ວັນທີ 27 ກໍລະກົດ 2021 ທ່ານ ຮສ ດຣ ພູທອນ ເມືອງປາກ ປະທານອົງການກາແດງລາວ ພ້ອມດ້ວຍຄະນະໄດ້ເຄື່ອນໄຫວຢ້ຽມຢາມເຮັດວຽກທີ່ແຂວງຫຼວງພະບາງ ໂດຍໄດ້ເຂົ້າພົບປະທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ເພື່ອລາຍງານການຈັດຕັ້ງປະຕິບັດວຽກງານກາແດງໃຫ້ ຮອງເຈົ້າແຂວງຊາບ ແລະປຶກສາຫາລືຂໍທິດໃນການຊີ້ນຳ ນຳພາການເຄື່ອນໄຫວວຽກງານກາແດງແຂວງຫລວງພະບາງ ເຊິ່ງໄລຍະຜ່ານມາມີຫລາຍວຽກໄດ້ສຳເລັດຕາມຄາດຫມາຍໃນການຊ່ວຍເຫລືອປະຊາຊົນຜູ້ທຸກຍາກເຊັ່ນ: ວຽກງານເລືອດ, ກູ້ໄພສຸກເສີນ, ການຊອກຫາແຫຼ່ງທຶນ, ໂຄສະນາ, ສ້າງອາສາສະໝັກ ແລະ ວຽກງານອື່ນໆ.
ໂອກາດດຽວກັນນີ້ ທ່ານຮອງເຈົ້າແຂວງໄດ້ກ່າວສະແດງຄວາມຍິນດີຕ້ອນຮັບຕໍ່ການຢ້ຽມຢາມຂອງປະທານອົງການກາແດງ ແລະຄະນະໃນຄັ້ງນີ້. ເຊິ່ງໄລຍະຜ່ານມາການນຳຂອງແຂວງກໍ່ໄດ້ເອົາໃຈໃສ່ວຽກງານກາແດງຢ່າງໄກ້ສິດ ເປັນຕົ້ນໄດ້ປຸກລະດົມສ້າງຂະບວນການບໍລິຈາກເລືອດເພື່ອຊ່ວຍຜູ້ເຈັບເປັນຕາມໂຮງຫມໍ, ສົ່ງທີມກູ້ໄພເຂົ້າໃຫ້ການຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມຢູ່ແຂວງໄຊຍະບູລີ, ສາມາດປະກອບສ່ວນເຂົ້າໃນວຽກງານສະກັດກັ້ນ ການລະບາດຂອງພະຍາດໂຄວິດ-19 ຂັ້ນແຂວງແລະ ປະສານງານກັບຂະແໜງການຕ່າງໆເພື່ອອຳນວຍຄວາມສະດວກໃນການຈັດຕັ້ງປະຕິບັດວຽກງານກາແດງໃຫ້ສຳເລັດຕາມແຜນການ.
ຈາກນັ້ນ ທ່ານປະທານອົງການກາແດງລາວ ພ້ອມດ້ວຍຄະນະ ກໍໄດ້ເຂົ້າພົບປະໂອ້ລົມອ້າຍນ້ອງພະນັກງານກາແດງແຂວງຫຼວງພະບາງ ໂດຍໄດ້ຮັບການຕ້ອນຮັບຂອງທ່ານ ດຣ ວຽງສະຫວັນ ສຸກກະເສີມ ຫົວໜ້າອົງການກາແດງແຂວງພ້ອມດ້ວຍຄະນະ ເຊິ່ງທ່ານໄດ້ລາຍງານໃຫ້ປະທານອົງການກາແດງລາວຮັບຊາບໂດຍຫຍໍ້ວ່າ ອົງການກາແດງແຂວງຫຼວງພະບາງແມ່ນສາຂາທາງດ້ານມະນຸດສະທຳໜຶ່ງທີ່ເຄື່ອນໄຫວວຽກງານຕາມ 7 ຫຼັກການພື້ນຖານ, 9 ວຽກງານຕົ້ນຕໍຂອງອົງການກາແດງລາວ ໃນນັ້ນວຽກງານທີ່ພົ້ນເດັ່ນແມ່ນວຽກງານບໍລິຈາກເລືອດທີ່ເປັນວຽກງານບູລິມາສິດ, ວຽກງານຊ່ວຍເຫຼືອບັນເທົາທຸກສຸກເສີນປະຊາຊົນຜູ້ທຸກຍາກຂາດເຂີນ, ພອຍດ້ອຍໂອກາດ, ສໍາລັບວຽກງານກູ້ໄພສຸກເສີນເປັນວຽກງານໜຶ່ງທີ່ໄດ້ຈັດຕັ້ງປະຕິບັດມາແຕ່ປີ 2018 ມາສາມາດອອກຮັບໃຊ້ໄດ້ທັງໝົດ 1.747 ຄັ້ງ, ນຳສົ່ງຄົນເຈັບເຖິງໂຮງໝໍ 1.099 ຄົນ, ຍິງ 499 ຄົນ, ຮັບສົ່ງຄົນເສຍຊີວິດ 237 ກໍລະນີ ແລະໄດ້ຮັບການສະໜັບສະໜູນຈາກສັງຄົມອ້ອມຂ້າງເປັນຢ່າງດີ, ວຽກງານໂຄສະນາຊອກຫາແຫຼ່ງທຶນປະກອບມີ ເຮືອນຮົມຢາ, ນ້ຳດື່ມ, ເຮືອນພັກ, ຫີບບໍລິຈາກຕາມສະຖານທີ່ຕ່າງໆ, ການສ້າງອາສາສະໝັກກາແດງແມ່ນໄດ້ຝຶກອົບຮົມໃຫ້ອາສາສະໝັກທີ່ໄດ້ຄັດເລືອກມາຮ່ວມເພື່ອເຮັດໃຫ້ເຂົາເຈົ້າຮັບຮູ້ທີ່ຕັ້ງ, ພາລະບົດບາດ, ສິດໜ້າທີ່ ເຊິ່ງສາມາດເປັນຕົວແທນໃຫ້ພະນັກງານກາແດງໃນການເຄື່ອນໄຫວວຽກງານໄດ້.
ຈາກນັ້ນປະທານອົງການກາແດງ ໄດ້ສະແດງຄວາມຊົມເຊີຍການນຳ ພ້ອມດ້ວຍຄະນະອົງການການກາແດງແຂວງທີ່ໄດ້ພ້ອມກັນເອົາໃຈໃສ່ ສູ້ຊົນປະຕິບັດໜ້າ ແລະໄດ້ຮັບຜົນສຳເລັດຫຼາຍດ້ານ ໂດຍທ່ານໄດ້ເນັ້ນໜັກໃຫ້ເອົາໃຈໃສ່ ການປະສານງານກັບບັນດາຂະແໜງການອ້ອມຂ້າງແຂວງ ເພື່ອໃຫ້ວຽກງານຂອງຕົນມີປະສິດທິພາບ, ປະສິດທິຜົນ ສາມາດບັນລຸຄາດໝາຍທີ່ວາງໄວ້, ເພີ່ມທະວີເອົາໃຈໃສ່ໃນການເຕົ້າໂຮມຄວາມສາມັກຄີອ້າຍນ້ອງພະນັກງານໃຫ້ກາຍເປັນພະນັກງານທີ່ດີ, ເກັ່ງ ແລະ ມີຄວາມຮັບຜິດຊອບ, ເອົາໃຈໃສ່ການພົວພັນຮ່ວມມືສາກົນ ເພື່ອງເລັ່ງໃສ່ການຊ່ວຍເຫຼືອຈາກກາແດງເພື່ອນມິດແລະ ປະເທດທີ່ມີຊາຍແດນຕິດຈອດ.
ຈາກນັ້ນປະທານອົງການກາແດງລາວແລະຄນະ ໄດ້ເຂົ້າຢ້ຽມຊົມໂຮງງານຜະລິດນ້ຳດື່ມ, ເຮືອນຮົມຢາ, ສູນເລືອດ ແລະຮ່ວມສະເຫຼີມສະຫຼອງການເປີດສູນກູ້ໄພ 1625 ແຂວງຫຼວງພະບາງຄົບຮອບ 3ປີ.
ໂດຍ: ນັກຂ່າວສະພາກາແດງລາວ
Loading...