ໃນກອງປະຊຸມຂ່າວທີ່ຈັດຂຶ້ນໃນວັນທີ 7 ກໍລະກົດນີ້, ທ່ານເຕໂດຣສ ອັດຮານົມ ເກເບຣເຢຊູສ ຜູ້ອຳນວຍການໃຫຍ່ອົງການອະນາໄມໂລກ ຫຼື WHO ກ່າວວ່າ: ຜູ້ເສຍຊີວິດຍ້ອນເປັນພະຍາດໂຄວິດ-19 ໃນໂລກມີຫຼາຍກວ່າ 4 ລ້ານຄົນ ເຊິ່ງເປັນຕົວເລກທີ່ໜ້າເສົ້າສະຫຼົດໃຈ, ນອກນີ້, ທ່ານຍັງກ່າວວ່າ: ຈຳນວນຜູ້ເສຍຊີວິດຕົວຈິງອາດຈະຫຼາຍກວ່ານີ້ອີກ. ໃນຂະນະນີ້, ເຊື້ອພະຍາດໂຄວິດ-19 ສາຍພັນເດວຕ້າໄດ້ເຮັດໃຫ້ທົ່ວໂລກຕື່ນຕົກໃຈອີກຄັ້ງໜຶື່ງ.
ຕາມຂ່າວແຈ້ງວ່າ: ນັບແຕ່ພະຍາດໂຄວິດ-19 ສາຍພັນເດວຕ້າໄດ້ແຜ່ລະບາດຢ່າງຂະໜາດໃຫຍ່ຢູ່ປະເທດດິນເດຍເປັນຄັ້ງທຳອິດໃນເດືອນເມສາປີນີ້, ຫຼັງຈາກນັ້ນ 2 ເດືອນ, ໄດ້ແຜ່ລະບາດໄປເຖິງ 100 ກວ່າປະເທດແລ້ວ. ປັດຈຸບັນນີ້, ຢູ່ອາເມຣິກາ, ຝຣັ່ງ ແລະ ອີຕາລີ, ຜູ້ຖືກບົ່ງມະຕິເປັນພະຍາດໂຄວິດ-19 ເພີ່ມໃໝ່ມີຫຼາຍກວ່າ 20% ລ້ວນແຕ່ໄດ້ຕິດເຊື້ອພະຍາດໂຄວິດ-19ສາຍພັນເດວຕ້າ. ສ່ວນຢູ່ອັງກິດ, ຕົວເລກດັ່ງກ່າວໄດ້ສູງກວ່າ 90%. ນະຄອນກວາງໂຈ່ວ, ນະຄອນເຊິນເຈິ້ນ ແລະ ນະຄອນຕຸ່ງກວນຂອງຈີນກໍກວດພົບສາຍພັນເດວຕ້າເຊັ່ນກັນ.
ເຖິງວ່າສາຍພັນເດວຕ້າໄດ້ແຜ່ລະບາດຢ່າງຂະໜາດໃຫຍ່ຢູ່ຫຼາຍປະເທດໃນໂລກ, ແຕ່ວ່າ: ປະເທດຈີນຍັງສາມາດຄວບຄຸມການແຜ່ລະບາດຂອງເຊື້ອພະຍາດສາຍພັນເດວຕ້າໄວ້ໄດ້ເປັນຢ່າງດີ ເຊິ່ງໄດ້ເປັນແບບຢ່າງທີ່ດີໃຫ້ແກ່ຫຼາຍປະເທດ. ເພາະວ່າ, ບົນພື້ນຖານມາດຕະການຮັບມືກັບການແຜ່ລະບາດຂອງພະຍາດໂຄວິດ-19 ຢູ່ນະຄອນອູຮັ້ນ ແລະ ນະຄອນຫຼວງປັກກິ່ງຫຼາຍເທື່ອແລ້ວ, ຈີນມີປະສົບການທີ່ອູດົມສົມບູນ. ນອກນີ້, ໂດຍແນໃສ່ຈຸດພິເສດຂອງສາຍພັນເດວຕ້າ, ແຂວງກວາງຕຸ້ງຈີນຍັງໄດ້ໃຊ້ຫຼາຍມາດຕະການພິເສດຢ່າງມີຫົວຄິດປະດິດສ້າງ. ນັບມາຮອດວັນທີ 23 ມິຖຸນາຜ່ານມານີ້, ຜູ້ຖືກບົ່ງມະຕິເປັນພະຍາດໂຄວິດ-19 ສາຍພັນເດວຕ້າລວມຢູ່ແຂວງກວາງຕຸ້ງທັງໝົດມີ 153 ກໍລະນີ. ແຕ່ວັນທີ 21 ມິຖຸນາຜ່ານມານີ້ຈົນເຖິງປັດຈຸບັນນີ້, ໃນທົ່ວແຂວງກວາງຕຸ້ງບໍ່ໄດ້ລາຍງານວ່າພົບຜູ້ເປັນພະຍາດເພີ່ມໃໝ່ອີກ. ນີ້ສະແດງໃຫ້ເຫັນວ່າຍ້ອນລັດຖະບານແລະປະຊາຊົນຈີນເປັນຈິດໜຶ່ງໃຈດຽວກັນ ແລະ ຮ່ວມແຮງຮ່ວມໃຈກັນ, ຈິ່ງປະສົບຜົນສຳເລັດອັນດີເດັ່ນໃນການປ້ອງກັນແລະຄວບຄຸມພະຍາດຕາມຫຼັກວິທະຍາສາດ ແລະ ໄດ້ນຳໃຊ້ມາດຕະການທີ່ຖືກຕ້ອງແມ່ນຢຳ.
ນອກຈາກນັ້ນ, ວັກຊິນຂອງຈີນຍັງສາມາດຕ້ານກັບສາຍພັນເດວຕ້າໄດ້ເປັນຢ່າງດີ. ເມື່ອສັງເກດເບິ່ງກໍລະນີຕິດເຊື້ອພະຍາດສາຍພັນເດວຕ້າຢູ່ແຂວງກວາງຕຸ້ງແລ້ວເຫັນວ່າ: ຜູ້ສັກວັກຊິນຄົບ 2 ເຂັມແລ້ວ ແລະຢູ່ໃກ້ຊິດກັບຜູ້ເປັນພະຍາດດັ່ງກ່າວ, ອັດຕາປ້ອງກັນບໍ່ໃຫ້ຕິດເຊື້ອພະຍາດມີເຖິງ 60% ແລະ ປ້ອງກັນບໍ່ໃຫ້ເປັນພະຍາດໄດ້ເຖິງ 80%, ບໍ່ມີຜູ້ປ່ວຍຄົນໃດມີອາການໜັກ ຫຼືອາການໜັກສາຫັດທີ່ມີຄວາມສ່ຽງອາດຈະເສຍຊີວິດ. ຄົນທັງຫຼາຍນັບມື້ນັບຮັບຮູ້ວ່າ: ການສັກວັກຊິນບໍ່ແມ່ນວ່າ “ຈະສັກຫຼືບໍ່”, ຫາກແມ່ນ “ຄວາມຈຳເປັນຕ້ອງໄດ້ສັກ”.
ນັບມາຮອດວັນທີ 2 ກໍລະກົດນີ້, ນັບລວມແລ້ວ, ຈີນໄດ້ສັກວັກຊິນໂຄວິດ-19 ໃຫ້ປະຊາຊົນຈີນແລ້ວຫຼາຍກວ່າ 1,24 ຕື້ຫຼອດ, ເປັນອັນດັບໜຶ່ງຂອງໂລກ. ພາຍຫຼັງເກີດມີການແຜ່ລະບາດຂອງພະຍາດໂຄວິດ-19 ເປັນຕົ້ນມາ, ຈີນກໍໄດ້ຍຶດໝັ້ນໃນຫຼັກການຖືເອົາວັກຊິນເປັນຜະລິດຕະພັນສາທາລະນະຂອງທົ່ວໂລກມາໂດຍຕະຫຼອດ, ເປັນປະເທດທີ່ໄດ້ສະໜອງວັກຊິນໃຫ້ໂລກຫຼາຍທີ່ສຸດ. ເດືອນແລ້ວນີ້, ວັກຊິນຂອງບໍລິສັດຊີໂນແວກຈີນກໍໄດ້ຖືກ WHO ຈັດເຂົ້າໃນບັນຊີລາຍການນຳໃຊ້ສຸກເສີນ ເຊິ່ງໄດ້ກາຍເປັນວັກຊິນຊະນິດທີ 2 ຂອງຈີນ ຖັດຈາກວັກຊິນຂອງບໍລິສັດຊີໂນຟາມຂອງຈີນ, ນີ້ໄດ້ນຳເອົາຄວາມຫວັງ ແລະ ຄວາມໝັ້ນໃຈຫຼາຍກວ່າເກົ່າມາໃຫ້ບັນດາປະເທດໃນໂລກ.
ມວນມະນຸດຈະຕ້ອງຕໍ່ສູ້ກັບພະຍາດໂຄວິດ-19 ເປັນໄລຍະຍາວນານ. ໃນອະນາຄົດ, ເຊື້ອພະຍາດດັ່ງກ່າວອາດຈະບຸກໂຈມຕີມະນຸດເຮົາດ້ວຍ “ຮູບແບບໃໝ່”. ແຕ່ໃນຂະນະດຽວກັນ, ວິທີ ແລະ ປະສົບການຮັບມືກັບເຊື້ອພະຍາດຂອງມະນຸດເຮົາກໍຈະດີຂຶ້ນກວ່າເກົ່າເລື້ອຍໆ. ຂໍພຽງແຕ່ພວກເຮົາຍຶດໝັ້ນຄວາມໝັ້ນໃຈ ແລະ ປະຕິບັດນະໂຍບາຍແລະມາດຕະການທີ່ຖືກຕ້ອງຕາມຫຼັກວິທະຍາສາດ, ໃຫ້ທົ່ວໂລກຮ່ວມແຮງຮ່ວມໃຈກັນ, ເຊື້ອວ່າ: ພວກເຮົາຈະສາມາດເອົາຊະນະການແຜ່ລະບາດຂອງເຊື້ອພະຍາດໄດ້ໃນອະນາຄົດອັນບໍ່ໄກນີ້.
Loading...