ງານວາງສະແດງສິນຄ້າຈີນ-ອາຊີໃຕ້ ຄັ້ງທີ 6 ແລະ ງານວາງສະແດງສິນຄ້ານຳເຂົ້າ ແລະ ສົ່ງອອກຄຸນໝິງຈີນ ຄັ້ງທີ 26 ໄຂຂຶ້ນຢູ່ນະຄອນຄຸນໝິງ, ແຂວງຢຸນນານ, ສປ ຈີນ ໃນຕອນເຊົ້າວັນທີ 19 ພະຈິກ 2022, ພາຍໃຕ້ຫົວຂໍ້ “ແບ່ງປັນໂອກາດ ໃຫມ່ ແລະ ຊອກຫາການພັດທະນາໃຫມ່”. ເຊີ່ງ ສປປ ລາວ ໄດ້ຮັບກຽດເປັນແຂກກິຕິມະສັກ ໂດຍການໃຫ້ກຽດເຂົ້າຮ່ວມຂອງ ທ່ານ ໄຊສົມພອນ ພົມວິຫານ, ປະທານສະພາແຫ່ງຊາດລາວ.
ນີ້ຖືເປັນຈັດງານວາງສະແດງສິນຄ້າຈີນ-ອາຊີໃຕ້ແບບເຊີ່ງຫນ້າຄັ້ງທໍາອິດນັບແຕ່ປີ 2018 ເປັນຕົ້ນມາ ເຊີ່ງເປັນງານວາງສະແດງສາກົນຮອບດ້ານລະດັບສູງທີ່ເຊື່ອມໂຍງເຂົ້າກັບດ້ານການຄ້າສາກົນ, ການເຈລະຈາການລົງທຶນ, ການທ່ອງທ່ຽວ ແລະ ການແລກປ່ຽນວັດທະນະທຳ, ທັງກາຍເປັນເວທີທີ່ສຳຄັນຂອງການພົວພັນທາງການທູດຫຼາຍຝ່າຍລະຫວ່າງຈີນ ກັບອາຊີໃຕ້-ອາຊີຕາາວັນອອກສ່ຽງໃຕ້ ແລະ ບັນດາປະເທດໃນໂລກ ເພື່ອສືບຕໍ່ເສີມຂະຫຍາຍຜົນປະໂຫຍດລະຫວ່າງຈີນກັບປະເທດຕ່າງໆທີ່ຕ່າງຝ່າຍຕ່າງມີຜົນປະໂຫຍດ ແລະ ຮັບໄຊຊະນະຮ່ວມກັນ.
ທ່ານ ໄຊສົມພອນ ພົມວິຫານ, ປະທານສະພາແຫ່ງຊາດລາວ ໄດ້ໃຫ້ກຽດກ່າວຄຳເຫັນຕໍ່ງານວາງສະແດງສິນຄ້າດັ່ງກ່າວ ໂດຍຜ່ານລະບົບອອນລາຍ ເຊີ່ງທ່ານໄດ້ສະແດງຄວາມຊົມເຊີຍຕໍ່ ສປ ຈີນ ທີ່ໄດ້ປະກອບສ່ວນເຂົ້າໃນການພັດທະນາເສດຖະກິດຂອງພາກພື້ນ ແລະ ໃນໂລກໃຫ້ມີຄວາມເຂັ້ມແຂງໂດຍຜ່ານການຈັດຕັ້ງປະຕິບັດຂໍ້ລິເລີ່ມຕ່າງໆ, ລວມເຖີງການເຄື່ອນໄຫວໃນຂອບສັນຍາການຄ້າເສລີຈີນ-ອາຊຽນ ເພື່ອແນໃສ່ຫລຸດຜ່ອນຄວາມແຕກໂຕນກັນດ້ານການພັດທະນາ ກໍຄື ການເຊື່ອມຈອດລະຫວ່າງຈີນກັບອາຊຽນ ແລະ ພາກພື້ນ.
ທ່ານກ່າວຕື່ມວ່າ: ຈີນ ເປັນຄູ່ຄ້າທີ່ໃຫຍ່ເປັນອັນດັບທີ 2 ຂອງ ສປປ ລາວ. ລວມຍອດການຄ້າສອງຝ່າຍເພີ່ມຂຶ້ນຢ່າງຕໍ່ເນື່ອງ, ສະເພາະປີ 2021 ຜ່ານມາ, ການຄ້າສອ“ຝ່າຍບັນ ລຸ 4,35 ຕື້ໂດລາສະຫະລັດ, ໃນນີ້ ລາວສົ່ງອອກປະທານ 2,68 ຕື້ໂດລາສະຫະລັດ. ການຮ່ວມມືສອງຝ່າຍພົນເດັ່ນໃນປີຜາານມາ ແມ່ນການເປີດນໍາໃຊ້ທາງດ່ວນວຽງຈັນ-ວັງວຽງ, ເປີດນໍາໃຊ້ໂຮງຫມໍທະໂຫສົດຫລັງໃຫມ່ ແລະ ການເປີດນໍາໃຊ້ທາງລົດໄຟ ລາວ-ຈີນ ເຊີ່ງເຮັດໃຫ້ລາວສາມາດເຊື່ອມຈອດກັບປະເທດໃນພາກພື້ນ ແລະ ປຽບດັ່ງສາຍນໍ້າເຊື່ອມຕໍ່ກັນຂອງແມ່ນໍ້າຂອງ-ແມ່ນໍ້າລ້ານຊ້າງ, ເປັນເສັ້ນ ທາງເຊື່ອມໄມຕຣີຈິດມິດຕະພາບຂອງປະຊາຊົນສອງຊາດລາວ-ຈີນແບບຮອບດ້ານ ເພື່ອສົ່ງເສີມການຮ່ວມມືດ້ານເສດຖະກິດ, ການຄ້າ-ການລົງທຶນ, ການທ່ອງທ່ຽວ, ການສ້າງວຽກເຮັດງານທໍາ, ການແລກປ່ຽນວັດທະນະທໍາ ແລະ ການໄປມາຫາສູ່ລະຫວ່າງສອງປະເທດລາວ-ຈີນ, ພ້ອມນີ້ ທ່ານຍັງໄດ້ເຊີນຊວນແຂກທີ່ເຂົ້າຮ່ວມງານຢ້ຽມຊົມງານວາງສະແດງສິນຄ້າຂອງລາວຈໍນວນຫນຶ່ງທີ່ຕາງຫນ້າບັນດາວິສາຫະກິດຈາກລາວເຂົ້າຮ່ວມງານວາງສະແດງຄັ້ງນີ້ ເພື່ອຮູ້ຈັກ ແລະ ສໍາຜັດຕົວຈິງກ່ຽວກັບສິນຄ້າທີ່ມີຄຸນນະພາບຈ່ກ ສປປ ລາວ
ງານວາງສະແດງສິນຄ້າຈີນ-ອາຊີໃຕ້ ຄັ້ງທີ 6 ແລະ ງານວາງສະແດງສິນຄ້ານຳເຂົ້າ ແລະ ສົ່ງອອກຄຸນໝິງຈີນ ຄັ້ງທີ 26 ຈະດຳເນີນໄປຮອດວັນທີ 22 ພະຈິກ 2022 ຈິ່ງຈະສໍາເລັດ. ພາຍໃນງານ ນອກຈາກມີການວາງສະແດງສິນຄ້າ ຍັງຈະຈັດເວທີປາໄສ ທັງຫມົດ 15 ຫົວຂໍ້ສໍາຄັນ ເປັນຕົ້ນ: ເວທີປາໄສຮ່ວມມືພັດທະນາພາກພື້ນຈີນ-ມະຫາສະໝຸດອິນເດຍ, ເວທີປາໄສການຮ່ວມມືການລົງທຶນການຄ້າສາ ກົນ RCEP, ເວທີປາໄສເປີດກວ້າງຊາຍແດນຍຸກໃໝ່ (2022), ເວທີປາໄສການພັດທະນາ ແລະ ປະດິດສ້າງໃຫມ່ການເຊື່ອມໂຍງການຄ້າພາຍໃນ ແລະຕ່າງປະເທດປີ 2022, ເວທີປາໄສການຮ່ວມມືຈີນ-ອາຊີໃຕ້ ຄັ້ງທີ 3, ເວທີປາໄສເຈົ້າແຂວງຂອງແລວເສດຖະກິດອະນຸພາກພື້ນແມ່ນ້ຳຂອງປີ 2022, ເວທີປາໄສວິສາຫະກິດຈີນ-ອາຊີໃຕ້ຄັ້ງທີ 15, ເວທີປາໄສຄັງປັນຍາການຄ້າຈີນ-ອາຊີໃຕ້-ອາຊີຕາເວັນອອກສ່ຽງໃຕ້ຄັ້ງທີ 8, ເວທີປຶກສາຫາລືວິສາຫະກິດຈີນ-ອາຊີຕາເວັນອອກສ່ຽງໃຕ້ຄັ້ງທີ 4 ແລະ ອື່ນໆ.
