ໃນວັນທີ 27 ພຶດສະພາ 2024 ນີ້, ສະຫາຍ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບຂອງ ສະຫາຍ ສຸຍເຄີລາຍທີ ຈາເຄີເອີ ຮອງປະທານສະພາຜູ້ແທນປະຊາຊົນທົ່ວປະເທດ ແຫ່ງ ສປ ຈີນ ພ້ອມຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ລະຫວ່າງວັນທີ 24-28 ພຶດສະພາ ນີ້.
ໃນໂອກາດນີ້, ສະຫາຍ ໄຊສົມພອນ ພົມວິຫານ ໄດ້ສະແດງຄວາມຍິນດີຕ້ອນຮັບ ສະຫາຍ ສຸຍເຄີລາຍທີ ຈາເຄີເອີ ພ້ອມດ້ວຍຄະນະ ທີ່ໄດ້ມາຢ້ຽມຢາມ ແລະ ເຮັດວຽກ ຢູ່ ສປປ ລາວໃນຄັ້ງນີ້ ເຊິ່ງເປັນການຈັດຕັ້ງຜັນຂະຫຍາຍ ເນື້ອໃນຈິດໃຈ ຂໍ້ຕົກລົງວ່າດ້ວຍການຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາຜູ້ແທນປະຊາຊົນທົ່ວປະເທດຈີນ ທີ່ໄດ້ລົງນາມຮ່ວມກັນ ໃນເດືອນກັນຍາ ປີ 2023 ຜ່ານມາ, ທັງເປັນການປະກອບສ່ວນ ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານ ຕາມທິດ 4 ດີ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ແລະ ການເປັນຄູ່ຮ່ວມຊະຕາກຳສັງຄົມນິຍົມ ລາວ-ຈີນ, ຈີນ-ລາວ ໃຫ້ນັບມື້ນັບຂະຫຍາຍຕົວ ແລະ ເກີດດອກອອກຜົນຍິ່ງຂຶ້ນ ນຳເອົາຜົນປະໂຫຍດມາສູ່ປະຊາຊົນສອງຊາດ ລາວ-ຈີນ. ພ້ອມທັງຖືໂອກາດນີ້, ຕີລາຄາສູງ ແລະ ສະແດງຄວາມຊົມເຊີຍ ຕໍ່ຜົນສຳເລັດອັນໃຫຍ່ຫລວງຮອບດ້ານທີ່ພັກ, ລັດ ແລະ ປະຊາຊົນຈີນ ອ້າຍນ້ອງຍາດມາໄດ້ຕະຫລອດໄລຍະຜ່ານມາ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XX ຂອງພັກຄອມມູນິດຈີນອັນມີ ສະຫາຍ ເລຂາທິການໃຫຍ່ ສີ ຈິ້ນ ຜິງ ເປັນແກນກາງ ແລະ ຊົມເຊີຍຕໍ່ບັນດາຂໍ້ລິເລີ່ມຕ່າງໆ ທີ່ ສະຫາຍເລຂາທິການໃຫຍ່ ສີ ຈິ້ນ ຜິງ ສະເໜີອອກ ໃນບໍ່ດົນຜ່ານມານີ້ ໂດຍສະເພາະແມ່ນ “ຂໍ້ລິເລີ່ມວ່າດ້ວຍ ອະລິຍະທຳທົ່ວໂລກ” ເປັນການປະກອບສ່ວນອັນສຳຄັນ ເຂົ້າໃນຂະບວນການຫັນເປັນທັນສະໄໝ ຂອງສັງຄົມມວນມະນຸດ ແລະ ຄວາມຈະເລີນຮຸ່ງເຮືອງທາງອາລິຍະທຳຂອງທົ່ວໂລກ, ຍູ້ແຮງສະໜັບສະໜູນ ຂໍ້ລິເລີ່ມວ່າດ້ວຍການພັດທະນາທົ່ວໂລກ ກໍຄື ຂໍ້ລິເລີ່ມ ໜຶ່ງແລວໜຶ່ງເສັ້ນທາງ ແລະ ຂໍ້ລິເລີ່ມວ່າດ້ວຍຄວາມໝັ້ນຄົງໃນທົ່ວໂລກ, ອັນຈະເຮັດໃຫ້ບົດບາດ ແລະ ອິດທິພົນຂອງ ສປ ຈີນ ນັບມື້ນັບສູງເດັ່ນຂຶ້ນໃນເວທີພາກພື້ນ ແລະ ສາກົນ.
ໂອກາດດຽວກັນ, ສະຫາຍ ສຸຍເຄີລາຍທີ ຈາເຄີເອີ ກໍໄດ້ສະແດງຄວາມຂອບໃຈຕໍ່ ສະຫາຍ ໄຊສົມພອນ ພົມວິຫານ ທີ່ໄດ້ຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງຖືໂອກາດນີ້ ລາຍງານຈຸດປະສົງໂດຍຫຍໍ້ ໃນການເດີນທາງມາຢ້ຽມຢາມ ແລະ ເຮັດໃຫ້ ຢູ່ ສປປ ລາວ ຄັ້ງນີ້, ໃຫ້ທ່ານປະທານສະພາແຫ່ງຊາດ ແຫ່ງ ສປປ ລາວ ຮັບຊາບອີກດ້ວຍ.
ຂ່າວ: ກິດຕາ
ພາບ: ອ່າຍຄຳ
