ຕອນຍ່າຍ ວັນທີ 06 ພະຈິກ 2023, ທີ່ ນະຄອນຫຼວງວຽງຈັນ, ພະນະທ່ານ ໄຊສົມພອນ ພົມວິຫານ, ປະທານສະພາແຫ່ງຊາດລາວ ໄດ້ຕ້ອນຮັບການຢ້ຽມ ຢາມພົບປະຂອງ ພະນະທ່ານ ຄູເຣລສຸກຄ໌ໂອຄະນາ (UKHNAA KHURELSUKH),ປະທານາທິບໍດີແຫ່ງມົງໂກລີ, ໃນໂອກາດເດີນທາງມາຢ້ຽມ ຢາມລັດຖະກິດ ທີ່ ສປປ ລາວ ໃນລະຫວ່າງວັນທີ 5-6 ພະຈິກ 2023.
ໃນໂອກາດນີ້, ພະນະທ່ານ ໄຊສົມພອນ ພົມວິຫານ ໄດ້ຕີລາຄາສູງຕໍ່ການເດີນທາງມາຢ້ຽມຢາມ ສປປ ລາວ ຂອງຄະນະຜູ້ແທນຂັ້ນສູງມົງໂກລີ, ເຊິ່ງໄດ້ກາຍເປັນເຫດການທາງດ້ານປະຫວັດສາດອັນສຳຄັນອີກບາດກ້າວຫນຶ່ງແຫ່ງການພົວພັນ ລະຫວ່າງ ສປປ ລາວ – ມົງໂກລີ ຕະຫຼອດໄລຍະ 6 ທົດສະວັດຜ່ານມາ. ພ້ອມນີ້, ສອງຝ່າຍ ໄດ້ສະແດງຄວາມຍິນດີທີ່ເຫັນວ່າ ສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອທີ່ດີງາມລະຫວ່າງ.
ສປປ ລາວ-ມົງໂກລີ ກໍ່ຄື ການພົວພັນຮ່ວມມື ລະຫວ່າງ ສະພາແຫ່ງຊາດ ລາວ ແລະ ສະພາຄູຣານໃຫຍ່ ແຫ່ງ ມົງໂກລີ ແມ່ນໄດ້ຮັບການເສີມຂະຫຍາຍຂຶ້ນເປັນກ້າວໆມາ, ສະແດງອອກຄື ໄດ້ມີການພົບປະແລກປ່ຽນການຢ້ຽມຢາມຂອງບັນດາການນຳຂັ້ນສູງຂອງສອງປະເທດ, ການສະໜັບສະໜູນ ເເລະ ຊ່ວຍເຫຼືອເຊິ່ງກັນເເລະກັນໃນເວທີພາກພື້ນ ແລະ ສາກົນ. ພິເສດ, ໃນປີ 2022 ຜ່ານມາ ສອງຝ່າຍ ໄດ້ຮ່ວມກັນສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ມົງໂກລີ ຄົບຮອບ 60 ປີ (12 ກັນຍາ 1962 – 12 ກັນຍາ 2022)ໃຫ້ມີບັນຍາກາດຄຶກຄື້ນ ໂດຍການຈັດກິດຈະກຳຕ່າງໆ. ໃນຂະນະດຽວກັນ ຄະນະຜູ້ແທນຂັ້ນສູງຂອງສອງສະພາເເຫ່ງຊາດກໍ່ໄດ້ມີການແລກປ່ຽນການຢ້ຽມຢາມເຊິ່ງກັນແລະກັນ ພ້ອມທັງໄດ້ມີການລົງນາມບົດບັນທຶກຄວາມເຂົ້າໃຈຮ່ວມກັນ ລະຫວ່າງ ສະພາແຫ່ງຊາດ ລາວ ແລະ ສະພາຄູຣານໃຫຍ່ ມົງໂກລີ ເພື່ອສົ່ງເສີມການຮ່ວມມືໃນຂົງເຂດວຽກງານສະພາ ໃນໄລຍະປີ 2023-2028. ພ້ອມດຽວກັນນີ້, ສອງຝ່າຍ ກໍ່ໄດ້ຕີລາຄາສູງຕໍ່ການຮ່ວມມືໃນຂົງເຂດການສຶກສາ,ສາທາລະນະສຸກແລະກະສິກຳ-ລ້ຽງສັດ;ໃນນີ້ ລັດຖະບານມົງໂກລີໄດ້ໃຫ້ທຶນການສຶກສາແກ່ ສປປ ລາວໃນແຕ່ລະປີ ໂດຍສະເພາະ ໃນປີ 2022, ທ່ານປະທານາທິບໍດີ ມົງໂກລີ ໄດ້ໃຫ້ທຶນຕື່ມອີກ 5 ທຶນ,ໄດ້ປຸກສ້າງແລະ ສ້ອມແປງໂຮງໝໍມິດຕະພາບລາວ-ມົງໂກ ລີຢູ່ແຂວງຊຽງຂວາງພ້ອມທັງ ໄດ້ສົ່ງຊ່ຽວຊານ ແພດໝໍມາປະຈໍາຢູ່ລາວ ແລະໄດ້ມອບແກະຈໍານວນ 1.050 ໂຕໃຫ້ແກ່ລັດຖະບານລາວ.
ໃນໂອກາດນີ້, ພະນະທ່ານປະທານສະພາແຫ່ງຊາດ ໄຊສົມພອນ ພົມວິຫານ ໄດ້ສະແດງຄວາມຂອບໃຈຢ່າງສູງຕໍ່ການຊ່ວຍເຫຼືອຂອງ ລັດຖະບານ ແລະ ປະຊາຊົນ ມົງໂກລີ ຕະຫຼອດໄລຍະຜ່ານມາ, ເຊິ່ງໄດ້ປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ, ພ້ອມທັງໄດ້ແຈ້ງໃຫ້ຊາບວ່າ ສປປ ລາວ ຈະເປີດປີທ່ອງທ່ຽວລາວ ໄປພ້ອມດຽວກັນກັບການເປັນປະທານອາຊຽນ ເເລະ ເຈົ້າພາບກອງປະຊຸມລັດຖະສະພາ ລະຫວ່າງປະເທດອາຊຽນ ຫລືAIPAຄັ້ງທີ 45 ໃນປີ 2024 ທີ່ຈະມີເຖິງນີ້, ເຊິ່ງຈະເປັນໂອກາດດີ ໃນການສົ່ງເສີມການຮ່ວມມືໃນຂົງເຂດສະພາ, ການທ່ອງທ່ຽວ ແລະ ການໄປມາຫາສູ່ກັນຂອງປະຊາຊົນສອງຊາດ ໃຫ້ຫຼາຍຂຶ້ນ.
ໂອກາດດຽວກັນ, ພະນະທ່ານ ປະທານາທິບໍດີຄູເຣລສຸກຄ໌ໂອຄະນາກໍ່ໄດ້ສະແດງຂອບໃຈ ແລະ ຍິນດີຈະຊຸກຍູ້ໃຫ້ພາກສ່ວນກ່ຽວຂ້ອງຂອງຕົນ ສືບຕໍ່ປະສານສົມທົບກັບຝ່າຍລາວ ຢ່າງໃກ້ຊິດ ເພື່ອຂະຫຍາຍການຮ່ວມມືໃນຂະແໜງອື່ນໆທີ່ມີທ່າແຮງຮ່ວມກັນ ໃຫ້ຫຼາຍຂຶ້ນໃນຕໍ່ຫນ້າ ໂດຍສະເພາະການຂົນສົ່ງຜ່ານເສັ້ນທາງລົດໄຟ ລາວ-ຈີນ ແລະ ໄດ້ອວຍພອນໃຫ້ສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອທີ່ດີທີງາມ ລະຫວ່າງ ມົງໂກລີ – ສປປ ລາວ ຈົ່ງໄດ້ຮັບການເພີ່ມພູນຄູນສ້າງຍິ່ງຂຶ້ນ ແລະ ນຳເອົາຫມາກຜົນຕົວຈິງມາສູ່ປະຊາຊົນສອງປະເທດ ໃນອະນາຄົດ.
ຮູບພາບ: ໄອຄຳ
