ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 14 ທັນວາ 2023 ນີ້, ທ່ານ ທອງລຸນ ສີສຸລິດ ປະທານປະເທດ ພ້ອມຄະນະ ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງວຽງຈັນ, ໃຫ້ກຽດຕ້ອນຮັບຂອງ ທ່ານ ຄຳພັນ ສິດທິດຳພາ ເຈົ້າແຂວງວຽງຈັນ, ພ້ອມທັງໄດ້ລາຍງານສະພາບລວມໂດຍຫຍໍ້ ກ່ຽວກັບສະພາບທການພັດທະນາເສດຖະກິດ-ສັງຄົມ ພາຍໃນແຂວງ ສະເລ່ຍຕົວເລກລວມຍອດຜະລິດຕະພັນພາຍໃນ ຫລື GDP ຂະຫຍາຍຕົວ 4,7%, ສະເລ່ຍໃສ່ຫົວຄົນໄດ້ 19,93 ລ້ານກີບ, ການພັດທະນາດ້ານພື້ນຖານໂຄງລ່າງ ແຕ່ລະເມືອງມີເສັ້ນທາງໄປຮອດ, ທົ່ວແຂວງ ມີໄຟຟ້າເຂົ້າເຖິງທຸກເມືອງ, ເດັກນ້ອຍໃນເກນອາຍຸ ໄດ້ເຂົ້າຮຽນຫນັງສື, ການແກ້ໄຂຄວາມທຸກຍາກໄດ້ຮັບການເອົາໃຈໃສ່ຢ່າງຈິງຈັງ.
ປັດຈຸບັນ, ໃນທົ່ວແຂວງມີຄອບຄົວທີ່ຍັງບໍ່ພົ້ນທຸກ 3.720 ຄອບຄົວ, ເທົ່າກັບ 4,72% ເມື່ອທຽບໃສ່ຈຳນວນພົນລະ ເມືອງທັງໝົດ, ພ້ອມນີ້ປະຊາຊົນທົ່ວແຂວງນຳໃຊ້ວິດຖ່າຍ 100% ແລະ ປະກາດຢຸດຕິການຖ່າຍຊະຊາຍຢ່າງເປັນທາງການ.
ໃນໂອກາດນີ້, ທ່ານປະທານປະເທດໄດ້ມີຄຳເຫັນໂອ້ລົມ ໂດຍໄດ້ເນັ້ນໃຫ້ບັນດາການນຳແຂວງ ເພີ່ມທະວີການນຳພາ-ຊີ້ນຳ ໃຫ້ຫລາຍຂຶ້ນກວ່າເກົ່າ ໂດຍສະເພາະວຽກງານການສຶກສາອົບຮົມ ການເມືອງແນວຄິດໃຫ້ແກ່ພະ ນັກງານ-ລັດຖະກອນ ຕະຫລອດຮອດພໍ່ແມ່ປະຊາຊົນບັນດາເຜົ່າ ໃຫ້ກຳໄດ້ແນວທາງການປ່ຽນແປງຂອງພັກ, ຮັບຮູ້ສະພາບການຂອງໂລກຢ່າງແທ້ຈິງ, ມີຄວາມເຊື່ອໝັ້ນຕໍ່ພັກ-ລັດ ໃນການແກ້ບັນຫາບ້ານເມືອງ ໂດຍສະ ເພາະການແກ້ໄຂບັນຫາດ້ານວິກິດການເງິນທີ່ປະເທດເຮົາກຳລັງຜະເຊີນຢູ່ໃນປະຈຸບັນ; ເສີມຂະຫຍາຍນຳໃຊ້ທ່າແຮງບົ່ມຊ້ອນທີ່ມີຂອງແຂວງ ເພື່ອນຳມາສ້າງສາພັດທະນາແຂວງໃຫ້ຈະເລີນກ້າວ ໜ້າ; ເອົາໃຈໃສ່ແກ້ໄຂຄວາມທຸກຍາກຂອງປະຊາຊົນບັນດາເຜົ່າທີ່ເປັນສິ່ງກີດຂວາງການພັດທະນາ ໃຫ້ຫລຸດໜ້ອຍຖອຍລົງ ແລະ ຫລຸດພົ້ນອອກຈາກຄວາມ ທຸກຍາກເທື່ອລະກ້າວ. ພ້ອມນີ້, ທ່ານຍັງໄດ້ຮຽກຮ້ອງມາຍັງຄະນະພັກແຂວງວຽງຈັນ ເອົາໃຈໃສ່ໃຫ້ແກ່ການກະກຽມຄວາມພ້ອມໃຫ້ແກ່ການດຳເນີນກອງປະຊຸມໃຫຍ່ 3 ຂັ້ນຂອງພັກໃຫ້ມີຄວາມຮອບຄອບ ຖືກຕ້ອງຕາມລະບຽບການແລະ ຂັ້ນຕອນຂອງການດຳເນີນກອງປະຊຸມ ຕິດພັນກັບວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ຖືກວຽກງານດັ່ງກ່າວ ເປັນຫລັກ ແລະ ເປັນໜ້າທີ່ຂອງທຸກປວງຊົນລາວບັນດາເຜົ່າ ໂດຍສະເພາະກໍາແມ່ນປະຊາຊົນແຂວງວຽງຈັນ.
ໃນໂອກາດມາເຄື່ອນໄຫວຢູ່ແຂວງວຽງຈັນ ໃນຄັ້ງນີ້, ທ່ານປະທານປະເທດ ພ້ອມຄະນະ ໄດ້ໄປຢ້ຽມຢາມ ຟາມຄຳພູວອນ ຢູ່ເມືອງໂພນໂຮງ, ເຊິ່ງເປັນຟາມລ້ຽງສັດຂອງຄົນລາວ 100%, ມີເນື້ອທີ່ປະມານ 20 ກວ່າເຮັກຕາ,ໃນນັ້ນມີໝູ 6 ພັນກວ່າໂຕ, ໄກ່ 3 ພັນກວ່າໂຕ, ຢ້ຽມ ຢາມໂຄງການກໍ່ສ້າງສະຖານີຄ້ຽນຖ່າຍສິນຄ້າ ແລະ ເຂື່ອນໄຟຟ້ານໍ້າມັງ 3 ເມືອງທຸລະຄົມ ຕື່ມອີກ.
ຂ່າວ-ພາບ: ບຸນທະວີ ພົມມະສິດ (ນັກຂ່າວແຂວງວຽງຈັນ)