ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດ ສະດີສູນກາງພັກປະຊາຊົນປະຕິວັດລາວ ພ້ອມຄະນະ ໄດ້ພົບປະສອງຝ່າຍ ກັບ ສະຫາຍ ຫງວຽນ ຊວນ ຖັງ ກຳມະການກົມການ ເມືອງສູນກາງພັກ ຫົວໜ້າສະຖາບັນການເມືອງການແຫ່ງຊາດ ໂຮ່ຈິມິນ ປະທານສະພາທິດສະດີສູນກາງພັກກອມມູນິດຫວຽດ ນາມ ພ້ອມຄະນະ ໃນວັນທີ 12 ກໍລະກົດນີ້ ທີ່ນະຄອນຫຼວງ ວຽງຈັນ ຊຶ່ງການພົບປະຄັ້ງນີ້ແມ່ນພາຍໃຕ້ກອບການເຄື່ອນໄຫວມາຢ້ຽມຢາມລັດຖະກິດຂອງ ສະຫາຍ ໂຕເລິມ ກຳມະການກົມ ການເມືອງສູນກາງພັກກອມມູນິດຫວຽດນາມ ປະທານປະເທດແຫ່ງ ສສ ຫວຽດນາມ ໃນລະຫວ່າງວັນທີ 11-12 ກໍລະກົດນີ້.
ສະຫາຍ ຄຳພັນ ເຜີຍຍະວົງ ໄດ້ແຈ້ງໃຫ້ຄະນະຜູ້ແທນຝ່າຍຫວຽດນາມຮັບຊາບໂດຍຫຍໍ້ກ່ຽວກັບ ການຈັດຕັ້ງປະຕິບັດ ແລະ ຜັນຂະຫຍາຍບົດບັນທຶກຮ່ວມມືທີ່ໄດ້ລົງນາມຂອງສອງສະພາທິດສະດີສູນກາງພັກ ໄລຍະ 2022-2026, ການກະກຽມຮ່າງເນື້ອໃນ ໂຄງການການເມືອງຂອງພັກປະຊາຊົນປະຕິວັດລາວ ແລະ ການກະກຽມຮ່າງລາຍງານການເມືອງຂອງກອງປະຊຸມໃຫຍ່ຄັ້ງທີ XII ຂອງພັກປະຊາຊົນປະຕິວັດລາວ. ໃນນັ້ນໄດ້ເນັ້ນໜັກເຖິງ 4 ວຽກທີ່ສຳຄັນຄື:ການຮ່ວມມືສຳມະນາທິດສະດີສອງພັກ, ການແລກປ່ຽນຫົວຂໍ້ຍ່ອຍກັບການນຳຂັ້ນສູງຂອງລາວ, ການແລກປ່ຽນຄະນະຜູ້ແທນຂອງສອງສະພາທິດສະດີ ແລະ ການຮ່ວມມືດ້ານວຽກງານຂ່າວສານທາງດ້ານທິດສະດີ. ພ້ອມນີ້, ກໍຍັງໃຫ້ຮູ້ຕື່ມອີກວ່າ: ຜ່ານການເຄື່ອນໄຫວພົວພັນຮ່ວມມື ກັບສະພາທິດສະດີສູນກາງພັກກອມມູນິດຫວຽດນາມ ໄດ້ເຮັດໃຫ້ບົດບາດຂອງສະພາທິດສະດີສູນກາງພັກປະຊາຊົນປະຕິວັດລາວ ນັບມື້ສູງຂຶ້ນ, ເປັນທີ່ຮູ້ຈັກ ແລະ ໄດ້ຮັບຄວາມເຊື່ອໝັ້ນຈາກອົງການຈັດຕັ້ງພັກ-ລັດ.
ສະຫາຍ ຫງວຽນ ຊວນ ຖັງ ກໍໄດ້ແຈ້ງໃຫ້ຊາບກ່ຽວກັບສະພາບການຈັດຕັ້ງປະຕິບັດບົດບັນທຶກການຮ່ວມມືລະຫວ່າງສອງສະພາທິດສະດີສູນກາງພັກ, ຕີລາຄາສູງຕໍ່ຜົນງານທີ່ທາງສະພາທິດສະດີສູນກາງພັກປະຊາຊົນປະຕິວັດລາວບັນລຸໄດ້ ແລະ ຢືນຢັນວ່າ: ສະພາທິດສະດີສູນກາງພັກກອມມູນິດຫວຽດນາມ ພ້ອມແລ້ວທີ່ຈະຊ່ວຍ, ແບ່ງປັນບົດຮຽນປະສົບການໃນການກະກຽມຮ່າງເນື້ອໃນໂຄງການການເມືອງຂອງພັກປະຊາຊົນປະຕິວັດລາວ, ຮ່າງລາຍງານການເມືອງຂອງກອງປະຊຸມໃຫຍ່ຄັ້ງທີ XII ຂອງພັກປະຊາຊົນປະຕິວັດລາວ, ຮ່າງສະຫຼຸບ 40 ປີ ແຫ່ງການປ່ຽນແປງໃໝ່ຂອງພັກປະຊາຊົນປະຕິວັດລາວ ຢ່າງຈິງໃຈ ແລະ ກົງໄປກົງມາ. ພ້ອມນີ້, ກໍຍັງໄດ້ເນັ້ນໃສ່ບາງເນື້ອໃນທີ່ສຳຄັນ ເພື່ອໃຫ້ສະພາທິດສະດີສູນກາງພັກປະຊາຊົນປະຕິວັດລາວ ຄົ້ນຄວ້າ, ທາບທາມໃນຂັ້ນຕອນການສືບຕໍ່ປັບປຸງຮ່າງໂຄງການການເມືອງ.
ໃນໂອກາດທ້າຍຂອງການພົບປະ, ທັງສອງຝ່າຍໄດ້ເຫັນດີເປັນເອກະພາບນຳກັນວ່າ: ກອງປະຊຸມສຳມະນາທິດສະດີລະຫວ່າງລາວ ແລະຫວຽດນາມ ຄັ້ງທີ 16 ແມ່ນຈະຈັດຂຶ້ນໃນອາທິດທີ 3 ເດືອນ ພະຈິກ 2024 ຢູ່ແຂວງຫຼວງພະບາງ, ສປປ ລາວ.
(ຂ່າວ: ສຸກສະຫວັນ, ພາບ-ຂໍ້ມູນ: ກອງເລຂາການນໍາ ຄອສພ)
