ລະຫວ່າງວັນທີ 9-10ກັນຍາ 2022 ທ່ານ ຮສ ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ ພ້ອມດ້ວຍຄະນະ ໄດ້ເດີນທາງເຂົ້າຮ່ວມກອງປະຊຸມ ຄັ້ງທີ 7 ວຽກງານກາແດງທີ່ປະເທດສິງກາໂປ, ໃນວາລະກອງປະຊຸມ ທ່ານ ດຣ ວີວານ ບຮາລາກິດສຮານ ລັດຖະມົນຕີກະຊວງການຕ່າງປະເທດ ສິງກະໂປ ເປັນກຽດເຂົ້າຮ່ວມ ແລະກ່າວໄຂກອງປະຊຸມ ເຊິ່ງມີບັນດາຜູ້ແທນຈາກ ຄະນະກຳມະການກາແດງສາກົນ, ສະຫະພັນກາແດງ ແລະ ຊີກວົງເດືອນແດງສາກົນ ປະຈຳພາກພື້ນ, ຕົວແທນຈາກກາແດງອິນເດຍ, ມົງໂກນ ແລະ ບັນດາກາແດງຈາກປະເທດອາຊີຕາເວັນອອກສ່ຽງໃຕ້ເຂົ້າຮ່ວມ.
ວາລະກອງປະຊຸມມື້ທີ່ຫນຶ່ງໄດ້ປຶກສາຫາຫລືກັນຫລາຍດ້ານເປັນຕົ້ນແມ່ນການພົວພັນຮ່ວມມືກັບບັນດາກາແດງຕ່າງໆໄດ້ມີບາດກ້າວທີດີ, ກອງປະຊຸມໄດ້ຍົກເອົາສີ່ຫົວຂໍ້ມາປຶກສາຫາລືເຊັ່ນ: ວຽກງານປະຖົມພະຍາບານ, ນໍ້າ ແລະ ສຸຂາພິບານ, ວຽກງານຈິດຕະສັງຄົມ ແລະ ສຸຂະພາບທີ່ດີ, ການນຳໃຊ້ໂດຣນ ເຂົ້າໃນວຽກງານຕອບໂຕ້ໄພພິບັດ.
ສ່ວນມື້ທີ່ສອງ ຜູ້ແທນກອງປະຊຸມໄດ້ແລກປ່ຽນບົດຮຽນໃນການຮັບມືກັບການແຜ່ລະບາດຂອງພະຍາດໂຄວິດ-19 ກ່ຽວກັບຜົນກະທົບ ແລະ ການສ້າງຄວາມເຂັ້ມແຂງໃນການຮັບມືຕໍ່ການລະບາດຂອງພະຍາດໃນອານາຄົດ.
ອົງການກາແດງແຫ່ງຊາດລາວ ແລະ ສະພາກາແດງສິງກາໂປໄດ້ມີສາຍພົວພັນຮ່ວມມືມາຍາວນານ ໄລຍະຜ່ານມາສະພາກາແດງສິງກາໂປໄດ້ໃຫ້ການສະຫນັບສະຫນູນອົງການກາແດງແຫ່ງຊາດລາວໃນວຽກງານຕ່າງໆເປັນຕົ້ນ ໄລຍະການເກີດໄພພິບັດເຂື່ອນເຊປຽນ-ເຊນໍ້ານ້ອຍ ທີ່ເມືອງສະຫນາມໄຊ ແຂວງອັດຕະປື ແລະຊ່ວຍເຫລືອວຽກງານອື່ນໆ ເຊິ່ງແຜນການໃນຕໍ່ຫນ້າສະພາກາແດງສິງກາໂປຍັງຈະໃຫ້ການສະຫນັບສະຫນູນອົງການແດງແຫ່ງຊາດລາວຫລາຍດ້ານ: ເປັນຕົ້ນ ການຝຶກອົບຮົບດ້ານໄອທີ, ດ້ານຈິດຕະສາດສັງຄົມໃນເວລາເກີດໄພພິບັດສຸກເສີນ, ການແລກປຽ່ນຖອດຖອນບົດຮຽນວຽກງານຊາວຫນຸ່ມອາສາສະຫມັກແລະວຽກງານນໍ້າສະອາດ ແລະ ສຸຂະພິບານເປັນຕົ້ນ.
ໂດຍ: ນັກຂ່າວອົງການກາແດງ
Loading...