ປະທານສູນກາງສະຫະພັນກໍາມະບານລາວ ຊຸກຍູ້ວຽກງານກໍາມະບານຢູ່ບໍລິສັດ ຊິໂນ – ອາກຣີ ໂປຕາສ ຈໍາກັດ.

 ໃນວັນທີ 27 ເມສາ 2023 ທ່ານ ນາງ ອາລີ ວົງໜໍ່ບຸນທໍາ ປະທານຄະນະບໍລິຫານງານສູນກາງສະຫະພັນກໍາມະບານລາວ ພ້ອມຄະນະ ໄດ້ຢ້ຽມຢາມ ແລະ ຊີ້ນໍາ ວຽກງານຢູ່ ບໍລິສັດ ຊິໂນ – ອາກຣີ ໂປຕາສ ຈຳກັດ ທີ່ບ້ານດົງໃຕ້ ເມືອງທ່າແຂກ ໂດຍມີ ທ່ານ ໂຕເຊິນ ອຸທັດສີ ປະທານສະຫະພັນກໍາມະບານແຂວງ ຄໍາມ່ວນ ພ້ອມດ້ວຍຄະນະ ຮ່ວມຕິດຕາມ.

      ໂດຍໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ຈູ່ຊຽງລີ້ ຮອງຜູ້ອໍານວຍການ ບໍລິສັດ ຊີໂນ-ອາກຣີ ໂປຕາສ ຈໍາກັດ, ໂອກາດນີ້ ທ່ານປະທານສູນກາງສະຫະພັນກໍາມະບານລາວໄດ້ຮັບຟັງການລາຍງານຫຍໍ້ກ່ຽວກັບສະພາບໂດຍລວມຂອງ ບໍລິ ສັດ ຊີໂນ-ອາກຣີ ໂປຕາສ ຈໍາກັດ ໂດຍສະເພາະຄວາມເປັນມາ, ການຈັດຕັ້ງປະຕິບັດວຽກງານ ແລະ ແຜນພັດທະນາການດຳເນີນທຸລະກິດໃນຕໍ່ໜ້າ, ການກໍ່ສ້າງນິຄົມອຸດສາຫະກຳໝູນວຽນອັດສະລິຍະ, ຄວາມຄືບໜ້າໂຄງການຝຸ່ນໂປຕາສ ລວມເຖິງການມອບພັນທະຕ່າງໆ ໃຫ້ລັດຖະບານ, ການປະກອບສ່ວນທາງສັງຄົມ, ການຊຸກຍູ້ສ້າງວຽກເຮັດງານທໍາແກ່ທ້ອງຖິ່ນ ແລະ ອື່ນໆ ເຊິ່ງບໍລິສັດດັ່ງກ່າວໄດ້ດໍາເນີນທຸລະກິດຢູ່ລາວເປັນເວລາ 14 ປີ ເປັນບໍລິສັດໜຶ່ງທີ່ມີການລົງທຶນຂະໜາດໃຫຍ່ດ້ານການຂຸດຄົ້ນແຮ່ໂປຕາສຢູ່ປະເທດລາວ. ໃນປີ 2022 ໄດ້ສຳເລັດການກໍ່ສ້າງໂຄງການຝຸ່ນໂປຕາສ ຂະໜາດ 1 ລ້ານໂຕນຕໍ່ປີ ແຫ່ງທີ 2 ແລະ ໄດ້ເປີດທົດລອງຜະລິດໃນວັນທີ 1 ມັງກອນ 2023 ເຊິ່ງກາຍເປັນໂຄງການເກືອໂປຕາສ ທີ່ໃຫຍ່ທີ່ສຸດໃນອາຊຽນໃນປັດຈຸບັນ. ປະຈຸບັນມີພະນັກງານທັງໝົດ 4.061 ຄົນ, ພະນັກງານຄົນລາວກວມ 60% ໃນນັ້ນພະນັກງານທີ່ເປັນຄົນແຂວງ ຄໍາມ່ວນກວມເອົາແຮງງານລາວ 77%.  ພ້ອມນີ້ ທາງສູນກາງສະຫະພັນກໍາມະບານລາວ ຍັງໄດ້ມີຄໍາຖາມແລກປ່ຽນມາຍັງບໍລິສັດ : ການສ້າງຕັ້ງການຈັດຕັ້ງກໍາມະບານຢູ່ບໍລິສັດ, ດ້ານສະຫວັດດີການໃນການຄຸ້ມຄອງ, ຄ່າຕອບແທນດ້ານຕ່າງໆ ຂອງແຮງງານລາວ, ການຊຸກຍູ້ຊ່ວຍເຫລືອກໍາມະກອນໃນການເຮັດວຽກ ແລະ ການຄຸ້ມຄອງທາງດ້ານສິ່ງແວດ ລ້ອມຂອງບໍລິສັດ.

    ໂອກາດນີ້ ທ່ານ ນາງ  ອາລີ ວົງໜໍ່ບຸນທໍາ ຍັງໄດ້ ມີຄຳເຫັນເນັ້ນໃຫ້ບໍລິສັດຈົ່ງໄດ້ສືບຕໍ່ໃນການຄຸ້ມຄອງແຮງງານລາວ ເອົາໃຈໃສ່ ສຶກສາອົບຮົມຊ່ວຍໃຫ້ເຂົາເຈົ້າໄດ້ຮຽນຮູ້,  ຝຶກອົບຮົມຍົກລະດັບດ້ານເຕັກນິກ, ດ້ານວິຊາສະເພາະຕ່າງໆ ໃຫ້ແກ່ກໍາມະກອນລາວໃຫ້ມີຄຸນນະພາບ, ສ້າງເງື່ອນໄຂເຮັດແນວໃດໃຫ້ກໍາມະກອນຮັກອາຊີບຂອງຕົນ ແລະ ການປະຕິບັດນະໂຍບາຍດ້ານອື່ນໆ, ສືບຕໍ່ສົມທົບຂະແໜງການກ່ຽວຂ້ອງສ້າງຕັ້ງໜ່ວຍກໍາມະບານລາວ ພາຍໃນບໍລິສັດ ເພື່ອເກັບກໍາຂຶ້ນທະບຽນກໍາມະກອນຂອງຕົນ ທັງນີ້ກໍ່ເພື່ອແນໃສ່ໃນການຄຸ້ມຄອງແຮງງານລາວໃຫ້ເປັນລະບົບຖຶກຕ້ອງຕາມລະບຽບກົດໝາຍ ແລະ ເຫັນໄດ້ຄວາມສໍາຄັນຂອງວຽກງານກໍາມະບານໃນການປົກປ້ອງສິດ ແລະ ຜົນປະໂຫຍດອັນຊອບທໍາຂອງສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານ. ຈາກນັ້ນຄະນະ ດັ່ງກ່າວຍັງໄດ້ຢ້ຽມຊົມຜະລິດຕະພັນຝຸ່ນໂປຕາສ ແລະ ເລາະເບິ່ງຄວາມຄືບໜ້າໂຄງການຕົວເມືອງນ້ອຍ ອັດສະລິຍະ ຂອງເຂດ(ເມືອງ)ພາຍໃນນິຄົມອຸດສາຫະກຳ ອີກດ້ວຍ.