ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຕອນເຊົ້າວັນທີ 05 ມີນາ 2024, ທີ່ອົງການກາແດງແຫ່ງຊາດລາວ ທ່ານ ສຈ.ດຮ. ພູທອນ ເມືອງປາກ ປະທານອົງການກາແດງແຫ່ງຊາດລາວໄດ້ ຕ້ອນຮັບທ່ານ ດາວອນ ພະຈັນທະວົງ ຜູ້ຕາງສະພາການຄ້າແຫ່ງຊາດລາວ ເຂົ້າພົບປະທີ່ຫ້ອງປະຊຸມອົງການກາແດງແຫ່ງຊາດລາວ; ໃນໂອກາດນີ້ທ່ານ.ສຈ. ດຣ. ພູທອນ ເມືອງປາກ ປະທານອົງການກາແຫ່ງຊາດລາວ ໄດ້ສະແດງຄວາມຕ້ອນຮັບອັນອົບອຸ່ນຕໍ່ການຢ້ຽມຢາມໃນຄັ້ງນີ້ ພ້ອມທັງປຶກສາຫາລືກ່ຽວກັບການສ້າງຕັ້ງກອງທຶນອົງການກາແດງແຫ່ງຊາດລາວ ເພື່ອປະກອບສ່ວນເຂົ້າໃນວຽກງານມະນຸດສະທຳ ພ້ອມທັງລາຍງານໃຫ້ຮູ້ກ່ຽວກັບການປະຕິບັດໜ້າທີ່ວຽກງານໃນ 9 ໜ້າວຽກຕົ້ນຕໍຂອງກາແດງ ເປັນຕົ້ນແມ່ນວຽກງານການປຸກລະດົມຂົນຂວາຍບໍລິຈາກເລືອດ ແມ່ນຍັງພົບຄວາມຫຍຸ້ງຍາກໂດຍສະເພາະທາງດ້ານງົບປະມານ ແລະ ຄວາມເຂົ້າໃຈຂອງປະຊາຊົນຕໍ່ວຽກງານເລືອດ, ວຽກງານການຊ່ວຍເຫຼືອບັນເທົາທຸກເບື້ອງຕົ້ນ, ການສະໜອງນ້ຳລິນ-ວິດຖ່າຍໃຫ້ແກ່ປະຊາຊົນໃນເຂດຫ່າງໄກສອກຫຼີກ, ວຽກງານກູ້ໄພສຸກເສີນ(1625), ການໂຄສະນາ ແລະ ຂົນຂວາຍແຫຼ່ງທຶນ, ວຽກງານສ້າງສະມາຊິກ ແລະ ອາສາສະໝັກກາແດງ, ວຽກງານປະຖົມພະຍາບານເບື້ອງຕົ້ນ, ວຽກງານພົວພັນ ແລະ ຮ່ວມມືສາກົນ.
ທ່ານ ດາວອນ ພະຈັນທະວົງ ຜູ້ຕາງສະພາການຄ້າແຫ່ງຊາດລາວ ກໍ່ໄດ້ສະແດງຄວາມຂອບໃຈຕໍ່ທ່ານປະທານອົງການກາແດງແຫ່ງຊາດລາວ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ຊົມເຊີຍຕໍ່ທ່ານປະທານອົງການກາແດງແຫ່ງຊາດລາວ ທີ່ໄດ້ຊອກຫາທຶນຮອນງົບປະມານ ມາຊ່ວຍເຫຼືອປະຊາຊົນລາວໂດຍສະເພາະຜູ້ທຸກຍາກຂາດເຂີນ, ສຳລັບວຽກງານການບໍລິຈາກເລືອດເຫັນວ່າມີຄວາມສຳຄັນທີ່ສຸດ ສັງເກດເຫັນວ່າເລືອດບໍ່ພຽງພໍ ທາງສະພາການຄ້າແຫ່ງຊາດລາວພ້ອມຈະເປັນກະບອກສຽງໃນການປຸກລະດົມຂົນຂວາຍຜູ້ບໍລິຈາກເລືອດ ແລະ ສະໜອງແຫຼ່ງທຶນໃນອະນະຄົດໃຫ້ແກ່ອົງການກາແດງແຫ່ງຊາດລາວ, ພ້ອມກັນນັ້ນ, ຍັງໄດ້ແລກປ່ຽນຄຳຄິດເຫັນກ່ຽວກັບ ວຽກງານຂົນຂວາຍຊອກຫາແຫຼ່ງທຶນຕ້ອງໄດ້ມີການໂຄສະນາພາລະບົດບາດຂອງອົງການກາແດງແຫ່ງຊາດລາວອອກໃຫ້ສັງຄົມຮັບຮູ້ໄດ້ຢ່າງກ້ວາງຂວາງຂຶ້ນກວ່າເກົ່າ ໂດຍສະເພາະບັນດານັກທຸລະກິດ, ບໍລິສັດຫ້າງຮ້ານຕ່າງໆ ຢູ່ໃນສ ປປ ລາວ ເພື່ອໃຫ້ເຂົາເຈົ້າ ເຂົ້າໃຈໃນວຽກງານຂອງ ອົງການກາແດງແຫ່ງຊາດລາວ.