ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ປະທານ ສນຊ ເຄື່ອນໄຫວລົງຊຸກຍູ້ຂະບວນການກະກຽມກອງປະຊຸມໃຫຍ່ສາມຂັ້ນຢູ່ເມືອງຊຽງຄໍ້

ໃນວັນທີ 11 ກຸມພາ 2020, ພາຍຫລັງທີ່ໄດ້ລົງເຄື່ອນໄຫວຢ້ຽມຢາມ ເມືອງສົບເບົາ, ແຂວງຫົວພັນ, ມາໃນຕອນບ່າຍຂອງວັນດຽວກັນ, ທ່ານ ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ (ສນຊ), ແລະ ທັງເປັນຫົວໜ້າອະນຸກຳມະການໂຄສະນາ ແລະ ຂະບວນການຂອງການກະກຽມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ ກໍ່ໄດ້ສືບຕໍ່ໄປຢ້ຽມຢາມພົບປະໂອ້ລົມຄະນະພັກ, ອຳນາດການປົກຄອງ, ຜູ້ຊົງຄຸນວຸດທິ, ນັກປະຕິວັດອາວະໂສ, ແນວລາວສ້າງຊາດ, ກຳລັງປກຊ, ປກສ, ແລະ ອົງການຈັດຕັ້ງມະຫາຊົນ ເມືອງຊຽງຄໍ້ ແຂວງຫົວພັນ ເພື່ອຊຸກຍູ້ຂະບວນການກະກຽມ ແລະ ດຳເນີນກອງປະຊຸມໃຫຍ່ສາມຂັ້ນ, ໂດຍທ່ານໄດ້ກ່າວສະແດງຄຳຊົມເຊີຍຕໍ່ຜົນສໍາເລັດຂອງກອງປະຊຸມໃຫຍ່ຄັ້ງທີ XI ຂອງເມືອງຊຽງຄໍ້ ຈັດຂຶ້ນ ເມື່ອເດືອນທັນວາປີ 2019 ຜ່ານມາ, ພ້ອມທັງໄດ້ກ່າວເນັ້ນໃຫ້ມີການຈັດຕັ້ງເຊື່ອມຊຶມ ມະຕິຂອງກອງປະຊຸມໃຫ້ເລິກເຊິ່ງທົ່ວເຖິງ ເພື່ອໃຫ້ສາມາດນໍາໄປຈັດຕັ້ງຜັນຂະຫຍາຍບັນດາແຜນວຽກຢ່າງມີຜົນສຳເລັດ.

ໃນໂອກາດພົບປະໂອ້ລົມໃນຄັ້ງນີ້, ປະທານ ສນຊ ຍັງໄດ້ນໍາເອົາຄວາມຢື້ຢາມຖາມຂ່າວຈາກການນໍາຂັ້ນສູງພັກ-ລັດ ມາເຖິງຄະນະພັກ, ອຳນາດການປົກຄອງທຸກຂັ້ນ, ຜູ້ຊົງຄຸນວຸດທິ ແລະ ພີ່ນ້ອງປະຊາຊົນບັນດາເຜົ່າເມືອງຊຽງຄໍ້, ທັງໄດ້ຊົມເຊີຍຕໍ່ການນໍາພາຊີ້ນຳຂອງຄະນະພັກ, ອຳນາດການປົກຄອງຂັ້ນຕ່າງໆ, ແລະ ພີ່ນ້ອງປະຊາຊົນບັນດາເຜົ່າ ທີ່ໄດ້ປະກອບສ່ວນເຂົ້າໃນການພັດທະນາເມືອງຊຽງຄໍ້ຢ່າງມີຜົນສຳເລັດເປັນຢ່າງດີ.

ສຳລັບໃນຕໍ່ໜ້ານີ້, ທ່ານປະທານ ສນຊ ຍັງໄດ້ເນັ້ນໃຫ້ສືບຕໍ່ເອົາໃຈໃສ່ວຽກງານການເມືອງແນວຄິດ, ແລະ ໂຄສະນາເຜີຍແຜ່ລັດຖະທຳມະນູນ ແລະ ກົດໝາຍ, ລວມທັງ ປົກປັກຮັກສາຮີດຄອງປະເພນີອັນດີງາມຂອງບັນດາເຜົ່າ, ຊຸກຍູ້ຂະບວນການຜະລິດເປັນສິນຄ້າໃຫ້ກວ້າງຂວາງ, ສົ່ງເສີມການປູກຝັງລ້ຽງສັດໃຫ້ແທດເໝາະກັບທ່າແຮງທ້ອງຖິ່ນ, ຊຸກຍູ້ສົ່ງເສີມການທ່ອງທ່ຽວ -ບໍລິການ ຕິດພັນກັບການພັດທະນາແບບຍືນຍົງ, ສືບຕໍ່ເອົາໃຈໃສ່ວຽກງານສຶກສາ -ສາທາລະນະສຸກ, ເປັນຕົ້ນແມ່ນ ການເຂົ້າຮຽນສາຍສາມັນ-ຕາໜ່າງສາທາລະນະສຸກທົ່ວເຖິງ, ການກິນຢູ່ໃຫ້ຖືກຫຼັກສຸຂະອະນາໄມ ແລະ ອື່ືນໆ.

ທ່ານປະທານ ສນຊ ຍັງໄດ້ຮຽກຮ້ອງໃຫ້ສືບຕໍ່ ສ້າງຂະບວນຂໍ່ານັບຮັບຕ້ອນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ, ກໍ່ຄືວັນ ສຳຄັນຕ່າງຂອງພັກ, ຂອງຊາດ, ເປັນຕົ້ນແມ່ນ ວັນສ້າງຕັ້ງພັກປະຊາຊົນປະຕິວັດລາວຄົບຮອບ 65 ປີ, ວັນສະຖາປະນາ ສປປ ລາວ ຄົບຮອບ 45 ປີ, ວັນຄ້າຍວັນເກີດປະທານໄກສອນ ພົມວິຫານ ຄົບຮອບ 100 ປີ, ວັນສ້າງຕັ້ງແນວລາວສ້າງຊາດ ຄົບຮອບ 70 ປີ ແລະ ອື່ນໆ ໃຫ້ມີຂະບວນຟົດຟື້ນ; ນອກນີ້ ກໍ່ໃຫ້ສືບຕໍ່ເອົາໃຈໃສ່ສ້າງຂະບວນການແຂ່ງຂັນຮັກຊາດ ແລະ ພັດທະນາຕິດພັນກັບວຽກງານສາມສ້າງ, ປຸກລະດົມທຸກພາກສ່ວນເຂົ້າຮ່ວມພັດທະນາໃຫ້ເປັນຂະບວນແຂງແຮງ ແລະ ກວ້າງຂວາງ.

ພ້ອມກັນນີ້, ທ່ານໄຊສົມພອນ ພົມວີຫານ ຍັງໄດ້ຮຽກຮ້ອງໃຫ້ອົງການແນວລາວສ້າງຊາດເມືອງຊຽງຄໍ້ ຈົ່ງສືບຕໍ່ເອົາໃຈໃສ່ປະຕິບັດສິດ ແລະ ພາລະບົດບາດໜ້າທີ່ຂອງຕົນໃນການເຕົ້າໂຮມຄວາມສາມັກຄີ, ສຶກສາອົບຮົມ, ຄວາມເປັນແບບຢ່າງທີ່ດີ, ໃຫ້ຄຳຄິດຄຳເຫັນ, ແນະນຳ ແລະ ຊຸກຍູ້ປະຊາຊົນບັນດາເຜົ່າເຂດຮ່ວມສ້າງສາພັດທະນາບ້ານເມືອງໃຫ້ມີຄວາມຈະເລີນ, ປະຕິບັດລັດຖະທຳມະນູນ, ກົດໝາຍ ແລະ ລະບຽບການຕ່າງໆ ສ້າງຄວາມສະຫງົບ ແລະ ເປັນລະບຽບຮຽບຮ້ອຍໃນທົ່ວສັງຄົມ.

ໃນໂອກາດນີ້, ທ່ານປະທານ ສນຊ ຍັງໄດ້ນຳເອົາເຄື່ອງເປັນຂອງຂວັນມາມອບໃຫ້ແກ່ຜູ້ຊົງຄຸນວຸດທິ, ແລະ ຜູ້ຕາງໜ້າອຳນາດການປົກຄອງ ຈຳນວນໜຶ່ງ ແລະ ມອບເບ້ຍໝາກແໜ່ງຈຳນວນ 10.000 ເບ້ຍ ໃຫ້ແກ່ເມືອງຊຽງຄໍ້, ເພື່ອຊຸກຍູ້ຂະບວນການປູກໝາກແໜ່ງເປັນສິນຄ້າໃນອະນາຄົດ, ພ້ອມທັງ ໄດ້ໄປຢ້ຽມຢາມພື້ນຖານການຜະລິດຈຳນວນໜຶ່ງຂອງເມືອງຊຽງຄໍ້ ຕື່ມອີກ.