ໂດຍຕອບສະໜອງຕາມ ການເຊື້ອເຊີນຂອງ ພະບາດ ສົມເດັດ ພະບໍຣົມມະນຽດ ໂນໂຣດົມ ສີຫາມຸນີ, ພະມະຫາກະສັດ ແຫ່ງ ຣາຊະອານາຈັກ ກຳປູເຈຍ, ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ພ້ອມດ້ວຍຄະນະຜູ້ແທນຂັ້ນສູງຂອງ ສປປ ລາວ ໄດ້ເດີນທາງ ຢ້ຽມຢາມລັດຖະກິດ ທີ່ ຣາຊະ ອານາຈັກ ກຳປູເຈຍ, ໃນລະຫວ່າງ ວັນທີ 4-5 ພຶດສະພາ 2023. ພະນະທ່ານ ປະທານປະເທດ ແຫ່ງ ສປປ ລາວ ໄດ້ເດີນທາງເຖິງນະຄອນຫຼວງພະນົມເປັນ, ໃນວັນທີ 4 ພຶດສະພາ 2023 ແລະ ໄດ້ມີພິທີຕ້ອນຮັບຢ່າງເປັນທາງການ ແລະ ສົມກຽດ ໂດຍ ພະບາດ ສົມເດັດ ພະບໍຣົມມະນຽດ ໂນໂຣດົມ ສີຫາມຸນີ, ພະມະຫາກະສັດ ແຫ່ງ ຣາຊະອານາຈັກ ກຳປູເຈຍ, ທີ່ ພະລາດຊະວັງ. ພາຍຫຼັງສໍາເລັດພິທີຕ້ອນຮັບຢ່າງເປັນທາງການ ກໍໄດ້ມີການພົບປະ ລະຫວ່າງ ສອງປະມຸກ ລັດ ລາວ -ກຳປູເຈຍ. ໃນໂອກາດພົບປະຄັ້ງນີ້, ພະນະທ່ານ ປະທານປະເທດ ທອງລຸນ ສີສຸລິດ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ດ້ວຍນ້ຳໃຈໄມຕີຈິດ ມິດຕະພາບອັນປະທັບໃຈ ແລະ ສະແດງຄວາມຂອບໃຈຕໍ່ ພະບາດ ສົມເດັດ ພະບໍຣົມມະນຽດ ໂນໂຣດົມ ສີຫາມຸນີ ທີ່ໄດ້ໃຫ້ ການເຊື້ອເຊີນຢ້ຽມຢາມລັດຖະກິດ ທີ່ ຣາຊະອານາຈັກ ກໍາປູເຈຍ ເປັນຄັ້ງທໍາອິດ ພາຍຫຼັງໄດ້ຮັບຕໍາແໜ່ງ ປະທານປະເທດ ເຊິ່ງເປັນການປະກອບສ່ວນອັນສຳຄັນ ເຂົ້າໃນການເສີມຂະຫຍາຍສາຍພົວພັນ ລະຫວ່າງ ສອງປະເທດ ລາວ-ກຳປູເຈຍ ໃນຖານະເປັນເພື່ອນມິດສະໜິດສະໜົມ ເປັນບ້ານໃກ້ເຮືອນຄຽງ ບ້ານແກ່ວເມືອງດອງ ແລະ ມີຮີດຄອງປະເພນີຄ້າຍຄືກັນ. ນັບແຕ່ ສປປ ລາວ ແລະ ຣາຊະອານາຈັກ ກໍາປູເຈຍ ໄດ້ສ້າງຕັ້ງສາຍພົວພັນການທູດ ແຕ່ປີ 1956 ມາເຖິງປະຈຸບັນ ເປັນເວລາເກືອບ 67 ປີ, ສປປ ລາວ ຖືວ່າຣາຊະ ອານາຈັກ ກໍາປູເຈຍ ເປັນເພື່ອນບ້ານໃກ້ຄຽງທີ່ດີ, ບ້ານແກ່ວເມືອງດອງ ແລະ ມີສາຍພົວພັນທີ່ມີມູນເຊື້ອອັນຍາວນານ ຊຶ່ງໃນປີ 2019 ສອງປະເທດໄດ້ຍົກລະດັບການພົວພັນ ເປັນຄູ່ຮ່ວມມືຍຸດທະສາດຮອບດ້ານ ແລະ ໝັ້ນຄົງຍາວນານ ທີ່ຕ່າງຝ່າຍຕ່າງມີຜົນປະໂຫຍດຮ່ວມກັນ. ສາຍພົວພັນ ລະຫວ່າງ ສປປ ລາວ ແລະ ຣາຊະອານາຈັກ ກໍາປູເຈຍ ແມ່ນສາຍພົວພັນ ທີ່ມີຄວາມໄວ້ເນື້ອເຊື່ອໃຈກັນ ແລະ ເຂົ້າອົກເຂົ້າໃຈກັນສູງ ການນໍາຂັ້ນສູງສຸດຂອງສອງປະເທດມີຄວາມໃກ້ຊິດ ແລະ ສະໜິດສະໜົມກັນ ບໍ່ວ່າໃນໄລຍະຕໍ່ສູ້ກູ້ຊາດ ກໍ່ຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ເຊິ່ງມັນໄດ້ສະແດງອອກ ໃນໄລຍະຕໍ່ສູ້ກູ້ຊາດຕ້ານສົງຄາມຮຸກຮານ ຂອງຕ່າງປະເທດ ພະມະຫາກະສັດ ໂນໂຣດົມ ສີຫານຸ ໄດ້ສະເດັດໄປຢ້ຽມຢາມ ເມືອງວຽງໄຊ, ເຂດປົດປ່ອຍຂອງລາວ ອັນໄດ້ເປັນກໍາລັງໃຈອັນຍິ່ງໃຫຍ່ໃຫ້ແກ່ປະຊາຊົນລາວ ໃນການຕໍ່ສູ້ປົກປ້ອງອະທິປະໄຕຂອງຕົນໃນເມື່ອກ່ອນ. ພະອົງ ຍັງໄດ້ຜ່ານດິນລາວເຂົ້າໄປ ກຳປູເຈຍ ໃນສະໄໝການຕໍ່ສູ້ຕ້ານລະບອບ ໂລນໂນນ. ພາຍຫຼັງສະຖາປະນາ ສປປ ລາວ ແລະ ຟື້ນຟູ ຣາຊະອານາຈັກ ກຳປູເຈຍ, ພະບາດສົມເດັດ ໂນໂຣດົມ ສີຫານຸ ກໍ່ໄດ້ເດີນທາງຢ້ຽມຢາມ ສປປ ລາວ ອີກຄັ້ງ, ເຊິ່ງຖືວ່າ ພະອົງ ແມ່ນໄດ້ປະກອບສ່ວນອັນໃຫຍ່ຫຼວງ ເຂົ້າໃນການເສີມຂະຫຍາຍການພົວພັນຮ່ວມມື ລາວ ແລະ ກຳປູເຈຍ. ຍ້ອນການພົວພັນລະດັບສູງສຸດດັ່ງກ່າວນີ້ ຈຶ່ງເຮັດໃຫ້ສອງປະເທດ ລາວ ແລະ ກໍາປູເຈຍ ມີມິດຕະພາບ ແລະ ການພົວພັນທີ່ດູດດື່ມ ທັງໄດ້ເພິ່ງພາອາໃສເຊິ່ງກັນ ແລະ ກັນ ຕະຫຼອດມາ.
ຕະຫຼອດໄລຍະຜ່ານມາ ລັດຖະບານຂອງສອງປະເທດ ກໍ່ໄດ້ເອົາໃຈໃສ່ເສີມຂະຫຍາຍການພົວພັນຮ່ວມມືກັນຢ່າງຮອບດ້ານ ເຊິ່ງສະແດງອອກ ໃນໂອກາດທີ່ ສົມເດັດ ເຕໂຈ ຮຸນ ແຊນ, ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ ເດີນທາງຢ້ຽມຢາມ ສປປ ລາວ ຢ່າງເປັນທາງການ ໃນລະຫວ່າງ ວັນທີ 13-14 ກຸມພາ 2023 ໂດຍໄດ້ມີການລົງນາມ ໃນເອກະສານທີ່ເປັນປະຫວັດສາດ ຈໍານວນ 02 ສະບັບ ຄື:
– ແຜນປະຕິບັດງານຮ່ວມ ວ່າດ້ວຍ ການຮ່ວມມືສອງຝ່າຍ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຣາຊະອານາຈັກ ກໍາປູເຈຍ ແຕ່ປີ 2023-2027 (Action Plan).
– ສົນທິສັນຍາ ວ່າດ້ວຍ ການກໍານົດຊາຍແດນປະເທດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຣາຊະອານາຈັກ ກໍາປູເຈຍ.
ພະນະທ່ານ ປະທານປະເທດ ທອງລຸນ ສີສຸລິດ ໄດ້ສະແດງຄວາມຊົມເຊີຍຕໍ່ຜົນສໍາເລັດ ໃນການສ້າງສາພັດທະນາປະເທດຊາດກໍາປູເຈຍ ໂດຍສະເພາະ ຕໍ່ການຊີ້ນໍານໍາພາຂອງ ພະບາດສົມເດັດ ຕະຫຼອດໄລຍະຜ່ານມາ ທີ່ໄດ້ນໍາຄວາມສີວິໄລຈະເລີນກ້າວໜ້າມາສູ່ປະເທດຊາດ, ທົ່ວປະເທດມີສະຖຽນລະພາບດ້ານການເມືອງ, ເສດຖະກິດມີການຂະຫຍາຍ ຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງໃຫ້ດີຂື້ນເປັນກ້າວໆ ແລະ ບົດບາດອິດທິພົນຊື່ສຽງຂອງກໍາປູເຈຍ ນັບມື້ນັບໄດ້ຮັບການຍົກສູງຂື້ນ ໃນເວທີພາກພື້ນ ແລະ ສາກົນ.
ນອກນີ້, ພະນະທ່ານປະທານປະເທດຍັງໄດ້ພົບປະສອງຝ່າຍກັບ ສົມເດັດ ເຕໂຈ ຮຸນ ແຊນ, ນາຍົກລັດຖະມົນຕີ ແຫ່ງ ຣາຊະອານາຈັກ ກໍາປູເຈຍ ແລະ ສົມເດັດ ວິບຸນ ເສນາພັກດີ ຊາຍ ຊຸມ, ປະທານສະພາສູງ ເຊິ່ງສອງຝ່າຍໄດ້ຮ່ວມກັນທົບທວນຄືນການຈັດຕັ້ງປະຕິບັດ ບັນດາເອກະສານຮ່ວມມືສອງຝ່າຍ ກໍ່ຄືການຕົກລົງຂອງການນໍາຂັ້ນສູງສອງປະເທດໃນທຸກໆດ້ານ ຕະຫຼອດໄລຍະຜ່ານມາ ແລະ ວາງແຜນການຮ່ວມມືໃນຕໍ່ໜ້າ, ເປັນຕົ້ນການຮ່ວມມືດ້ານການເມືອງ, ວຽກງານປ້ອງກັນຊາດ-ປ້ອງກັນຄວາມສະຫງົບ; ການຮ່ວມມືດ້ານຊາຍແດນ; ການຮ່ວມມືດ້ານເສດຖະກິດ, ການຄ້າ-ການລົງທຶນ, ດ້ານໂຍທາທິການ ແລະ ຂົນສົ່ງ, ດ້ານພະລັງງານ ຕະຫຼອດຮອດ ການພົວພັນຮ່ວມມືໃນລະດັບທ້ອງຖິ່ນ ກໍ່ຄື ການຮ່ວມມືໃນກອບພາກພື້ນ ແລະ ອານຸພາກພື້ນ. ສອງຝ່າຍໄດ້ແລກປ່ຽນຄໍາຄິດຄໍາເຫັນແບບກົງໄປກົງມາ, ຈິງໃຈ ແລະ ເປັນເອກະພາບກັນສູງ ໂດຍພະນະທ່ານປະທານປະເທດ ສະເໜີໃຫ້ຊີ້ນຳບັນດາຂະແໜງການທີ່ກ່ຽວຂ້ອງ ຈົ່ງເອົາໃຈໃສ່ ຮ່ວມກັນຈັດຕັ້ງປະຕິບັດ ບັນດາຂໍ້ຕົກລົງ ທີ່ສອງຝ່າຍໄດ້ມີຮ່ວມກັນ ກໍ່ຄືການຕົກລົງຂອງການນຳຂັ້ນສູງສອງປະເທດ ໃຫ້ປະກົດຜົນເປັນຈິງ, ໂດຍສະເພາະແມ່ນ ການແກ້ໄຂບັນຫາການກໍານົດຊາຍແດນ, ການປ່ຽນແທນຫຼັກໝາຍຊາຍແດນຈາກຫຼັກໝາຍນ້ອຍເປັນຫຼັກໝາຍໃຫຍ່ ໃຫ້ໝັ້ນຄົງຖາວອນ, ການປັກຫຼັກໝາຍຖີ່ ແລະ ການສືບຕໍ່ປຶກສາຫາລື ບໍລິເວນທີ່ຍັງຄົງຄ້າງໃຫ້ສຳເລັດຢ່າງສົມບູນໂດຍໄວ, ການສືບຕໍ່ຮັກສາກົນໄກການພົບປະ ແລະ ປະສານງານກັນໃນແຕ່ລະລະດັບ ເພື່ອຊຸກຍູ້ໃຫ້ການຮ່ວມມືໃນແຕ່ລະດ້ານ ໄດ້ຮັບການຈັດຕັ້ງປະຕິບັດຢ່າງມີປະສິດຕິພາບ, ການຮ່ວມມືດ້ານການຝຶກຊ້ອມຕ້ານໄພພິບັດ ຢູ່ບໍລິເວນຊາຍແດນຂອງສອງປະເທດ ແລະ ບັນຫາອື່ນໆ.
ໃນຕອນຄໍ່າຂອງວັນດຽວກັນ, ພະນະທ່ານ ປະທານປະເທດ ພ້ອມດ້ວຍຄະນະຜູ້ແທນຂັ້ນສູງ ຂອງລາວ ໄດ້ເຂົ້າຮ່ວມງານລ້ຽງອາຫານຄໍ່າ ຈັດເປັນກຽດໂດຍ ພະບາດສົມເດັດ ພະບໍລົມມະນຽດ ໂນໂຣດົມ ສີຫາມຸນີ, ພະມະຫາກະສັດ ແຫ່ງ ຣາຊະອານາຈັກ ກໍາປູເຈຍ ຊຶ່ງມີການເຂົ້າຮ່ວມຂອງການນຳຂັ້ນສູງຂອງກຳປູເຈຍ, ທີ່ພະລາດຊະວັງ.
ໃນຕອນເຊົ້າຂອງວັນທີ 05 ພຶດສະພາ 2023 ພະນະທ່ານ ປະທານປະເທດ ພ້ອມດ້ວຍຄະນະໄດ້ເດີນທາງໄປຢ້ຽມຢາມ, ພົບປະ ແລະ ໃຫ້ກໍາລັງໃຈແກ່ບັນດາການນໍາ, ຄູຝຶກ ແລະ ນັກກິລາທິມຊາດຂອງ ສປປ ລາວ ທີ່ເດີນທາງໄປເຂົ້າຮ່ວມງານມະຫາກໍາກິລາຊີເກມ ຄັ້ງທີ 32 ທີ່ສະໜາມກິລາ ມໍລະດົກ ເຕໂຈ. ພາຍຫຼັງທີ່ເດີນທາງໄປເຖິງ ພະນະທ່ານປະທານປະເທດ ໄດ້ຖືກຕ້ອນຮັບ ແລະ ຮັບຟັງການລາຍງານ ສະພາບການກະກຽມຄວາມພ້ອມຂອງບັນດານັກກິລາ ຈາກຄະນະກໍາມະການໂອລໍາປິກແຫ່ງຊາດລາວ. ໃນໂອກາດດັ່ງກ່າວ, ພະນະທ່ານປະທານປະເທດ ກໍ່ໄດ້ໃຫ້ການໂອ້ລົມກັບບັນດາການນໍາ, ຄູຝຶກ ແລະ ນັກກິລາທິມຊາດຂອງ ສປປ ລາວ ໃຫ້ຕັ້ງໃຈໃນການແຂ່ງຂັນ ເຮັດໃຫ້ດີທີ່ສຸດ ມີຄວາມຫວັງຕ້ອງໄດ້ໄຊຊະນະ ແຕ່ຖ້າວ່າບໍ່ຊະນະ ຫຼື ບໍ່ໄດ້ຫຼຽນ ກໍ່ໃຫ້ເອົາຊະນະຈິດໃຈເຈົ້າພາບ ແລະ ມະຫາຊົນ ການຫຼີ້ນກໍ່ໃຫ້ມີນໍ້າໃຈເປັນນັກກິລາ ນັບຖືລະບຽບ ກົດກະຕິກາ ແລະ ມາລະຍາດຂອງນັກກິລາ ມີນໍ້າໃຈຄວາມສາມັກຄີ ມິດຕະພາບ ກັບບັນດາເພື່ອນນັກກິລາດ້ວຍກັນ, ປັດຈຸບັນ ປະຊາຊົນລາວ ກໍາລັງໃຈຈົດໃຈຈໍ່ລໍຖ້າຊົມ ແລະ ເຊຍ ຕໍ່ນັກກິລາຂອງລາວເຮົາ. ສະນັ້ນ, ນັກກິລາທຸກຄົນຕ້ອງໄດ້ເອົາໃຈໃສ່ເຮັດໃຫ້ດີທີ່ສຸດ.
ໃນຕອນຄໍ່າຂອງວັນດຽວກັນ, ພະນະທ່ານ ປະທານປະເທດ ພ້ອມດ້ວຍຄະນະຜູ້ແທນຂັ້ນສູງຂອງ ສປປ ລາວ ກໍ່ໄດ້ເດີນທາງເຂົ້າຮ່ວມພິທີເປີດງານມະຫາກໍາກິລາຊີເກມ ຄັ້ງທີ 32 ຢ່າງເປັນທາງການຮ່ວມກັບການນໍາປະເທດເຈົ້າພາບ ແລະ ການນໍາຂອງບັນດາປະເທດອາຊຽນ. ພາຍຫຼັງສໍາເລັດພິທີ ພະນະທ່ານ ປະທານປະເທດ ທອງລຸນ ສີສຸລິດ ພ້ອມດ້ວຍຄະນະຜູ້ແທນຂັ້ນສູງຂອງລາວ ໄດ້ເດີນທາງກັບຄືນປະເທດ ດ້ວຍຄວາມສະຫວັດດີພາບ, ສໍາເລັດການຢ້ຽມຢາມທາງລັດຖະກິດ ທີ່ ຣາຊະອານາຈັກ ກຳປູເຈຍ ດ້ວຍຜົນສຳເລັດສູງ.
