ຕອນເຊົ້າຂອງວັນທີ 24 ມີຖຸນາ 2021 ນີ້ ທ່ານ ຮຈ ດຣ ພູທອນ ເມືອງປາກ ປະທານອົງການກາແດງລາວ ໄດ້ຕ້ອນຮັບການເຂົ້າຢ້ຽມຢາມຂອງ ທ່ານ ວີເຈ ມັດດາວັນ ຜູ້ອຳນວຍການໃຫຍ່ ບໍລິສັດພຣູເດັນໂຊປະກັນຊີວິດ(ລາວ) ຈຳກັດ ແລະຄະນະ.
ປະທານອົງການກາແດງລາວໄດ້ສະແດງຄວາມຕ້ອນຮັບຢ່າງອົບອຸ່ນຕໍ່ການເຂົ້າຢ້ຽມຢາມໃນຄັ້ງນີ້ ເຊິ່ງເປັນການເສີມສ້າງສາຍພົວພັນ ແລະ ການປະກອບສ່ວນຊ່ວຍເຫຼືອປະຊາຊົນລາວ ແຕ່ປີ 2018 ເປັນຕົ້ນມາ ຈົນເຖິງປັດຈຸບັນ ເປັນຕົ້ນປະກອບສ່ວນໃນວຽກງານມະນຸດສະທຳ ແລະໄດ້ແຈ້ງກຽ່ວກັບການຈັດຕັ້ງປະຕິບັດວຽກງານຂອງອົງການກາແດງລາວ ເຊິ່ງປະຈຸບັນ ອົງການກາແດງລາວໄດ້ປັບປຸງແຜນຍຸດທະສາດ ເພື່ອໃຫ້ແທດເຫມາະກັບແຜນພັດທະນະເສດຖະກິດ ສັງຄົມຂອງລັດຖະບານ ເພື່ອຮອງຮັບເອົາການພັດທະນາ ແລະການຊ່ວຍເຫລືອຈາກສາກົນ ແລະວຽກງານປະຖົມພະຍາບານ, ວຽກງານກູ້ໄພສຸກເສີນ ແລະ ວຽກງານຊ່ວຍເຫຼືອບັນເທົາທຸກ ເຊິ່ງເປັນວຽກງານທີ່ຈຳເປັນ ເຊິ່ງໄລຍະຜ່ານມາບໍລິສັດດັ່ງກ່າວໄດ້ໃຫ້ການສະໜັບສະໜູນແກ່ອົງການກາແດງລາວເປັນຕົ້ນ ຊ່ວຍເຫຼືອບັນເທົາທຸກແກ່ປະຊາຊົນທີ່ຖືກຜົນກະທົບຈາກໄພນ້ຳຖ້ວມຢູ່ 4 ແຂວງພາກໃຕ້, ສະໜອງປະກັນໄພຊີວິດໃຫ້ແກ່ອາສາສະໝັກກູ້ໄພ, ພະນັກງານສູນເລືອດ ທີ່ເຮັດວຽກຕ້ານການແຜ່ລະບາດພະຍາດໂຄວິດ19.
ພ້ອມກັນນັ້ນ ສອງຝ່າຍຍັງໄດ້ປຶກສາຫາລື ໃນການຮ່ວມມືສອງຝ່າຍໃນຕໍ່ໜ້າ ເຊິ່ງບໍລິສັດພຣູເດັນໂຊປະກັນຊີວິດ(ລາວ) ຈຳກັດ ຈະໃຫ້ການຊ່ວຍເຫຼືອບັນເທົາທຸກໃຫ້ແກ່ປະຊາຊົນທີ່ປະສົບໄພນ້ຳຖ້ວມຢູ່ແຂວງໄຊຍະບູລີ ດ້ານສະບຽງອາຫານມູນຄ່າ 30ລ້ານກີບ
ໃນຕອນທ້າຍທ່ານປະທານອົງການກາແດງລາວໄດ້ສະແດງຄວາມຂອບໃຈ ແລະ ຊົມເຊີຍຜູ້ອຳນວຍການໃຫຍ່ ບໍລິສັດພຣູເດັນໂຊປະກັນຊີວິດ(ລາວ) ທີ່ໄດ້ໃຫ້ການຊ່ວຍເຫຼືອ ສປປ ລາວ ພ້ອມທັງສະເໜີໃຫ້ບໍລິສັດດັ່ງກ່າວສະໜັບສະໜູນວຽກງານຂອງອົງການກາແດງລາວຕໍ່ໄປ.
ໂດຍ:ນັກຂ່າວສະພາກາແດງລາວ
Loading...