ວັນທີ 29 ກໍລະກົດ 2024 ທີ່ຫ້ອງປະຊຸມສະພາປະຊາຊົນ ແຂວງ ອັດຕະປື, ຄະນະກຳມະການລະດັບຊາດໄດ້ຈັດກອງປະຊຸມປະເມີນຜົນການຈັດຕັ້ງປະຕິບັດ ລັດຖະທຳມະນູນແຫ່ງ ສປປ ລາວ ສະບັບປີ 2015 ໂດຍເປັນປະທານຂອງ ທ່ານ ລາວປ່າວຊົ່ງ ນະວົງໄຊ ກຳມະການສູນກາງພັກ ຮອງຫົວໜ້າໂຄສະນາອົບຮົມສູນກາງພັກ, ຄະນະກໍາມະການລະດັບຊາດ ປັບປຸງລັດຖະທໍາມະ ນູນ.
ທ່ານ ມະນີໂສ ຊາມົນຕີ ຮອງປະທານຄະນະກຳມະການເສດ ຖະກິດ, ເຕັກໂນໂລຊີ ແລະ ສິ່ງແວດລ້ອມ ສະມາຊິກສະພາແຫ່ງ ຊາດ ເຂດເລືອກຕັ້ງ 17 ໄດ້ລາຍງານການຈັດຕັ້ງປະຕິບັດການ ປະເມີນຜົນລັດຖະທໍາມະນູນ ສະບັບປີ 2015 ມາຮອດປັດຈຸບັນແມ່ນໄດ້ມີການປັບປຸງຄັ້ງທີ 2. ເປັນເວລາ 9 ປີມານີ້ລັດຖະທໍາມະນູນ ສະບັບປີ 2015 ໄດ້ເປັນກົດ ໝາຍແມ່ພື້ນຖານສໍາຄັນ ຂອງປະເທດ ຊາດ, ເປັນບ່ອນອີງແກ່ການສຶກສາ ແລະ ປັບປຸງບັນດາກົດໝາຍ ເພື່ອເປັນເຄື່ອງມືໃນການຄຸ້ມຄອງລັດ, ຄຸ້ມຄອງເສດ ຖະກິດ-ສັງຄົມດ້ວຍກົດໝາຍ .
ຈຸດປະສົງຂອງກອງປະຊຸມຄັ້ງນີ້ ເພື່ອສະຫຼຸບຕີລາຄາການຈັດ ຕັ້ງປະຕິບັດລັດຖະທໍາມະນູນໃນໄລຍະເກືອບ 10 ປີໃຫ້ແຕ່ລະອົງ ການຈັດຕັ້ງ ພັກ-ລັດ ເຫັນໄດ້ຂໍ້ສະດວກ, ຂໍ້ຫຍຸ້ງຍາກ, ຜົນສຳ ເລັດ, ບັນຫາຄົງຄ້າງ ພ້ອມທັງສາເຫດ, ບົດບັນຍັດທີ່ສອດຄ່ອງ ຫຼື ບໍ່ສອດຄ່ອງ, ບົດຮຽນ ແລະ ບັນຫາຕັ້ງຂຶ້ນ ເພື່ອເປັນຂໍ້ມູນໃຫ້ແກ່ຄະນະກຳມະການຄົ້ນຄວ້າ, ປັບປຸງເນື້ອໃນຂອງລັດຖະທຳ ມະນູນ ສະບັບປີ 2015 ໃຫ້ຖືກຕ້ອງ, ຄົບຖ້ວນ, ສອດຄ່ອງ, ຮັດ ກຸມ ແລະ ສາມາດຈັດຕັ້ງປະຕິບັດປາກົດຜົນເປັນຈິງໄດ້.
ໃນກອງປະຊຸມ ບັນດາຜູ້ຕາງໜ້າອົງການປົກຄອງແຂວງ, ຂະ ແໜງການກ່ຽວຂ້ອງແຕ່ລະອົງການຈັດຕັ້ງຂອງແຂວງ ໄດ້ຜັດປ່ຽນກັນປະກອບຄໍາເຫັນ ແລະ ໄດ້ສຸມໃສ່ຄົ້ນຄວ້າຕໍ່ແຕ່ລະເນື້ອຂອງລັດຖະທຳມະນູນຢ່າງມີຈຸດສຸມ ເຊິ່ງເຊື່ອໝັ້ນວ່າຈະເປັນຂໍ້ມູນສຳຄັນໃຫ້ແກ່ຄະນະຮັບຜິດຊອບ ນຳໄປຄົ້ນຄວ້າ, ວິເຄາະວິໄຈ ປັບ ປຸງຄືນ ເພື່ອເຮັດໃຫ້ລັດຖະທຳ ມະນູນດັ່ງກ່າວ ມີເນື້ອໃນຄົບ ຖ້ວນ, ສາມາດຈັດຕັ້ງປະຕິບັດດ້ວຍຄຸນນະພາບ, ມີຄວາມສັກ ສິດສູງຂຶ້ນ, ສັງຄົມມີຄວາມສະຫງົບ, ປະຊາທິປະໄຕ, ຍຸຕິທຳ, ສີວິໄລ ແລະ ນໍາໃຊ້ໄດ້ຢ່າງສອດຄ່ອງ ກັບສະພາບການພັດທະນາໃນໄລຍະປ່ຽນແປງໃໝ່.
Cr: ໄພບູນ
