ບັນດາທ່ານ ທີ່ນັບຖື,
ເນື່ອງໃນໂອກາດສະເຫລີມສະຫລອງ ຄົບຮອບ 47 ປີຂອງການສ້າງຕັ້ງສະມັດຊາລັດຖະສະພາລະຫວ່າງຊາດອາຊຽນ ຫລື ໄອປາ (AIPA) ນີ້, ໃນນາມປະທານສະພາແຫ່ງຊາດ ແຫ່ງ ສປປ ລາວ ແລະ ປະທານ AIPA, ຂ້າພະເຈົ້າ ຂໍສະແດງຄວາມຊົມເຊີຍຢ່າງສຸດໃຈຕໍ່ບັນດາ ທ່ານປະທານສະພາແຫ່ງຊາດ ແລະ ສະມາຊິກລັດຖະສະພາທັງໝົດ. ຂ້າພະເຈົ້າຮູ້ສຶກຍິນດີເປັນຢ່າງຍິ່ງທີ່ເຫັນວ່າ ຕະຫລອດໄລຍະ 47 ປີທີ່ຜ່ານມາ ໃນຖານະເປັນອົງການນິຕິບັນຍັດ ແລະ ຕົວແທນຂອງສິດ ແລະ ຜົນປະໂຫຍດຂອງປະຊາຊົນອາຊຽນ, AIPA ໄດ້ມີການເຕີບໂຕຢ່າງບໍ່ຢຸດຢັ້ງ ແລະ ມີບົດບາດສຳຄັນໃນການປະກອບສ່ວນຊຸກຍູ້ສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຂອງອາຊຽນ.
ປີນີ້, ສະພາແຫ່ງຊາດ ແຫ່ງ ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມ ສະມັດຊາໃຫຍ່ລະຫວ່າງຊາດອາຊຽນ (AIPA) ຄັ້ງທີ 45 ພາຍໃຕ້ຫົວຂໍ້: “ບົດບາດຂອງລັດຖະສະພາ ໃນການຊຸກຍູ້ການເຊື່ອມຈອດ ແລະ ການເຕີບໂຕແບບກວມລວມ ຂອງອາຊຽນ”. ຂ້າພະເຈົ້າເຊື່ອໝັ້ນວ່າ ບັນດາຜູ້ແທນ AIPA ຈະປຶກສາຫາລື ແລະ ແລກປ່ຽນຄຳຄິດເຫັນຢ່າງຈິງໃຈ ໃນການເສີມຂະຫຍາຍການພົວພັນ ແລະ ການຮ່ວມມືລະຫວ່າງລັດຖະສະພາສະມາຊິກ AIPA ໃຫ້ມີຄວາມເລິກເຊິ່ງ ເພື່ອປະຕິບັດແຜນແມ່ບົດກ່ຽວກັບການເຊື່ອມໂຍງອາຊຽນ 2025 ໂດຍຊຸກຍູ້ບົດບາດຂອງການຫັນເປັນດີຈິຕອນໃຫ້ເປັນເອກະພາບ, ການເຊື່ອມຕໍ່ໃນພາກພື້ນອາຊຽນ, ຊຸກຍູ້ການພັດທະນາ ແລະ ການເຊື່ອມໂຍງແບບຍືນຍົງ ເພື່ອຮັບປະກັນຜົນປະໂຫຍດສູງສຸດໃຫ້ປະຊາຊົນອາຊຽນຂອງພວກເຮົາ ໂດຍບໍ່ປະຖິ້ມໃຜໄວ້ຂ້າງຫລັງ.
ອີກເທື່ອໜຶ່ງ, ເນື່ອງໃນໂອກາດສະເຫລີມສະຫລອງນີ້, ຂ້າພະເຈົ້າຂໍອວຍພອນໄຊອັນປະເສີດມາຍັງບັນດາທ່ານປະທານສະພາ ແລະ ສະມາຊິກລັດຖະສະພາທັງໝົດ ຈົ່ງມີສຸຂະພາບແຂງແຮງ ແລະ ມີຜົນສໍາເລັດໃນໜ້າທີ່ວຽກງານ, ຂໍອວຍພອນໃຫ້ໄອປາ ຈົ່ງບັນລຸຈຸດປະສົງ ແລະ ເປົ້າໝາຍທີ່ວາງໄວ້ຢ່າງຈົບງາມ.
