ກອງປະຊຸມສະຫຼຸບວຽກງານການເງິນປະຈຳ 2023 ແລະ ທິດທາງແຜນການປີ 2024 ພາຍໃຕ້ຄໍາຂວັນ ເພື່ອບັນລຸເປົ້າໝາຍ “ລາຍຮັບພາຍໃນກຸ້ມລາຍຈ່າຍ ມີສ່ວນສະສົມໄວ້ ແລະ ບຸກທະລຸການຄຸ້ມຄອງ ງົບປະມານແຫ່ງລັດເປັນທັນສະໄໝ” ໄດ້ອັດລົງດ້ວຍຜົນສຳເລັດ ວັນທີ 19 ທັນວາ 2023 ທີ່ ສູນການຮ່ວມມືສາກົນ ແລະ ເຝີກອົບຮົມ (ICTC) ໂດຍໃຫ້ກຽດເຂົ້າຮ່ວມຂອງທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ມີບັນດາລັດຖະມົນຕີ ຮອງລັດຖະມົນຕີ ເຈົ້າແຂວງ ແລະ ຂະແໜງການກ່ຽວຂ້ອງທົ່ວປະເທດເຂົ້າຮ່ວມ.
ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ໄດ້ຂຶ້ນລາຍງານຜົນກອງປະຊຸມວ່າ: ກອງປະຊຸມຄັ້ງນີ້ ໄດ້ດຳເນີນດ້ວຍບັນຍາກາດອັນເຄັ່ງຮ້ອນ ມີຄວາມເອົາໃຈໃສ່ ແລະ ຮັບຜິດຊອບສູງຂອງບັນດາຜູ້ແທນ ໄດ້ຮັບຟັງການສະເໜີບັນດາເອກະສານສໍາຄັນ 8 ສະບັບເປັນຕົ້ນ ບົດສະຫຼຸບການຕີລາຄາການຈັດຕັ້ງປະຕິບັດແຜນງົບປະມານແຫ່ງລັດກາງສະໄໝ (2021-2025) ແລະ ປະຈໍາປີ 2024 ຕິດພັນກັບການຈັດຕັ້ງປະຕິບັດວາລະແຫ່ງຊາດ ການສະຫຼຸບຕີລາຄາວຽກງານກົງຈັກການຈັດຕັ້ງ ແລະ ບຸກຄະລາກອນ ວຽກງານກວດສອບ ລວມທັງວຽກງານວິຊາສະເພາະ ທີ່ຕິດພັນກັບການຄຸ້ມຄອງງົບປະມານແຫ່ງລັດເປັນທັນສະໄໝ ແລະ ການກຳນົດຫຼັກການ ເພື່ອສ້າງຄວາມເຂັ້ມແຂງໃນຂະແໜງການເງິນ ຕາມທິດ 3 ສ້າງ ເພື່ອເປັນພື້ນຖານປັບປຸງນິຕິກຳຕິດພັນກັບການສ້າງຄວາມເຂັ້ມແຂງທາງດ້ານງົບປະມານໃຫ້ທ້ອງຖີ່ນ ແລະ ໄດ້ແລກປ່ຽນຄຳຄິດເຫັນໃນວຽກງານການເງິນທີ່ກ່ຽວຂ້ອງອື່ນໆ.
ໂອກາດນີ້ ທ່ານປະທານປະເທດໄດ້ໃຫ້ກຽດໂອ້ລົມ ສະແດງຄວາມຍ້ອງຍໍຊົມຊົມຕໍ່ຄວາມເອົາໃຈໃນການຈັດຕັ້ງປະຕິບັດວຽກງານກເງິນໄລຍະຜ່ານມາ ແລະ ເນັ້ນໃຫ້ກະຊວງການເງິນ ສືບຕໍ່ເອົາໃຈໃສ່ຫຼາຍຫາສຳຄັນ ເປັນຕົ້ນ ສືບຕໍ່ສຸມໃສ່ປັບປຸງກົນໄກ ການຫັນເປັນທັນສະໄໝ ແລະ ການບັງຄັບໃຊ້ກົດໝາຍ ເພື່ອການສະກັດກັ້ນການຮົ່ວໄຫຼຂອງງົບປະມານ ເພີ່ມລາຍຮັບໃຫ້ສູງຂຶ້ນສົມຄູ່ກັບການເຕີບໂຕຂອງເສດຖະກິດ ຄຸ້ມຄອງ ແລະ ປະຕິບັດລາຍຈ່າຍຢ່າງມີຈຸດສຸມ ມີປະສິດທິຜົນສູງ ແລະ ປະຢັດມັດທະຍັດ ໃຫ້ມີສ່ວນເຫຼືອແຮໄວ້ ຊຳລະໜີ້ສິນຕາມຍຸດທະສາດ ແລະ ແຜນໄລຍະກາງທີ່ກຳນົດໄວ້ ກໍຄືການສ້າງຄັງສະສົມແຫ່ງລັດໃຫ້ຫຼາຍຂຶ້ນ ຕໍ່ບັນຫານີ້ ປັດຈຸບັນກົມການເມືອງສູນກາງພັກ ໄດ້ຕົກລົງ ແລະ ມີທິດຊີ້ນຳໃຫ້ລັດຖະບານ ນຳໃຊ້ເງິນເກີນແຜນທີ່ທ້ອງຖິ່ນ ແລະ ບັນດາພາກສ່ວນຕ່າງໆ ຈັດເກັບໄດ້ນັ້ນເພື່ອແບ່ງສັດສ່ວນເຄິ່ງໜຶ່ງມາບໍລິຫານ-ຈັດການໃສ່ 2 ບັນຫາຕົ້ນຕໍ ຄື: ແກ້ໄຂໜີ້ສິນ 25% ແລະ 25% ແກ້ໄຂຄ່າຄອງຊີບໃຫ້ແກ່ພະນັກງານ ທະຫານ ຕຳຫຼວດ ໃນເງື່ອນໄຂຝືດເຄືອງດ້ານການດໍາລົງຊີວິດ ສືບຕໍ່ສຸມໃສ່ຈັດຕັ້ງປະຕິບັດບັນດານະໂຍບາຍ ແລະ ມາດຕະການໃນການຄຸ້ມຄອງເສດຖະກິດມະຫາພາກດ້ານການເງິນ ເງິນຕາ ເພື່ອສ້າງຄວາມໝັ້ນທ່ຽງ ຮັບປະກັນສະຖຽນລະພາບໃຫ້ເສດຖະກິດແຫ່ງຊາດ ສິ່ງສຳຄັນໃນສະເພາະໜ້າແກ້ໄຂອັດຕາເງິນເຟີ້ ເຮັດໃຫ້ອັດຕາແລກປ່ຽນເງິນກີບທຽບໃສ່ສະກຸນເງິນຫຼັກຫຼຸດລົງ ຫຼື ເຮັດໃຫ້ເງິນກີບແຂງຄ່າຂຶ້ນ ເອົາໃຈໃສ່ ສ້າງກົນໄກໃນການຄຸ້ມຄອງເງິນຕາຕ່າງປະເທດ ເພື່ອເພີ່ມຄັງສຳຮອງເງິນຕາຕ່າງປະເທດ ໄປຄຽງຄູ່ກັນນັ້ນ ຕ້ອງສ້າງຖານການຜະລິດໃໝ່ ຂະຫຍາຍການຜະລິດ ເພື່ອທົດແທນການນໍາເຂົ້າ ແລະ ເພີ່ມການສົ່ງອອກໃຫ້ຫຼາຍຂຶ້ນ ສ້າງກົນໄກ ແລະ ຮູບແບບສົ່ງເສີມການເຂົ້າເຖິງແຫຼ່ງທຶນໃຫ້ແກ່ບັນດາວິສາຫະກິດຂະໜາດນ້ອຍ ແລະ ຂະໜາດກາງໃຫ້ຫຼາຍຂຶ້ນ ທັງນຳໃຊ້ເຄື່ອງມືທີ່ທັນສະ ໄໝເຂົ້າມາຊ່ວຍ ໃນການຄຸ້ມຄອງການດໍາເນີນງານເພື່ອຫຼຸດຕົ້ນທຶນ ແລະ ສ້າງຄວາມສະດວກໃຫ້ວິສາຫະກິດ ແລະ ຜູ້ປະກອບການ ສາມາດເຂົ້າເຖິງແຫຼ່ງທຶນ ແລະ ຂໍ້ມູນໄດ້ໄວຂຶ້ນກວ່າເກົ່າ ສືບຕໍ່ສ້າງຄວາມໝັ້ນທ່ຽງທາງດ້ານເສດຖະກິດ-ການເງິນໃຫ້ໄດ້ໂດຍໄວ ດ້ວຍການປັບປຸງນະໂຍບາຍ ແລະ ມາດຕະການແກ້ໄຂບັນຫາການລົງທຶນ ການເກັບລາຍຮັບງົບປະມານ ສະພາບຄອງເງິນຕາຕ່າງປະເທດ ອັດຕາແລກປ່ຽນ ແລະ ສ້າງຄວາມເຊື່ອໝັ້ນໃຫ້ແກ່ນັກລົງທຶນ ແລະ ຜູ້ປະກອບການ ສ້າງຄວາມສະດວກໃຫ້ແກ່ຜູ້ປະກອບການສາມາດຂະຫຍາຍທຸລະກິດ ປະຕິບັດພັນທະໃຫ້ລັດຢ່າງຄົບຖ້ວນຕາມກົດໝາຍຢ່າງເຂັ້ມງວດ ຕ້ອງກຳ ແໜ້ນທິດຊີ້ນໍາ ຂອງປະທານ ໄກສອນ ພົມວິຫານທີ່ວ່າ:“ຂະແໜງການເງິນຕ້ອງເຮັດວຽກງານສ້າງ ແລະ ປະຕິບັດງົບປະມານໃຫ້ດີ ປະຕິບັດການກວດກາ ຂຶ້ນບັນຊີ ກຳແໜ້ນໝົດທຸກແຫຼ່ງຊັບສົມບັດຂອງລັດ ຄົ້ນ ຄ້ວາ ແລະ ປະກາດໃຊ້ນະໂຍບາຍລາຍຮັບ-ລາຍຈ່າຍການເງິນນະໂຍບາຍພາສີຢ່າງທັນການ.
ບັນຫາສຳຄັນອີກຢ່າງໜຶ່ງຕ້ອງສືບຕໍ່ເລັ່ງລັດການປະຕິຮູບບັນດາລັດວິສາຫະກິດໃຫ້ໄວ ຕ້ອງມີລະບຽບທີ່ຮັດກຸມ ມີເປົ້າໝາຍທີ່ຊັດເຈນຕໍ່ການກູ້ຢືມຕ່າງປະເທດ ສືບຕໍ່ສຸມໃສ່ການພັດທະນາ ຍົກລະດັບລະບົບຄຸ້ມຄອງງົບປະມານແຫ່ງລັດ ກ້າວເປັນດິຈິຕອນເທື່ອລະກ້າວ ເປັນຕົ້ນ ລະບົບຄຸ້ມຄອງລາຍຮັບ-ລາຍຈ່າຍ ລະບົບຊຳລະສະສາງໃຫ້ລວມສູນ ລະບົບພື້ນຖານໂຄງລ່າງເຄືອຂ່າຍ ຖານຂໍ້ມູນ ເຊື່ອມຕໍ່ແລກປ່ຽນ ວິເຄາະ-ວິໄຈ ຂໍ້ມູນ ກັບຂະແໜງການທີ່ກ່ຽວຂ້ອງ ສ້າງຄວາມໂປ່ງໃສ ມີວິໄນ ເກັບໃຫ້ໝົດ ເກັບໃຫ້ຄົບຖ້ວນ ເກັບໃຫ້ເຂົ້າລະບົບ (ງົບປະມານ) ແລະ ຄຸ້ມຄອງລາຍຈ່າຍງົບປະມານໃຫ້ເຂັ້ມງວດ ຮັດກຸມ ແລະ ອື່ນໆໃຫ້ຖືກຕ້ອງສອດຍິ່ງຂຶ້ນ.
ຂ່າວ;ພາບ: VientianeMai
