ກອງປະຊຸມຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍວ່າດ້ວຍການຄວບຄຸມເຄື່ອງດື່ມທີ່ມີທາດເຫຼົ້າ ຈັດຂຶ້ນໃນວັນທີ 19 ກັນຍານີ້ ທີ່ສະພາແຫ່ງຊາດ (ສພຊ) ເປັນປະທານຂອງທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ
ທ່ານ ຄໍາໃບ ດໍາລັດ ກ່າວວ່າ: ກົດໝາຍວ່າດ້ວຍການຄວບ ຄຸມເຄື່ອງດື່ມທີ່ມີທາດເຫຼົ້າໄດ້ປະກາດໃຊ້ ແລະ ຈັດຕັ້ງປະ ຕິບັດເປັນໄລຍະເວລາເກືອບ 10 ປີ ແລະ ຍັງບໍ່ທັນໄດ້ຮັບການປັບປຸງ ຫຼື ດໍາເນີນການປະເມີນຈັກຄັ້ງ ແລະ ໃນຊຸມປີຜ່ານມາ ເຫັນວ່າສະພາບການຄວບຄຸມ ຄຸ້ມຄອງ ແລະ ບໍລິ ໂພກເຄື່ອງດື່ມທີ່ມີທາດເຫົ້າພົບກັບຄວາມຫຍຸ້ງຍາກຫຼາຍບັນຫາ ຂາດການຕິດຕາມກວດກາຢ່າງຕໍ່ເນື່ອງ ແລະ ເຄື່ອງ ດື່ມທີ່ມີທາດເຫຼົ້ານີ້ເປັນເຄື່ອງ ດື່ມທີ່ມີສ່ວນປະສົມຂອງເອຕາໂນນ (Ethanol) ການບໍລິໂພກ ຫຼື ດື່ມເກີນຂອບເຂດຈະສົ່ງຜົນຮ້າຍ ຜົນກະທົບໂດຍກົງ ແລະ ທາງອ້ອມຕໍ່ສຸຂະ ພາບຮ່າງກາຍຂອງມະນຸດ ແລະ ສົ່ງຜົນກະທົບໂດຍກົງຕໍ່ຄອບຄົວ ເສດຖະກິດ-ສັງຄົມຂອງຊາດ ແລະ ເປັນສາເຫດທີ່ກໍ່ໃຫ້ເກີດພະຍາດຊຳເຮື້ອ ພາໃຫ້ເກີດອຸປະຕິເຫດ ອາຊະ ຍາກຳ ຄວາມບໍ່ເປັນລະບຽບຮຽບຮ້ອຍ ແລະ ບັນຫາອື່ນໆ ເຊິ່ງຄະນະປະຈໍາສະພາແຫ່ງຊາດໄດ້ຕົກລົງໃຫ້ຄະນະຮັບ ຜິດຊອບປະເມີນຜົນການຈັດຕັ້ງປະຕິບັດກົດໝາຍຈັດກອງປະຊຸມຮ່ວມ ກັບກະຊວງສາທາລະນະສຸກເພື່ອຮັບຟັງການລາຍງານຜົນການ ປະເມີນຜົນການຈັດຕັ້ງປະຕິບັດກົດໝາຍວ່າດ້ວຍການຄວບຄຸມເຄື່ອງດື່ມທີ່ມີທາດເຫຼົ້າໃນໄລຍະຜ່ານມາ ເພື່ອເປັນການສະຫຼຸບ ຖອດຖອນບົດຮຽນໃຫ້ແກ່ການຈັດຕັ້ງປະຕິບັດກົດໝາຍສະບັບດັ່ງກ່າວ ໂດຍຍົກໃຫ້ເຫັນດ້ານຕັ້ງໜ້າ ດ້ານຄົງຄ້າງ ສາເຫດທີ່ພາໃຫ້ມີຜົນກະທົບຕໍ່ການຈັດຕັ້ງປະຕິບັດກົດໝາຍເພື່ອຍົກສູງຄຸນ ນະພາບຂອງການຈັດຕັ້ງປະຕິບັດກົດໝາຍ ເຮັດໃຫ້ສະຕິເຄົາລົບກົດໝາຍທົ່ວສັງຄົມສູງຂຶ້ນເທື່ອລະກ້າວ ແລະ ການຕິດຕາມກວດກາ ການປະເມີນຜົນການຈັດຕັ້ງປະຕິບັດກົດໝາຍໃນຄັ້ງນີ້ເປັນຄັ້ງທຳອິດທີ່ໄດ້ຮ່ວມກັບກະຊວງສາທາ ລະນະສຸກ ແລະ ພາກ ສ່ວນທີ່ກ່ຽວຂ້ອງເພື່ອນຳເອົາບັນຫາ ຂໍ້ຄົງຄ້າງ ສິ່ງທ້າທາຍ ແລະ ທິດທາງແກ້ໄຂໃນຕໍ່ໜ້າໄປລາຍ ງານຕໍ່ກອງປະຊຸມຄະນະປະຈຳສະພາແຫ່ງຊາດ ແລະ ນຳເຂົ້າລາຍງານຕໍ່ກອງປະຊຸມສະໄໝສາມັນເທື່ອທີ 8 ຂອງສະ ພາແຫ່ງຊາດຊຸດທີ IX ພິຈາລະນາ ແລະ ອອກມະຕິເພື່ອຮັບຮອງ.
ດຣ ໄພວັນ ແກ້ວປະເສີດ ໄດ້ລາຍງານການ ປະເມີນຜົນການຈັດຕັ້ງປະຕິບັດກົດໝາຍວ່າດ້ວຍການ ຄວບຄຸມເຄື່ອງດື່ມທີ່ມີທາດເຫຼົ້າ ຈາກນັ້ນ ບັນດາຜູ້ເຂົ້າ ຮ່ວມໄດ້ພ້ອມກັນຄົ້ນຄວ້າ ແລະ ປະກອບຄຳຄິດຄຳເຫັນເພື່ອຊອກໃຫ້ເຫັນໄດ້ດ້ານດີ ຜົນງານ ຂໍ້ຄົງຄ້າງ ສາເຫດ ແລະ ວິທີແກ້ໄຂໃນຕໍໜ້າເພື່ອໃຫ້ກະຊວງດັ່ງກ່າວນຳໄປຄົ້ນຄວ້າພິຈາລະນາປັບປຸງເພື່ອກະກຽມລາຍງານຕໍ່ກອງປະ ຊຸມສະໄໝສາມັນເທື່ອທີ 8 ຂອງ ສພຊ ຊຸດທີ IX ທີ່ຈະໄຂຂຶ້ນໃນຕໍ່ໜ້ານີ້.
