ລະຫວ່າງວັນທີ 22-23 ກໍລະກົດ 2021 ນີ້ ທ່ານ ຮສ ດຣ ພູທອນ ເມືອງປາກ ປະທານອົງການກາແດງລາວ ພ້ອມດ້ວຍຄະນະໄດ້ເຄື່ອນໄຫວຢ້ຽມຢາມຊຸກຍູ້ວຽກງານກາແດງທີ່ແຂວງຜົ້ງສາລີ, ໂດຍໄດ້ເຂົ້າພົບທ່ານ ຄຳຜອຍ ວັນນະສານ ເຈົ້າແຂວງຜົ້ງສາລີ ເພື່ອລາຍງານການຈັດຕັ້ງປະຕິບັດວຽກງານກາແດງ ໃນການຊ່ວຍເຫລືອປະຊາຊົນຜູ້ທຸກຍາກພາຍໃນແຂວງໃຫ້ທ່ານເຈົ້າແຂວງຊາບແລະຂໍທິດທາງໃນການຈັດຕັ້ງປະຕິບັດໃນຕໍ່ຫນ້າໃຫ້ສຳເລັດຕາມແຜນການ ເປັນຕົ້ນແມ່ນລະດົມຂົນຂວາຍໃນການປະກອບສ່ວນເຂົ້າໃນວຽກງານເລືອດ, ການຊອກຫາແຫຼ່ງທຶນ, ການໂຄສະນາທີ່ຕັ້ງ, ພາລະບົດບາດ, ສິດ ແລະ ໜ້າທີ່ໃຫ້ສັງຄົມຮັບຮູ້ ແລະຊ່ວຍປະສານງານກັບບັນດາຂະແໜງການຕ່າງໆອ້ອມຂ້າງແຂວງໃຫ້ມີສ່ວນຮ່ວມໃນວຽກງານຂອງອົງການກາແດງ.
ໂອກາດນີ້ ທ່ານເຈົ້າແຂວງໄດ້ສະແດງຄວາມຕ້ອນຮັບຢ່າງອົບອຸ່ນ ພ້ອມທັງຕີລາຄາສູງໃນການລົງມາເຄື່ອນໄຫວຢ້າມຢາມໃນຄັ້ງນີ້ ,ໄລຍະຜ່ານມາ ການນຳແຂວງກໍໄດ້ເອົາໃຈໃສ່ ໃຫ້ທິດຊີ້ນຳນຳພາ ແລະ ເຂົ້າຮ່ວມຂະບວນການຕ່າງໆ ເພີ່ມທະວີຮ່ວມມືຢ່າງໃກ້ສິດ ກັບອົງການກາແດງແຂວງ ແລະ ທ່ານເຈົ້າແຂວງມີຄວາມຍິນດີຈະຮັບເອົາຄຳສະເຫນີເປັນປະທານກິຕິມາສັກໃຫ້ອົງການກາແດງແຂວງຕໍ່ໄປ
ນອກຈາກນັ້ນປະທ່ານອົງການກາແດງລາວ ໄດ້ມອບເຄື່ອງຊ່ວຍເຫຼືອບັນເທົາທຸກລວມມູນຄ່າ ເກືອບ 50 ລ້ານກີບໃຫ້ການນຳແຂວງເພື່ອມອບຕໍ່ໃຫ້ອົງການກາແດງແຂວງຜົ້ງສາລີ ນໍາໄປຊ່ວຍເຫລືອປະຊາຊົນທີ່ທຸກຍາກຂາດເຂີນ, ປ່ຽວພອຍດ້ອຍໂອກາດຢູ່ພາຍໃນແຂວງຂອງຕົນ.
ຈາກນັ້ນຄະນະນໍາອົງການກາແດງລາວພ້ອມດ້ວຍຄະນະ ໄດ້ສືບຕໍ່ພົບປະໂອ້ລົມອ້າຍນ້ອງພະນັກງານຫຼັກແຫຼ່ງອົງການກາແດງແຂວງ ເພື່ອຊຸກຍູ້, ໃຫ້ທິດຊີ້ນຳໃນການຈັດຕັ້ງປະຕິບັດວຽກງານໃຫ້ສອດຄ່ອງກັບພາລະບົດບາດຂອງຕົນ.
ໂດຍ: ນັກຂ່າວອົງການກາແດງ
Loading...