ທ່ານ ສິນລະວົງ ຄຸດໄພທູນ ປະທານສູນກາງແນວລາວສ້າງຊາດ (ສນຊ) ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານນາງ ຟາງ ຫົງ ເອກອັກຄະລັດຖະທູດແຫ່ງ ສປ ຈີນ ຄົນໃໝ່ປະຈຳລາວ ໃນວັນທີ 9 ກໍລະກົດ 2024 ທີ່ຫ້ອງຮັບແຂກຂອງ ສນຊ.
ທ່ານປະທານ ສນຊ ໄດ້ສະແດງຄວາມຍິນດີຕ້ອນຮັບ ທ່ານນາງ ຟາງ ຫົງ ທີ່ໄດ້ຮັບການແຕ່ງຕັ້ງໃຫ້ດຳລົງຕໍາແໜ່ງ ເປັນເອກອັກຄະລັດຖະທູດແຫ່ງ ສປ ຈີນ ຄົນໃໝ່ປະຈຳລາວ. ພ້ອມນີ້, ທ່ານປະທານ ສນຊ ໄດ້ຕີລາຄາສູງ ແລະ ຍົກໃຫ້ເຫັນຄວາມໝາຍຄວາມສຳຄັນຂອງສາຍພົວພັນຮ່ວມມື ລະຫວ່າງ ສອງຊາດລາວ-ຈີນເວົ້າລວມແລະລະຫວ່າງສອງອົງການແນວໂຮມຂອງທັງ 2 ປະເທດ ຕະຫຼອດໄລຍະຜ່ານມາ ຊຶ່ງເປັນຄູ່ຮ່ວມຊາຕາກຳ ລາວ-ຈີນຕາມທິດ 4 ດີ ທີ່ສອງປະເທດໄດ້ລົງນາມຮ່ວມກັນ. ພ້ອມນີ້ສອງຝ່າຍໄດ້ປຶກສາຫາລື, ແລກປ່ຽນບາງວຽກງານຈຸດສຸມທີ່ຈະຕ້ອງສືບຕໍ່ຮ່ວມມືໃນກັນຕໍ່ໜ້າ.
ໂອກາດນີ້, ທ່ານນາງ ຟາງ ຫົງ ໄດ້ສະແດງຄວາມຂອບໃຈເປັນຢ່າງຍິ່ງຕໍ່ທ່ານປະທານ ສນຊ ທີ່ໃຫ້ການຕ້ອນຮັບຢ່າງອົບອຸ່ນ ແລະ ຈະສືບຕໍ່ໃຫ້ການສະໜັບສະໜູນສ້າງສາຍພົວພັນຮ່ວມມືທີ່ດີລະຫວ່າງສອງພັກ-ສອງລັດ ກໍຄືປະຊາຊົນສອງຊາດຈີນ-ລາວໃຫ້ນັບມື້ມີການພົວພັນຫຼາຍດ້ານຂຶ້ນຕື່ມທັງລວງກວ້າງ ແລະ ລວງເລິກ.
ທີ່ມາ: ປະຊາຊົນ
