ໃນວັນທີ 11 ກໍລະກົດ 2024, ທີ່ ໂຮງແຮມ ຄລາວພລາຊາ, ສະຫາຍ ບັນດິດ ສຈ. ບໍ່ວຽງຄໍາ ວົງດາລາ, ກຳມະການສູນກາງພັກ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ, ປະທານສະມາຄົມມິດຕະພາບ ລາວ-ຫວຽດນາມ ຂັ້ນສູນກາງ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສະຫາຍ ໂຕ ເລິມ, ປະທານປະເທດ ແຫ່ງ ສສ ຫວຽດນາມ, ໃນໂອກາດເດີນທາງມາຢ້ຽມຢາມທາງລັດຖະກິດ ຢູ່ ສປປ ລາວ ໃນວັນທີ 11-12 ກໍລະກົດ 2024.
ໃນໂອກາດນີ້, ສະຫາຍ ບັນດິດ ສຈ. ບໍ່ວຽງຄໍາ ວົງດາລາ ໄດ້ສະແດງຄວາມຂອບໃຈຕໍ່ ສະຫາຍ ປະທານປະເທດ ໂຕ ເລິມ ທີ່ສະຫຼະເວລາ ໃຫ້ຄະນະບໍລິຫານງານສະມາຄົມມິດຕະພາບ ລາວ-ຫວຽດນາມ ຂັ້ນສູນກາງ ເຂົ້າຢ້ຽມຂໍ່ານັບ ແລະ ໄດ້ສະແດງຄວາມຊົມເຊີຍຕໍ່ ສະຫາຍ ໂຕ ເລິມ ທີ່ໄດ້ຮັບຄວາມໄວ້ວາງໃຈໃຫ້ດໍາລົງຕໍາແໜ່ງເປັນ ປະທານປະເທດ ແຫ່ງ ສສ ຫວຽດນາມ, ພ້ອມທັງໄດ້ຕີລາຄາສູງຕໍ່ການເດີນທາງຢ້ຽມຢາມຄັ້ງນີ້, ຊຶ່ງເປັນການປະກອບສ່ວນສຳຄັນ ເຂົ້າໃນການຮັດແໜ້ນສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ໄດ້ຮັບການເສີມຂະຫຍາຍ ແລະ ກ້າວເຂົ້າສູ່ລວງເລິກຢ່າງບໍ່ຢຸດຢັ້ງ. ໃນໂອກາດດັ່ງກ່າວ, ສະຫາຍ ປະທານສະມາຄົມມິດຕະພາບ ລາວ-ຫວຽດນາມ ໄດ້ລາຍງານການເຄື່ອນໄຫວຂອງ ສະມາຄົມມິດຕະພາບ ລາວ-ຫວຽດນາມ ກໍຄືການພົວພັນຮ່ວມມືກັບສະມາຄົມມິດຕະພາບ ຫວຽດນາມ-ລາວ ໃນໄລຍະຜ່ານມາ, ສອງສະມາຄົມມິດຕະພາບ ມີການພົບປະແລກປ່ຽນ, ຢ້ຽມຢາມເຊິ່ງກັນ ແລະ ກັນ ແລະ ຈັດກິດຈະກໍາຮ່ວມກັນ ເນື່ອງໃນໂອກາດວັນສໍາຄັນຕ່າງໆຂອງພັກ ແລະ ຂອງສອງປະເທດ ຢ່າງເປັນປົກກະຕິ ເພື່ອໂຄສະນາເຜີຍແຜ່, ສຶກສາອົບຮົມ ໃຫ້ປະຊາຊົນລາວ ແລະ ຫວຽດນາມ ໄດ້ຮັບຮູ້ ແລະ ເຂົ້າໃຈເລິກເຊິ່ງ ກ່ຽວກັບມູນເຊື້ອສາຍພົວພັນພິເສດລາວ-ຫວຽດນາມ ແລະ ໃນຕໍ່ໜ້າ ສະມາຄົມມິດຕະພາບ ລາວ-ຫວຽດນາມ ຈະ ປະສານສົມທົບ ແລະ ຮ່ວມມືກັບສະມາຄົມມິດຕະພາບ ຫວຽດນາມ-ລາວ ສືບຕໍ່ປະຕິບັດພາລະບົດບາດໃນການເຜີຍແຜ່ຂໍ້ມູນຂ່າວສານ, ຄວາມເປັນຈິງກ່ຽວກັບມູນເຊື້ອສາຍພົວພັນ ລາວ-ຫວຽດນາມ ໃຫ້ແກ່ປະຊາຊົນຂອງສອງປະເທດ ໂດຍສະເພາະຄົນລຸ້ນໃໝ່ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ເພື່ອໃຫ້ເຂົາເຈົ້າມີຄວາມຮັບຜິດຊອບ ແລະ ເປັນເຈົ້າການປົກປັກຮັກສາ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານຂອງສອງປະເທດ ໃຫ້ຂຽວສົດງົດງາມ, ເກີດດອກອອກຜົນ ແລະ ໝັ້ນຄົງທະໜົງແກ່ນຕະຫຼອດຊົ່ວກາລະນານ.
ໃນໂອກາດດຽວກັນ, ສະຫາຍ ປະທານປະເທດ ແຫ່ງ ສສ ຫວຽດນາມ ກໍໄດ້ສະແດງຄວາມຊົມເຊີຍຕໍ່ໝາກຜົນຂອງການເຄື່ອນໄຫວ ແລະ ການຮ່ວມມື ລະຫວ່າງ ສອງສະມາຄົມມິດຕະພາບ ລາວ-ຫວຽດນາມ, ຫວຽດນາມ-ລາວ ໃນໄລຍະຜ່ານມາ ພ້ອມທັງໄດ້ຊີ້ທິດເຍືອງທາງໃຫ້ແກ່ສອງສະມາຄົມ ຈົ່ງສືບຕໍ່ປະສານສົມທົບກັນຢ່າງໃກ້ຊິດ ເພື່ອຮ່ວມກັນເຄື່ອນໄຫວໃຫ້ມີປະສິດທິພາບ ແລະ ປະສິດທິຜົນຂຶ້ນຕື່ມ ເພື່ອປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງ ສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສປປ ລາວ ແລະ ສສ ຫວຽດນາມ ໃຫ້ນັບມື້ກ້າວເຂົ້າສູ່ທາງກວ້າງ ແລະ ລວງເລິກ ຢ່າງບໍ່ຢຸດຢັ້ງ.
#ກົມການຂ່າວ, ກະຊວງການຕ່າງປະເທດ
#ພາບ: ອ່າຍຄໍາ
