ຂປລ. ໃນຕອນບ່າຍວັນທີ 28 ພຶດສະພາ 2021 ນີ້, ຢູ່ຫ້ອງປະຊຸມສະພາແຫ່ງຊາດ (ຫລັກ6) ໄດ້ຈັດກອງປະຊຸມທາງໄກ ລະຫວ່າງ ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດລາວ ແລະ ທ່ານ ລີ້ ຈານຊູ ກຳມະການຄະນະປະຈຳກົມການເມືອງສູນກາງພັກກອມມູນິດຈີນ, ປະທານຄະນະປະຈຳສະພາຜູ້ແທນປະຊາຊົນທົ່ວປະເທດຈີນ ໂດຍມີບັນດາຄະນະຜູ້ແທນສອງຝ່າຍ ເຂົ້າຮ່ວມ.
ການຈັດກອງປະຊຸມໃນຄັ້ງນີ້, ກໍເພື່ອປະກອບສ່ວນເຂົ້າໃນການຮັດແໜ້ນ ແລະ ເພີ່ມພູນຄູນສ້າງສາຍພົວພັນມິດຕະພາບ ທີ່ມມີມູນເຊື້ອອັນດີງາມ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ-ລາວ ບົນພື້ນຖານການພົວພັນແບບຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານ ຕາມທິດ 4 ດີ ແລະ ການຈັດຕັ້ງຜັນຂະຫຍາຍເນື້ອໃນຈິດໃຈແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກຳລາວ-ຈີນ ເຂົ້າສູ່ພາກປະຕິບັດຕົວຈິງໂດຍສະເພາະ ເພື່ອເປັນການສືບຕໍ່ເພີ່ມທະວີການຮ່ວມມື ລະ ຫວ່າງສອງອົງການນິຕິບັນຍັດ ໃຫ້ມີປະສິດທິຜົນ ແລະ ເປັນຮູບປະທຳຍິ່ງຂຶ້ນ.
ນອກຈາກນີ້, ກອງປະຊຸມໄດ້ແລກປ່ຽນຄຳຄິດຄຳເຫັນ ການຈັດຕັ້ງປະຕິບັດຂໍ້ຕົກລົງເປັນເອກະພາບທີ່ສຳຄັນ ຂອງການນຳຂັ້ນສູງສຸດຂອງສອງພັກ, ສອງລັດ ຂອງສອງປະເທດລາວ-ຈີນ, ລົງເລິກການແລກປ່ຽນ ແລະ ຖອດຖອນບົດຮຽນ ເຊິ່ງກັນ ແລະ ກັນ ລະຫວ່າງສະພາແຫ່ງຊາດລາວ ແລະ ສະພາຜູ້ແທນປະຊາຊົນທົ່ວປະເທດຈີນ, ການປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ສ້າງຄູ່ຮ່ວມຊາຕາກຳ ລາວ-ຈີນ ແລະ ບັນຫາອື່ນໆ ທີ່ມີຄວາມສົນໃຈຂອງສອງຝ່າຍ.
ຂ່າວ: ສຸກສະຫວັດ
ພາບ: ຂັນໄຊ
Loading...