ຕອນເຊົ້າວັນທີ 11ມີຖຸນາ 2021, ທີ່ອົງການກາແດງລາວສູນກາງ ທ່ານ ຮຈ.ດຣ. ພູທອນ ເມືອງປາກ ປະທານອົງການກາແດງລາວ ພ້ອມດ້ວຍຄະນະໄດ້ເຂົ້າຮ່ວມກອງປະຊຸມແບບທາງໄກ ກັບ ທ່ານ ນາງ ເຄຣທີນ ຄຼາກຊັນ ຫົວໜ້າສະຫະພັນກາແດງ ແລະ ຊີກວົງເດືອນແດງສາກົນ ແລະບັນດາກາແດງປະເທດຕ່າງໆ ເພື່ອສະແດງຄວາມຍ້ອງຍໍຊົມເຊີຍຕໍ່ການມາຮັບໜ້າທີ່ໃຫມ່ຂອງປະທານອົງການກາແດງລາວເຊິ່ງຈະເປັນການສືບຕໍ່ໃນການພັດທະນາວຽກງານກາແດງ.
ໃນໂອກາດດັງກ່າວປະທານອົງການກາແດງລາວ ໄດ້ແລກປ່ຽນຄຳຄິດຄຳເຫັນ ແລະສົນທະນາປຶກສາຫາລືແຜນການຮ່ວມມື ແລະການປະຕິບັດວຽກງານຮ່ວມກັນໃນຕໍ່ຫນ້າ, ເພື່ອກຳນົດເປັນວຽກບູລິມະສິດເປົ້າຫມາຍ ແລະໂຄງການເພື່ອຈັດຕັ້ງປະຕິບັດໂຄງການໃນຕໍ່ຫນ້າ, ປັບປຸງແຜນຍຸດທະສາດ2021-2030, ແຜນການຈັດຕັ້ງປະຕິບັດໄລຍະ 5 ປີ ແລະ 1 ປີ ຂອງອົງການກາແດງລາວ , ເພື່ອຮອງຮັບເອົາການຊ່ວຍເຫລືອ ແລະການພັດທະນາກັບເງື່ອນໄຂໃນປະຈຸບັນ ແລະແທດເຫມາະກັບແຜນພັດທະນາຂອງລັດຖະບານທີ່ກຳນົດໄວ້ໃຫ້ປະກົດຜົນເປັນຈິງ. ນອກຈາກນັ້ນ ສະຫະພັນກາແດງ ແລະ ຊີກວົງເດືອນແດງ ສາກົນຍັງໄດ້ຢືນຢັນ ຈະສືບຕໍ່ໃຫ້ການຊ່ວຍເຫຼືອແກ່ອົງການກາແດງລາວໃນຫລາຍດ້ານເຊັ່ນ: ດ້ານເຕັກນິກວິຊາການ ແລະ ທຶນຮອນເພື່ອປະກອບສ່ວນເຂົ້າໃນບັນດາຂົງເຂດວຽກງານຫ້າງຫາກະກຽມຕອບໂຕ້ໄພພິບັດ, ວຽກງານສະໜອງນ້ຳສະອາດໃນເວລາເກີດເຫດສຸກເສີນ, ວຽກງານສົ່ງເສີມສຸຂະອານາໄມ, ວຽກງານສ້າງຂີດຄວາມສາມາດໃຫ້ແກ່ອົງການ, ວຽກງານປ້ອງກັນ ແລະ ສະກັດກັນການແຜ່ລະບາດຂອງພະຍາດໂຄວິດ-19 ນັບທັງການຂົນຂວາຍສະໜອງວັກຊິນໂຄວິດ-19 ໃຫ້ແກ່ອົງການກາແດງລາວເພື່ອມອບຕໍ່ໃຫ້ກະຊວງສາທາລະນະສຸກ ຂອງລາວ.ໄປຈັດຕັ້ງປະຕິບັດ.
Loading...