເທດ, ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຍື່ນສານຕາຕັ້ງຈາກ ບັນດາທູດຕ່າງປະເທດ ເພື່ອດໍາລົງຕໍາແໜ່ງເປັນ ເອກອັກຄະລັດຖະທູດວິສາມັນ ຜູ້ມີອໍານາດເຕັມ ປະຈໍາ ສປປ ລາວ.

ບັນດາທູດຕ່າງປະເທດ ປະຈໍາ ສປປ ລາວ ເຂົ້າຍື່ນສານຕາຕັ້ງໃນຄັ້ງນີ້ປະກອບມີ: ທ່ານ ໂຈນາທານ ຄິງສ໌ (Jonathan KINGS), ເອກອັກຄະລັດຖະທູດ ແຫ່ງ ນິວຊີແລນ ປະຈໍາ ສປປ ລາວ, ເຊິ່ງມີສຳນັກງານສະຖານທູດຕັ້ງຢູ່ ບາງກອກ, ຣາຊະອານາຈັກໄທ; ທ່ານ ເປໂດຣ ຊະວາເລັນ (Pedro Zwahlen), ເອກອັກຄະລັດຖະທູດ ແຫ່ງ ສະມາພັນທະລັດ ສະວິດ ປະຈໍາ ສປປ ລາວ, ເຊິ່ງມີສຳນັກງານສະຖານທູດຕັ້ງຢູ່ ບາງກອກ, ຣາຊະອານາຈັກໄທ; ທ່ານ ປາເວວ ປີເຕວ (Pavel Pitel), ເອກອັກຄະລັດຖະທູດ ແຫ່ງ ສາທາລະ ນະລັດ ເຊັກ, ເຊິ່ງມີສຳນັກງານສະຖານທູດຕັ້ງຢູ່ ບາງກອກ, ຣາຊະອານາຈັກໄທ; ທ່ານ ນິໂກລາຍ ພຣິດສ໌ (Nicolai Prytz), ເອກອັກຄະຣາຊະທູດແຫ່ງ ຣາຊະອານາຈັກ ດານມາກ, ເຊິ່ງມີສໍານັກງານສະຖານທູດຕັ້ງຢູ່ ນະຄອນ​ຫລວງ ຮ່າໂນ້ຍ, ສສ ຫວຽດນາມ; ທ່ານ ອູລັດຊີເມຍ ບາຣາວີກູ (Uladzimir Baravikou), ເອກອັກຄະລັດຖະທູດ ແຫ່ງ ສາທາລະ ນະລັດ ເບລາຣຸດຊີ, ເຊິ່ງມີສໍານັກງານສະຖານທູດຕັ້ງຢູ່ ນະຄອນຫລວງ ຮ່າໂນ້ຍ, ສສ. ຫວຽດນາມ.

ໂອກາດນີ້, ທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ບັນດາທ່ານເອກອັກຄະລັດຖະທູດ ທີ່ໄດ້ຖືກແຕ່ງຕັ້ງໃຫ້ມາດຳລົງຕຳແໜ່ງເປັນ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ຄົນໃໝ່ ປະຈໍາ ສປປ ລາວ ໃນຄັ້ງນີ້, ພ້ອມທັງ ສະແດງຄວາມຫວັງວ່າ ໃນໄລຍະທີ່ ດຳລົງຕຳແໜ່ງເປັນເອກອັກຄະລັດຖະທູດ ປະຈຳ ສປປ ລາວ, ບັນດາທ່ານທູດ ຈະເປັນຂົວຕໍ່ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີ ໃຫ້ນັບມື້ແຕກດອກອອກຜົນຍິ່ງໆຂຶ້ນໃນອະນາຄົດ, ເຊິ່ງລັດຖະ​ບານ ແລະ ພາກສ່ວນກ່ຽວຂ້ອງຕ່າງໆຂອງລາວ ພ້ອມທີ່ຈະໃຫ້ການຮ່ວມມື, ສະໜັບ​ສະໜູນ ແລະ ອໍານວຍ ຄວາມສະດວກ ເພື່ອໃຫ້ບັນດາທ່ານທູດ ສາມາດເຮັດສໍາເລັດໜ້າທີ່ ທີ່ໄດ້ຮັບມອບໝາຍຢ່າງຈົບງາມ. ພ້ອມນີ້, ທ່ານປະທານປະເທດ ກໍໄດ້ສະເໜີໃຫ້ບັນດາທ່ານເອກອັກຄະລັດຖະທູດ ຈົ່ງສືບຕໍ່ຊຸກຍູ້ໃຫ້ມີການແລກປ່ຽນການຢ້ຽມຢຽມເຊິ່ງກັນ ແລະ ກັນ ລະຫວ່າງ ບັນດາການນຳຂັ້ນສູງ ຈົນເຖິງ ການໄປມາຫາສູ່ກັນລະຫວ່າງ ປະຊາ​ຊົນ ດ້ວຍກັນໃຫ້ຫລາຍຂຶ້ນ; ໄດ້ຢືນຢັນຄືນແນວທາງນະໂຍບາຍການຕ່າງປະເທດ ອັນສະເໝີຕົ້ນສະເໝີປາຍຂອງ ສປປ ລາວ ຍາມໃດກໍຍຶດໝັ້ນໃນແນວທາງການຕ່າງປະເທດ ແຫ່ງ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື, ສປປ ລາວ ເປັນປະເທດຮັກຫອມສັນຕິພາບ, ຢາກເປັນມິດກັບທຸດປະເທດ, ພ້ອມທີ່ຈະຮ່ວມມື ກັບທຸກປະເທດ ບົນຫລັກການເຄົາລົບເຊິ່ງກັນ ແລະ ກັນ ແລະ ຕ່າງຝ່າຍຕ່າງມີຜົນປະໂຫຍດ ເພື່ອຄວາມຢູ່ດີກິນດີ ຂອງປະຊາຊົນ, ເພື່ອສັນຕິພາບ ແລະ ການພັດທະນາແບບຍືນຍົງຢູ່ໃນໂລກ.

ໃນໂອກາດດຽວກັນ, ທ່ານ ປະທານປະເທດ ກໍໄດ້ສະແດງຄວາມຂອບໃຈຕໍ່ການຮ່ວມມື, ສະໜັບສະໜູນ ແລະ ຊ່ວຍເຫລືອ ຂອງບັນດາປະເທດເພື່ອນມິດ ຕໍ່ ສປປ ລາວ ໃນໄລຍະຜ່ານມາ, ເຊິ່ງໄດ້ປະກອບສ່ວນສຳຄັນເຂົ້າ ໃນການພັດທະນາເສດຖະກິດ-ສັງຄົມ ຂອງ ສປປ ລາວ. ພ້ອມນີ້, ກໍສະເໜີໃຫ້ບັນດາທ່ານທູດ ຊ່ວຍສືບຕໍ່ຊຸກຍູ້ ການຮ່ວມມືດ້ານການຄ້າ ແລະ ການລົງທຶນ ໃນຂະແໜງການຕ່າງໆທີ່ມີທ່າແຮງຮ່ວມກັນ ໂດຍສະເພາະໃນປີ 2024 ນີ້, ສປປ ລາວ ຈະໄດ້ຮັບກຽດເປັນປະທານອາຊຽນ ແລະ ຫວັງຢ່າງຍິ່ງວ່າ ຈະໄດ້ຮັບການສະໜັບສະໜູນ ຊ່ວຍ ເຫລືອ ແລະ ການຮ່ວມມື ຈາກບັນດາທູດທັງໝົດ ເພື່ອເຮັດໃຫ້ການເປັນປະທານອາຊຽນຂອງ ສປປ ລາວ ປະສົບຜົນສໍາເລັດຢ່າງຈົບງາມ. ໃນຕອນທ້າຍ, ກໍໄດ້ຝາກຄວາມຢື້ຢາມຖາມຂ່າວອັນອົບອຸ່ນ ແລະ ຄໍາອວຍພອນໄຊ ອັນປະເສີດ ໄປຍັງຜູ້ນຳຂອງບັນດາທ່ານທູດທັງ 5 ປະເທດ ແລະ ຖືໂອກາດນີ້ເຊື້ອເຊີນມາຢ້ຽມຢາມ ສປປ ລາວ ໃນເວລາທີ່ສະດວກ, ອວຍພອນໃຫ້ບັນດາທ່ານທູດ ຈົ່ງປະສົບຜົນສຳເລັດໃນການປະຕິບັດ ໜ້າທີ່ການທູດຢູ່ ສປປ ລາວ ໃນຄັ້ງນີ້.

ໃນໂອກາດດຽວກັນນີ້, ບັນດາທ່ານ ເອກອັກຄະລັດຖະທູດ ກໍໄດ້ສະແດງຄວາມຂອບໃຈຕໍ່ຄໍາເວົ້າ ອັນຈົບງາມຂອງ ທ່ານ ປະທານປະເທດ ແຫ່ງ ສປປ ລາວ ແລະ ການຕ້ອນຮັບອັນອົບອຸ່ນ ໃນໂອກາດມາປະຕິບັດໜ້າທີ່ຢູ່ ສປປ ລາວ, ພ້ອມທັງ ໄດ້ສະແດງຄວາມຍິນດີທີ່ຈະສືບຕໍ່ຊຸກຍູ້ສົ່ງເສີມສາຍພົວພັນ ມິດຕະພາບອັນດີງາມ ແລະ ການຮ່ວມມືຢ່າງມີໝາກຜົນ ລະຫວ່າງ ປະເທດຂອງຕົນ ກັບ ສປປ ລາວ ໃຫ້ນັບມື້ນັບ ໄດ້ຮັບການເສີມຂະຫຍາຍ ແລະ ແຕກດອກອອກຜົນຍິ່ງໆຂຶ້ນໃນອະນາຄົດ ເພື່ອນຳເອົາຄວາມ ຈະເລີນຮຸ່ງເຮືອງ ມາສູ່ ປະເທດຊາດ ແລະ ນຳເອົາຜົນປະໂຫຍດສູງສຸດ ມາສູ່ ປະຊາຊົນ.

ພາບ: ອ່າຍຄຳ