ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ປະທານປະເທດ ແຫ່ງ ສປປ ລາວ ອວຍພອນປີໃໝ່ລາວ ປີຊວດ ພສ 2563

– ພີ່ນ້ອງຮ່ວມຊາດ ແລະ ເຊື້ອຊາດລາວ ທີ່ຮັກແພງທັງຫລາຍ

ໃນໂອກາດສົ່ງທ້າຍປີເກົ່າ ປີກຸນ ພສ 2562 ແລະ ຕ້ອນຮັບປີໃໝ່ ປີ ຊວດ ພສ 2563 ເຊິ່ງເປັນປາງບຸນໜຶ່ງໃນຮີດ 12 ທີ່ໄດ້ປະຕິບັດສືບທອດກັນມາແຕ່ບູຮານນະການ ຈາກບັນພະບູລຸດ ຂອງພວກເຮົາ, ຂ້າພະເຈົ້າ ຂໍຖືໂອກາດອັນເປັນສິລິມຸງຄຸນນີ້ ສົ່ງຄໍາອວຍພອນອັນປະເສີດ ມາຍັງພີ່ນ້ອງຮ່ວມຊາດ ຕະ ຫລອດເຖິງຄົນເຊື້ອຊາດລາວທຸກທ່ານ ທີ່ອາໃສຢູ່ຕ່າງປະເທດ ກໍຄື ຊາວຕ່າງປະເທດ ທີ່ດໍາລົງຊີວິດ, ປະຕິບັດໜ້າທີ່ ແລະ ທໍາມາຫາກິນ ຢູ່ ສປປ ລາວ. ຂໍໃຫ້ທຸກໆທ່ານ ຈົ່ງມີສຸຂະພາບ ເຂັ້ມແຂງ, ພາລະນາໄມສົມບູນ, ສຸກກາຍສຸກໃຈ ແລະ ມີຄວາມຈະເລີນກ້າວໜ້າ ທຸກປະການ.

– ພີ່ນ້ອງຮ່ວມຊາດ ແລະ ເຊື້ອຊາດລາວ ທີ່ຮັກແພງທັງຫລາຍ
ໃນປີເກົ່າ ພສ 2562 ທີ່ ພວມກ້າວລ່ວງໄປນີ້ ເປັນປີແຫ່ງຄວາມພະຍາຍາມບຸກບືນຂອງທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ ໃນການອອກແຮງແຂ່ງຂັນກັນຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 10 ຂອງພັກ ແລະ ແຜນພັດທະນາ ເສດຖະກິດ-ສັງຄົມແຫ່ງລັດ 5 ປີ ຄັ້ງທີ 8 ຢ່າງເປັນຂະບວນຟົດຟື້ນ ໂດຍໄດ້ຮັບໝາກຜົນທີ່ເປັນຮູບປະທໍາໃນຫລາຍດ້ານ. ພ້ອມດຽວກັນ, ຂ້າພະເຈົ້າ ມີຄວາມພາກພູມໃຈ ທີ່ເຫັນວ່າຕະຫລອດໄລຍະໜຶ່ງປີທີ່ຜ່ານມາ, ພາຍໃຕ້ການນໍາພາຢ່າງໃກ້ຊິດ ຂອງພັກ-ລັດ ແລະ ການປະກອບສ່ວນ ຢ່າງຕັ້ງໜ້າຂອງປະຊາຊົນ ລາວບັນດາເຜົ່າ, ສປປ ລາວ ສາມາດສ້າງຜົນງານອັນໃຫຍ່ຫລວງຫລາຍດ້ານ, ມີສະຖຽນລະພາບດ້ານການເມືອງຢ່າງໜັກແໜ້ນ, ເສດຖະກິດແຫ່ງຊາດ ໄດ້ຮັບການພັດທະນາຢ່າງຕໍ່ເນື່ອງ ດ້ວຍຈັງຫວະການຂະຫຍາຍຕົວ 6,4%, ລວມຍອດຜະລິດຕະພັນພາຍໃນ ສະເລ່ຍຕໍ່ຫົວຄົນ ໄດ້ 2.683 ໂດລາສະຫະລັດ; ຂົງເຂດການສຶກສາ, ວັດທະນະທໍາ-ສັງຄົມ ກໍໄດ້ຮັບການເອົາໃຈໃສ່ຢ່າງຈິງຈັງ, ລະບົບການເມືອງ-ການປົກຄອງ ໄດ້ຮັບການປັບປຸງໃຫ້ມີຄວາມໜັກ ແໜ້ນເຂັ້ມແຂງກວ່າເກົ່າ; ສັງຄົມມີຄວາມສະຫງົບ ແລະ ມີຄວາມເປັນລະບຽບ ຮຽບຮ້ອຍໂດຍພື້ນຖານ, ປະຊາຊົນລາວ ເຮົາມີຄວາມສາມັກຄີປອງດອງເປັນປຶກແຜ່ນ, ຊີວິດການເປັນຢູ່ ທາງດ້ານວັດຖຸ ແລະ ຈິດໃຈຂອງປະຊາຊົນ ກໍໄດ້ຮັບການປັບປຸງແກ້ໄຂໃຫ້ດີຂຶ້ນຢ່າງບໍ່ຢຸດຢັ້ງ, ເກີດມີຄອບຄົວຕົວແບບພົ້ນທຸກນັບມື້ນັບຫລາຍ; ການພົວພັນຮ່ວມມືລະຫວ່າງ ປະເທດເຮົາກັບບັນດາປະເທດເພື່ອນມິດ ແລະ ອົງການ ຈັດຕັ້ງສາກົນສືບຕໍ່ໄດ້ຮັບການເສີມຂະຫຍາຍ ຢ່າງມີປະສິດທິຜົນ ແລະ ຖານະບົດບາດອິດທິພົນຂອງ ສປປ ລາວ ນັບມື້ສູງເດັ່ນຂຶ້ນໃນເວທີພາກພື້ນ ແລະ ສາກົນ.
ນະໂອກາດນີ້, ຂ້າພະເຈົ້າຂໍຕາງໜ້າ ໃຫ້ການນໍາພັກ-ລັດ ສະແດງຄວາມຊົມເຊີຍ, ສັນລະເສີນຄວາມຂອບໃຈຢ່າງຈິງໃຈມາຍັງສະມາຊິກພັກ, ພະນັກງານ, ທະຫານຕໍາຫລວດ ແລະ ພີ່ນ້ອງຮ່ວມຊາດທຸກເຜົ່າ-ທຸກຊັ້ນຄົນ ໃນຂອບເຂດທົ່ວປະເທດ, ພີ່ນ້ອງເຊື້ອຊາດລາວ ທີ່ຢູ່ຕ່າງປະເທດທີ່ໄດ້ປະກອບສ່ວນເຂົ້າໃນພາລະກິດລວມ ຂອງຊາດດ້ວຍຄວາມເປັນເຈົ້າການ ຫ້າວຫັນຕະຫລອດປີທີ່ຜ່ານມາ.

– ພີ່ນ້ອງຮ່ວມຊາດ ແລະ ເຊື້ອຊາດລາວ ທີ່ຮັກແພງທັງຫລາຍ.
ປີຊວດ ພສ 2563 ທີ່ພວມກ້າວເຂົ້າມາ ເປັນປີທີ່ມີຄວາມໝາຍສໍາຄັນ ສໍາລັບ ສປປ ລາວ ເຮົາ, ເຊິ່ງເປັນປີມ້ວນທ້າຍແຫ່ງການຈັດຕັ້ງຜັນຂະຫຍາຍ ໜ້າທີ່ວຽກງານຫລາຍຢ່າງທີ່ສໍາຄັນຂອງພັກ ແລະ ຂອງຊາດ. ໃນນັ້ນ, ພວກເຮົາຈະໄດ້ພ້ອມກັນສຸມໃສ່ ການແກ້ໄຂຄວາມທຸກຍາກຂອງປະຊາຊົນ ໂດຍສະເພາະ ການຟື້ນຟູປົວແປງຊີວິດການເປັນຢູ່ຂອງປະຊາຊົນ ຜູ້ທີ່ໄດ້ຮັບຜົນກະທົບຈາກໄພພິບັດທໍາມະຊາດ ໃນຫວ່າງແລ້ວນີ້ ໃຫ້ກັບຄືນສູ່ສະພາບປົກກະຕິ ໂດຍໄວ ແລະ ຈັດຕັ້ງປະຕິບັດເປົ້າຫມາຍ “ສູ້ຊົນພັດທະນາປະເທດເຮົາໃຫ້ຫລຸດພົ້ນ ອອກຈາກສະຖານະພາບ ຄວາມດ້ອຍພັດທະນາໃນອານາຄົດອັນໃກ້ນີ້ ເພື່ອກ້າວໄປສູ່ປະເທດກໍາລັງພັດທະນາ ທີ່ມີລາຍຮັບປານກາງສູງຕາມທິດພັດທະນາສີຂຽວ ແລະ ຍືນຍົງເມື່ອເຖິງປີ 2030”.
ເຖິງຢ່າງໃດກໍຕາມ, ການບັນລຸເປົ້າໝາຍດັ່ງກ່າວ ຖືເປັນພາລະກິດອັນໜັກໜ່ວງຂອງ ພັກ-ລັດ ແລະ ປວງຊົນລາວທັງຊາດ ເນື່ອງຈາກ ສປປ ລາວ ຍັງປະສົບກັບຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ຍ້ອນ ເກີດໄພພິບັດທໍາມະຊາດ, ພະຍາດລະບາດ ແລະ ໄພແຫ້ງແລ້ງຖະຫລົ່ມ ໃສ່ປະເທດພວກເຮົາ ຫລາຍຄັ້ງໃນຊຸມປີຜ່ານມາ. ຍິ່ງໄປກວ່ານັ້ນ, ປັດຈຸບັນຫລາຍປະເທດໃນທົ່ວໂລກ ລວມທັງ ສປປ ລາວ ເຮົາ ພວມປະເຊີນກັບວິກິດ ການແຜ່ລະບາດຮ້າຍແຮງ ຂອງພະຍາດອັກເສບປອດ ຈາກເຊື້ອຈຸລະໂຣກສາຍພັນໃໝ່ ໂຄວິດ-19 ເຊິ່ງໄດ້ສົ່ງຜົນກະທົບເປັນ ວົງກວ້າງ ຕໍ່ການພັດທະນາ ເສດຖະກິດ-ສັງຄົມ ແລະ ການດໍາລົງຊີວິດຂອງບັນດາປະຊາຊາດໃນໂລກ. ເວົ້າສະເພາະຢູ່ ສປປ ລາວ ເຮົາ, ພັກ ແລະ ລັດຖະບານ ແມ່ນມີຄວາມເປັນຫ່ວງເປັນໄຍທີ່ສຸດໃນການກັນ, ໂຕ້ຕອບ ແລະ ແກ້ໄຂກ່ຽວກັບພະຍາດນີ້, ໃນນັ້ນ ໄດ້ມີການຕິດຕາມສະພາບການຢ່າງໃກ້ຊິດ, ປະເມີນສະຖານະການ ຢ່າງສະໝໍ່າສະເໝີ ເພື່ອວາງມາດຕະການໃຫ້ເຫມາະສົມ ແລະ ເຂົ້າກັບສະພາບການຢ່າງທັນເວລາ ເພື່ອຫລຸດຜ່ອນການ ເຈັບເປັນຂອງປະຊາຊົນ ແລະ ຈໍາກັດການແຜ່ລະບາດ ຂອງພະຍາດໃນຄັ້ງນີ້ ໃຫ້ຢູ່ໃນວົງແຄບ. ດັ່ງນັ້ນ, ຂ້າພະເຈົ້າ ຈຶ່ງຂໍຮຽກຮ້ອງມາຍັງສ່ວນບຸກ, ຄົນນິຕິບຸກຄົນ ແລະ ພາກສ່ວນ ຕ່າງໆໃນສັງຄົມ ທັງພາກລັດ ແລະ ເອກະຊົນ ຈົ່ງໃຫ້ການຮ່ວມມື ແລະ ປະຕິບັດຕາມມາດ ຕະການ ຕ່າງໆ ທີ່ທາງຄະນະສະເພາະກິດໄດ້ປະກາດອອກໄປແລ້ວນັ້ນຢ່າງເຂັ້ມງວດ.
ພ້ອມດຽວກັນ, ຂ້າພະເຈົ້າ ຂໍຖືໂອກາດນີ້ ຕາງຫນ້າໃຫ້ພັກ-ລັດ ແລະ ປະຊາຊົນລາວ ສະແດງຄວາມຮູ້ ບຸນຄຸນ ແລະ ຄວາມຂອບໃຈຢ່າງຈິງໃຈມາຍັງບັນດາປະເທດເພື່ອນມິດ ແລະ ອົງການຈັດຕັ້ງສາກົນຕ່າງໆ ທີ່ໄດ້ ໃຫ້ການຊ່ວຍເຫຼືອຢ່າງທັນການ ຕໍ່ພາລະກິດດັ່ງກ່າວນີ້ດ້ວຍ.

– ພີ່ນ້ອງຮ່ວມຊາດ ແລະ ເຊື້ອຊາດລາວ ທີ່ຮັກແພງທັງຫລາຍ
ຕໍ່ໜ້າສະພາບການດັ່ງທີ່ກ່າວມາຂ້າງເທິງນັ້ນ, ຂ້າພະເຈົ້າ ຈຶ່ງຂໍຮຽກຮ້ອງອີກເທື່ອໜຶ່ງມາຍັງພີ່ນ້ອງຮ່ວມຊາດ, ສະມາຊິກພັກ, ພະນັກງານ, ທະຫານ, ຕໍາຫລວດ ຈົ່ງພ້ອມກັນເພີ່ມທະວີຮັກສາມູນເຊື້ອ ຄວາມສາມັກຄີອັນເປັນປຶກແຜ່ນແໜ້ນໜາ, ຜ່ານຜ່າສະພາບຄວາມຫຍຸ້ງຍາກ ແລະ ສິ່ງທ້າທາຍທົດສອບ ໃນປັດຈຸບັນ, ສືບຕໍ່ເສີມຂະຫຍາຍຜົນສໍາເລັດອັນດີງາມ ແລະ ຕັ້ງໜ້າແກ້ໄຂຈຸດອ່ອນ ຂໍ້ຄົງຄ້າງໃນປີທີ່ຜ່ານມາໃຫ້ຫລຸດໜ້ອຍຖອຍລົງ; ພີ່ນ້ອງເຊື້ອຊາດລາວຢູ່ຕ່າງປະເທດ ຈົ່ງອວາຍໜ້າກັບມາຫາປະເທດບ້ານເກີດຂອງເຊື້ອເຜົ່າພົງພັນພວກເຮົາ ຮ່ວມກັບປະຊາຊົນໃນຊາດເພື່ອຮ່ວມກັນເຮັດໃຫ້ປະເທດຊາດ ທີ່ແສນຮັກຂອງພວກເຮົາ ມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ມີປະຊາທິປະໄຕ, ຍຸຕິທໍາ ແລະ ສີວິໄລ ຍິ່ງໆຂຶ້ນໄປ.
ຂໍອວຍພອນໃຫ້ປີໃໜ່ ປີຊວດ ພສ 2563 ນໍາເອົາໂຊກໄຊ, ຜົນສໍາເລັດໃໝ່ ແລະ ຄວາມຢູ່ເຢັນເປັນສຸກ ມາສູ່ປວງຊົນລາວທັງຊາດດ້ວຍເທີ້ນ.