ປະທານ ສກລ ພົບປະໂອ້ລົມພະນັກງານກຳມະບານແຂວງ ຄໍາມ່ວນ

   ວັນທີ 28 ເມສາ 2023 ທີ່ສະໂມສອນແຂວງຄໍາມ່ວນ ທ່ານ ນາງ ອາລີ ວົງໜໍ່ບຸນທຳ ປະທານຄະນະບໍລິຫານງານສູນກາງສະຫະພັນກຳມະບານລາວ (ສກລ) ໄດ້ເຄື່ອນໄຫວພົບປະໂອ້ລົມ ພະນັກງານສະຫະພັນກຳມະບານແຂວງ ຄໍາມ່ວນ, ໂດຍມີຫົວໜ້າຄະນະໂຄສະນາອົບຮົມແຂວງ, ບັນດາທ່ານໃນຄະນະບໍລິຫານງານສະຫະພັນກໍາມະບານແຂວງ, ຄະນະກໍາມະບານຮາກຖານພະແນກການ, ຕະຫລອດຮອດ ສະມາຊິກກໍາມະບານ ອ້ອມຂ້າງແຂວງ ເຂົ້າຮ່ວມ.

     ໂອກາດນີ້, ທ່ານ ໂຕເຊີນ ອຸທັດສີ ປະທານຄະນະບໍລິຫານງານສະຫະພັນກຳມະບານແຂວງ ໄດ້ລາຍງານສະພາບລວມຂອງແຂວງ ແລະ ການເຄື່ອນໄຫວຈັດຕັ້ງປະຕິບັດໜ້າທີ່ການເມືອງຂອງສະຫະພັນກຳມະບານແຂວງໃນໄລຍະ 1 ປີ ຜ່ານມາ : ຄະນະບໍລິຫານງານສະຫະພັນແຕ່ລະຂັ້ນ ໄດ້ເອົາໃຈໃສ່ໂຄສະນາ ສຶກສາອົບຮົມການເມືອງ ນຳພາ – ແນວຄິດ ໃຫ້ແກ່ສະມາຊິກກຳມະບານ, ກຳມະກອນ, ຊາວຜູ້ອອກແຮງງານ ແລະ ນັກຮຽນຮູ້ປັນຍາຊົນບັນດາເຜົ່າດ້ວຍຫຼາຍຮູບການ  ເພື່ອເຮັດໃຫ້ມີຄວາມໜັກແໜ້ນທາງດ້ານການເມືອງ, ມີຫຼັກໝັ້ນມິດ-ສັດຕູຢ່າງຈະແຈ້ງ, ມີສະຕິລະວັງຕົວ ຕໍ່ກົນອຸບາຍການຫັນປ່ຽນໂດຍສັນຕິຂອງອິດທິກໍາລັງປໍລະປັກ,  ມີຄວາມສາມັກຄີກັນຢ່າງແໜ້ນແຟ້ນ. ທົ່ວແຂວງມີ 10 ສະຫະພັນກໍາມະບານເມືອງ, 7 ສະຫະພັນກໍາມະບານພະແນກການ, ມີ 43 ກໍາມະບານຮາກຖານອ້ອມຂ້າງແຂວງ, ຂັ້ນເມືອງມີ 323 ກໍາມະບານຮາກຖານ, ມີຄະນະບໍລິຫານງານສະຫະພັນກໍາມະບານແຂວງທັງໝົດ 31 ສະຫາຍ, ຍິງ 5 ສະຫາຍ, ຄະນະບໍລິຫານງານຂັ້ນເມືອງ ແລະ ພະແນກການ 205 ສະຫາຍ, ຍິງ 43 ສະຫາຍ, ມີສະມາຊິກກໍາມະບານທັງໝົດ 11.423 ຄົນ, ຍິງ 6.129 ຄົນ, ໃນນີ້ ມີພະນັກງານກໍາມະບານອາຊີບທົ່ວແຂວງ 78 ຄົນ, ຍິງ 36 ຄົນ.

     ຈາກນັ້ນ, ທ່ານ ນາງ ອາລີ ວົງໜໍ່ບຸນທຳ ໄດ້ກ່າວສະແດງຄວາມຍ້ອງຍໍຊົມເຊີຍມາຍັງ ບັນດາຄະນະສະຫະພັນກຳມະບານແຂວງທີ່ຍາດໄດ້ຜົນງານພົ້ນເດັ່ນຫຼາຍດ້ານ ພ້ອມນັ້ນ, ຈົ່ງສືບຕໍ່ເພີ່ມທະວີວຽກງານສຶກສາອົບຮົມການເມືອງ-ແນວຄິດ ໃຫ້ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານ ຢ່າງຕໍ່ເນື່ອງ ເໜາະສົມກັບເງື່ອນໄຂສະພາບຕົວຈິງຂອງແຕ່ລະກຸ່ມເປົ້າໝາຍ, ເຮັດໃຫ້ມີຫຼາຍຮູບຫຼາຍສີ ແລະ ທົ່ວເຖິງ, ສະມາຊິກກໍາມະບານ, ກໍາມະກອນ ພວກເຮົາຕ້ອງໄດ້ຊ່ວຍຄະນະພັກ ຂອງແຂວງ ເຮັດວຽກງານດັ່ງກ່າວ, ຄະນະນຳກຳມະບານຮາກຖານຕ້ອງມີການຕັດສິນໃຈສູງ ເສຍສະຫຼະ, ເປັນເຈົ້າການໃນການປະຕິບັດວຽກງານດັ່ງກ່າວ. ເອົາໃຈໃສ່ປັບປຸງການຈັດຕັ້ງກໍາມະບານແຕ່ລະຂັ້ນໃຫ້ເຂັ້ມແຂງສາມາດເຄື່ອນໄຫວຖືກຕ້ອງຕາມພາລະບົດບາດຂອງຕົນຢ່າງແຂງແຮງ, ມີການແບ່ງຂັ້ນຄຸ້ມຄອງໃຫ້ຈະແຈ້ງ, ເອົາໃຈໃສ່ຂະຫຍາຍການຈັດຕັ້ງ ແລະ ສະມາຊິກກຳມະບານໃນຫົວໜ່ວຍແຮງງານຕ່າງໆ ໃຫ້ກວ້າງຂວາງບ່ອນທີ່ສາມາດຂະຫຍາຍໄດ້. ສືບຕໍ່ເຄື່ອນໄຫວວຽກງານປົກປ້ອງສິດ ແລະ ຜົນປະໂຫຍດອັນຊອບທໍາຂອງ ກໍາມະກອນ ແລະ ຊາວຜູ້ອອກແຮງງານ ເປັນຕົ້ນ: ການແກ້ໄຂຂໍ້ຂັດແຍ່ງດ້ານແຮງງານ, ການປະຕິບັດຄ່າແຮງງານຂັ້ນຕໍ່າ, ການຈ່າຍຄ່າແຮງງານເຮັດວຽກເພີ່ມໂມງ, ສະຫວັດດີການສັງຄົມ ແລະ ອື່ນໆ ທີ່ເຫັນວ່າບໍ່ທັນສອດຄ່ອງກັບກົດໝາຍກໍານົດ ແລະ ເອົາໃຈໃສ່ຊຸກຍູ້ຂະບວນການແຂ່ງຂັນ 5 ເປັນເຈົ້າ ຕິດພັນກັບວຽກງານວິຊາສະເພາະ ແລະ ຂໍ້ແຂ່ງຂັນຮັກຊາດ ແລະ ພັດທະນາ ໃນສາຂາອາຊີບຕ່າງໆ ເພື່ອສືບຕໍ່ສ້າງ ແລະ ຊອກໃຫ້ເຫັນວຽກດີຄົນເດັ່ນ, ບຸກຄົນດີເດັ່ນ, ຜູ້ທີ່ມີຫົວຄິດປະດິດສ້າງອັນໃໝ່ເປັນປະໂຫຍດແກ່ສັງຄົມ ແລະ ວຽກງານອື່ນໆ ທີ່ຕິດພັນອີກຈໍານວນໜຶ່ງ.

     ໂອກາດດັ່ງກ່າວນີ້ ທ່ານ ປະທານ ສກລ ຍັງໄດ້ເປັນກຽດ ປາຖະກະຖາ ວັນກໍາມະກອນສາກົນ  ວັນທີ 1 ພຶດສະພາ 2023 ຄົບຮອບ 137 ປີ (1 ພຶດສະພາ 1886 -1 ພຶດສະພາ 2023) ພາຍໃຕ້ຄຳຂວັນ: “ ສ້າງສະພາບແວດລ້ອມໃນການເຮັດວຽກທີ່ປອດໄພ ແລະ ດີຕໍ່ສຸຂະພາບແມ່ນສິດພື້ນຖານຂອງທຸກຄົນ” ອີກດ້ວຍ.