ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ປະທານສະພາຜູ້ແທນລາຊະດອນແຫ່ງ ສ. ເຊັກ ຢ້ຽມຢາມລາວຢ່າງເປັນທາງການ

ທ່ານ ຣາ ເດັກ ວອນ ດຣາ ເຊັກ, ປະທານສະພາຜູ້ແທນລາຊະດອນແຫ່ງ ສາທາລະນະລັດເຊັກ ພ້ອມດ້ວຍຄະນະເດີນທາງມາຢາມລາວຢ່າງເປັນທາງການ ລະຫວ່າງວັນທີ 19 ຫາ 22 ກຸມພາ ນີ້ .

ຄະນະຜູ້ແທນ ແຫ່ງ ສາທາລະນະລັດເຊັກ ເດີນທາງມາເຖິງນະຄອນຫລວງວຽງຈັນ ຕອນບ່າຍ ວັນທີ 19 ກຸມພາ  ແລະໄດ້ເຂົ້າວາງພວງມາລາ ຢູ່ອານຸສາວະລີ ນັກຮົບນິລະນາມ ເມື່ອເວລາ 8.30 ໂມງ ຂອງວັນທີ 20 ກຸມພາ 2020 ໂດຍການນໍາພາຂອງທ່ານ ເອກສະຫວ່າງ ວົງວິຈິດ ປະທານກໍາມະທິການຕ່າງປະເທດ ສະພາແຫ່ງຊາດ .

ພິທີຕ້ອນຮັບຢ່າງເປັນທາງການຈັດຂຶ້ນທີ່ ຫໍສະພາແຫ່ງຊາດ ເມື່ອເວລາ 8.40 ໂມງ, ຈາກນັ້ນໄດ້ເຂົ້າພົບສອງຝ່າຍກັບທ່ານນາງປານີ ຢາທໍຕູ້ ປະທານສະພາແຫ່ງຊາດ ພ້ອມດ້ວຍຄະນະ,ໃນໂອກາດນີ້ ປະທານສະພາແຫ່ງຊາດມີຄໍາເຫັນ ສະແດງຄວາມຍິນດີຕ້ອນຮັບພະນະທ່ານປະທານສະພາ ຜູ້ແທນລາຊະດອນ ແຫ່ງ ສາທາລະນະລັດ ເຊັກ ແລະ ຄະນະ ທີ່ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ຕາມການເຊື້ອເຊີນ. ການມາຢ້ຽມຢາມຄັ້ງນີ້ ຂອງພະນະທ່ານ ແລະ ຄະນະ ແມ່ນມີຄວາມໝາຍສໍາຄັນຍິ່ງ, ຖືໄດ້ວ່າເປັນຄັ້ງປະຫວັດສາດ ຂອງການຢ້ຽມຢາມແລກປ່ຽນລະຫວ່າງ ສອງອົງການນິຕິບັນຍັດ ນັບແຕ່ທັງສອງປະເທດພວກເຮົາ ໄດ້ສ້າງຕັ້ງສາຍພົວພັນການທູດ ໃນປີ 1962 ເປັນ ຕົ້ນມາ.

ການຢ້ຽມຢາມໃນຄັ້ງນີ້ ຈະເປັນການປະກອບສ່ວນສໍາຄັນ ເຂົ້າໃນການສືບຕໍ່ ເສີມຂະຫຍາຍ ສາຍພົວພັນມິດຕະພາບທີ່ເປັນມູນເຊື້ອ ລະຫວ່າງ ສປປ ລາວ ແລະ ສ. ເຊັກ ກໍຄື  ລະ ຫວ່າງ ສອງອົງການນິຕິບັນຍັດ ຂອງພວກເຮົາ ໃຫ້ມີການຂະຫຍາຍຕົວ ໃນທ່ວງທ່າໃໝ່. ສອງປະເທດພວກເຮົາ ເຖິງແມ່ນວ່າຈະຢູ່ໄກກັນ, ແຕ່ທັງສອງປະເທດມີຫລາຍອັນ ຄ້າຍຄືກັນ ຊຶ່ງພວກເຮົາສາມາດແລກປ່ຽນບົດຮຽນປະສົບການນໍາກັນ ເປັນຕົ້ນແມ່ນ ເປັນປະເທດ ທີ່ບໍ່ມີທາງອອກສູ່ທະເລ, ມີຊັບພະຍາກອນທຳມະ ຊາດ ແລະ ປ່າໄມ້ ທີ່ອຸດົມສົມບູນ ແລະ ອື່ນໆ. ພ້ອມນັ້ນ, ຄະນະຕິດຕາມ ມານໍາພະນະທ່ານປະທານ ຄັ້ງນີ້ ຍັງມີຜູ້ປະກອບການຈໍານວນໜຶ່ງ, ຫວັງວ່າ ການຢ້ຽມຢາມໃນຄັ້ງນີ້ ຈະເປັນໂອກາດທີ່ດີ ໃຫ້ແກ່ຜູ້ປະກອບທັງສອງປະເທດ ລາວ ແລະ ເຊັກ ໄດ້ຮ່ວມກັນປຶກສາຫາລື, ຊອກຫາໂອກາດໃນການຮ່ວມມືກັນ ດຳເນີນທຸລະກິດຕາມທ່າແຮງ ແລະ ຄວາມຕ້ອງການ ຂອງແຕ່ລະຝ່າຍ ເພື່ອປະກອບສ່ວນ ເຂົ້າໃນການເພີ່ມທະວີການຮ່ວມມື ທາງດ້ານເສດຖະກິດ-ການຄ້າ, ການລົງທຶນ, ການທ່ອງທ່ຽວ ໃຫ້ເປັນຮູບປະທຳເທື່ອລະກ້າວ.

ທ່ານ ຣາ ເດັກ ວອນ ດຣາ ເຊັກ ປະທານສະພາຜູ້ແທນລາຊະດອນ ສ. ເຊັກ ສະແດງຄວາມຂອບໃຈ ແລະປິຕິຊື່ນຊົມເປັນຢ່າງຍິ່ງທີ່ເຫັນວ່າ ໄລຍະຜ່ານມາ ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດລາວ-ເຊັກ ສືບຕໍ່ ໄດ້ຮັບການເສີມຂະຫຍາຍ, ຊຶ່ງນອກຈາກການແລກປ່ຽນສານອວຍພອນເຊິ່ງກັນ ແລະ ກັນໃນໂອກາດສໍາຄັນແລ້ວ, ຍັງໄດ້ມີການແລກປ່ຽນຢ້ຽມຢາມ ຂອງຄະນະຜູ້ແທນ ຂອງສອງປະເທດ ເປັນຕົ້ນແມ່ນ ການຢ້ຽມຢາມ ແລະ ເຂົ້າຮ່ວມກອງປະຊຸມອາເຊັມຄັ້ງທີ 9 ທີ່ ສປປ ລາວ ຂອງພະນະທ່ານ ວາ ຄລາບ ຄາວສ, ອາດີດ ປະທານາທິບໍດີແຫ່ງ ສ.ເຊັກ ໃນປີ 2012; ການຢ້ຽມຢາມເຮັດວຽກຢູ່ ສປປ ລາວ ຂອງທ່ານ ອີໂວ ບາເຣັກ, ຮອງປະທານສະພາສູງ ແລະ ຄະນະ ໃນເດືອນ ທັນວາ ປີ 2017 ແລະ ຄະນະອື່ນໆ.   ທ່ານ ສະເຫຼີມໄຊ ກົມມະສິດ, ລັດຖະມົນຕີ ກະຊວງການຕ່າງປະເທດ ກໍ່ໄດ້ພົບປະເຮັດວຽກ ກັບຄູ່ຮ່ວມຕໍາແໜ່ງຂອງ ສ.ເຊັກ ໃນໂອກາດ ເຂົ້າຮ່ວມກອງປະຊຸມ ລັດຖະມົນຕີຕ່າງປະເທດອາເຊັມ ຢູ່ປະເທດ ແອັດສະປາຍ ໃນປີ 2019 ຜ່ານມາ. ອັນພົ້ນເດັ່ນແມ່ນ ລັດຖະບານ ສາທາລະນະລັດ ເຊັກ ໄດ້ໃຫ້ການສະໜັບສະໜູນ ເງິນກູ້ຜ່ອນຜັນ ຮ່ວມກັບຄູ່ຮ່ວມພັດທະນາອື່ນໆ ແກ່ລັດຖະບານລາວ ເພື່ອກໍ່ສ້າງ ໂຮງໝໍມິດຕະພາບທັນສະໄໝ ຢູ່ນະຄອນຫຼວງວຽງຈັນ ຊຶ່ງມາຮອດປັດຈຸບັນ ໂຮງໝໍດັ່ງກ່າວ ໄດ້ເປີດໃຫ້ການບໍລິການ ແກ່ປະຊາຊົນແລ້ວ. ພ້ອມນັ້ນ, ສ.ເຊັກ ຍັງໄດ້ໃຫ້ການຊ່ວຍເຫຼືອລາວ ໃນການພັດທະນາຊັບພະຍາກອນມະນຸດ ແລະດ້ານອື່ນໆ. ຈາກນັ້ນ, ເວລາ 11.30ໂມງ ປະທານສະພາລາຊະດອນ ສ. ເຊັກ ໄດ້ເຂົ້າຢ້ຽມຄໍານັບ ທ່ານບຸນຍັງ ວໍລະຈິດ ປະທານປະເທດ .

ຈາກນັ້ນ, ຕອນບ່າຍມື້ດຽວກັນ  ຄະນະໄດ້ເຂົ້າພົບປະກັບ ທ່ານທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະ ທີ່ຫ້ອງວ່າການສໍານັກງານນາຍົກລັດຖະມົນຕີ, ພົບປະກັບລັດຖະມົນຕີກະຊວງຊັບພະຍາກອນ ທໍາມະຊາດ ແລະສິ່ງແວດລ້ອມ, ສ່ວນຕອນຄໍ່າ ຄະນະຜູ້ແທນຂັ້ນສູງສະພາຜູ້ແທນລາຊະດອນ ສ. ເຊັກ ເຂົ້າຮ່ວມງານລ້ຽງຕ້ອນຮັບຢ່າງເປັນທາງການ ຈັດໂດຍທ່ານນາງປານີ ຢາທໍຕູ້ ປະທານສະພາແຫ່ງຊາດລາວ.