ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ປະທານ ສນຊ ຊີ້ນຳວຽກງານ ໂຄສະນາຂະບວນການຕ້ອນຮັບ ກອງປະຊຸມໃຫຍ່ຂອງພັກ ຄັ້ງທີ XI ຢູ່ຊຽງຂວາງ

ໃນວັນທີ 10 ກຸມພາ 2020, ທີ່ຫ້ອງວ່າການປົກຄອງແຂວງຊຽງຂວາງ, ທ່ານ ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ທັງເປັນຫົວໜ້າອະນຸກຳມະການໂຄສະນາ ແລະ ຂະ ບວນ​ການກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ ໄດ້ເຂົ້າຮ່ວມກອງປະຊຸມພົບປະກັບຄະນະພັກຄະນະປົກຄອງແຂວງ, ແນວລາວສ້າງຊາດແຂວງ, ອົງການຈັດຕັ້ງມະຫາຊົນແຂວງ ແລະ ສະຫະພັນນັກຮົບເກົ່າແຂວງຊຽງຂວາງ.

ໃນໂອກາດດັ່ງກ່າວ, ທ່ານ ບົວສອນ ສີນວນທອງ, ຮອງເລຂາພັກແຂວງ, ຮອງເຈົ້າແຂວງໆຊຽງຂວາງ ໄດ້ສະແດງຄວາມຍິນດີຕ້ອນຮັບ ແລະ ລາຍງານສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງໃນໄລຍະປີທີ່ຜ່ານມາ ຊຶ່ງປະຈຸບັນ, ແຂວງຊຽງຂວາງພວມກະກຽມກອງປະຊຸມໃຫຍ່ 3 ຂັ້ນ, ພ້ອມທັງ ງານມະຫາກຳກິລາແຫ່ງຊາດ ຄັ້ງທີ 11 ແລະ ງານສະເຫຼີມສະຫຼອງໄຫຫີນເປັນມໍລະດົກໂລກ.

ນອກຈາກນີ້, ແຂວງຊຽງຂວາງ ຍັງໄດ້ສົ່ງເສີມປະຊາຊົນໃຫ້ທຳການຜະລິດເປັນສິນຄ້າ ຕິດພັນກັບການປຸງແຕ່ງ, ຕະ ຫຼາດ ແລະ ການສົ່ງອອກ ນັບມື້ນັບເພີ່ມຂຶ້ນ, ເຮັດໃຫ້ສາ​ມາດແກ້ໄຂຄວາມທຸກຍາກ, ຫຼຸດຈຳນວນຄອບຄົວທຸກຍາກໃຫ້ໜ້ອຍລົງ, ທັງເອົາໃຈໃສ່ພັດທະນາດ້ານວັດທະນະທໍາ-ສັງຄົມ, ດ້ານວຽກງານກະສິກໍາ-ປ່າໄມ້, ວຽກງານພັດທະນາຊົນນະບົດ ແລະ ການແກ້ໄຂຄວາມທຸກຍາກ, ວຽກງານໂຍທາທິການ, ວຽກງານໄປສະນີໂທລະຄົມ ແລະ ສື່ສານ, ວຽກງານທ່ອງທ່ຽວ ແລະ ວຽກງານເກັບກູ້ລະເບີດ ໃຫ້ດີຂຶ້ນເລື້ອຍໆ, ຄຽງຄູ່ກັບການພັດທະນາທາງດ້ານເສດຖະກິດຕາມທິດສີຂຽວ ແລະ ຍືນຍົງ; ພ້ອມນີ້, ເສດຖະກິດຂອງແຂວງກໍ່ຂະຫຍາຍຕົວໃນລະດັບ 7,6%; ປະຊາຊົນພາຍໃນແຂວງໄດ້ເຂົ້າເຖີງການບໍລິການດ້ານສາທາລະນະສຸກ, ການສືກສາ ແລະ ການບໍລິການຕ່າງໆ; ໂດຍລວມແລ້ວ ການພັດທະນາແຜນເສດຖະກິດ-ສັງຄົມໄດ້ຊ່ວຍເຮັດໃຫ້ຊີວິດການເປັນຢູ່ຂອງປະຊາຊົນພາຍໃນແຂວງດີຂື້ນເປັນກ້າວໆ.

ໃນໂອກາດນີ້, ທ່ານ ປອ. ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ທັງເປັນຫົວໜ້າອະນຸກຳມະການໂຄສະນາ ແລະ ຂະບວນການ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ, ໄດ້ສະແດງຄວາມຊົມເຊີຍຕໍ່ຜົນງານຂອງອົງການປົກຄອງແຂວງຍາດມາໄດ້ໃນໄລຍະຜ່ານມາ ໂດຍສະເພາະ ແມ່ນຜົນສຳເລັດໃນການຈັດຕັ້ງບັນດາແຜນງານຕ່າງໆທີ່ວາງອອກ.

ພ້ອມດຽວກັນນີ້, ທ່ານກໍ່ໄດ້ເໜັ້ນໜັກໃຫ້ແຂວງເອົາໃຈໃສ່ແກ້ໄຂບັນຫາປະກົດການຫຍໍ້ທໍ້ໃນສັງຄົມໃຫ້ນັບມື້ນັບຫຼຸດຫນ້ອຍລົງ; ແກ້ໄຂບັນດາຫນໍ່ແໜງທີ່ບໍ່ດີ, ເອົາໃຈໃສ່ວຽກງານກວດກາສໍາມະໂນຄົວ ແລະ ຄຸ້ມຄອງຊາຍແດນ, ເພື່ອເຮັດໃຫ້ຊາຍແດນມີສັນຕິພາບ, ເປັນຊາຍແດນມິດຕະພາບ ແລະ ການຮ່ວມມືພັດທະນາ, ໂດຍສະເພາະ ແມ່ນໄລຍະຈະດໍາເນີນກອງປະຊຸມໃຫຍ່ສາມຂັ້ນຂອງແຂວງໃຫ້ມີຄວາມສະຫງົບ 100%; ເອົາໃຈໃສ່ສືບຕໍ່ກະກຽມ ແລະ ດໍາເນີນກອງປະຊຸມໃຫຍ່ສາມຂັ້ນ ໃຫ້ມີຜົນສໍາເລັດຕາມລະດັບຄາດຫມາຍ ແລະ ຮັບປະກັນໃຫ້ມີຄວາມສະຫງົບ, ການດໍາເນີນກອງປະຊຸມໃຫຍ່ ແມ່ນມີຄວາມຫມາຍສໍາຄັນທາງດ້ານຍຸດທະສາດ ໃນການກໍ່ສ້າງພັກ ແລະ ປັບປຸງພັກ, ເນື້ອແທ້ແມ່ນ ການປັບປຸງພາຍໃນພັກ, ດ້ານການແນວຄິດ-ການເມືອງ, ການຈັດຕັ້ງ ແລະ ແບບແຜນວິທີນໍາພາ, ໃຫ້ເອົາໃຈໃສ່ບັນຫາເນື້ອໃນຂອງບົດລາຍງານ ການເມືອງ ທີ່ອະນຸກໍາມະການເນື້ອໃນຂັ້ນສູນກາງ ໄດ້ແນະນໍາ, ຄົ້ນຄ້ວາບຸກຄະລາກອນໃຫ້ລະອຽດຖີ່ຖ້ວນ, ຮອບດ້ານ ແລະ ປະຕິບັດໃຫ້ຖືກຕ້ອງຕາມຂັ້ນຕອນການທາບທາມ ແລະ ຮັບປະກັນຫຼັກການລວມສູນປະຊາທິປະໄຕຢ່າງແທ້ຈິງ, ໃຫ້ເອົາໃຈໃສ່ວຽກງານໂຄສະນາ ແລະ ຂະບວນການກະກຽມໃຫ້ແກ່ກອງປະຊຸມໃຫຍ່ສາມຂັ້ນ, ເປັນຕົ້ນແມ່ນ ການປຸກລະດົມຂະບວນການໃຫ້ມະຫາຊົນເຂົ້າຮ່ວມຢ່າງຕັ້ງຫນ້າ ໃນການກໍ່ສ້າງພັກ ໃຫ້ປອດໃສ, ເຂັ້ມແຂງ ແລະ ຫນັກແຫນ້ນ.

ໃນໂອກາດດຽວກັນນີ້, ທ່ານ ປະທານສູນກາງແນວລາວສ້າງຊາດ ໄດ້ນຳເອົາຄອມພິວເຕີໂນ໊ດບຸກ ຈໍານວນ 6 ໜ່ວຍ ແລະ ຄອມພິວເຕີຕັ້ງໂຕະ 2 ຊຸດ ມາມອບໃຫ້ແນວລາວສ້າງຊາດແຂວງ ເພື່ອນໍາໄປມອບຕໍ່ໃຫ້ບັນດາແນວລາວສ້າງເມືອງ ແລະ ໄດ້ໄປຢ້ຽມຢາມຟາມງົວ ບ້ານຄັງສີ, ພ້ອມທັງ ຢ້ຽມຊົມການກຽມຄວາມພ້ອມຂອງສະໜາມກິລາ ທີ່ຈະຈັດງານມະຫາກຳກິລາແຫ່ງຊາດ ຄັ້ງທີ 11 ປີ 2020 ທີ່ແຂວງຊຽງຂວາງໄດ້ຮັບກຽດເປັນເຈົ້າພາບໃນຄັ້ງນີ້ຕື່ມອີກ.