ປັດຈຸບັນ ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໃຫ້ຄວາມສຳຄັນຕໍ່ການດຳເນີນມາດຕະການປ້ອງກັນ ແລະ ຕິດຕາມຜູ້ເດີນທາງເຂົ້າ-ອອກ ຕາມຈຸດຜ່ານດ່ານຕ່າງໆໃນທົ່ວປະເທດຢ່າງເຂັ້ມງວດ, ທຸກຄົນທີ່ເດີນທາງເຂົ້າມາຕ້ອງຜ່ານການກວດອຸນຫະພູມຮ່າງກາຍ ແລະ ຈຳກັດບໍລິເວນທີ່ກຳນົດໄວ້ຈົນກວ່າຈະຄົບ 14 ວັນ, ມາຮອດປັດຈຸບັນມີຜູ້ຖືກຈຳກັດບໍລິເວນແລ້ວ 2,420 ຄົນ, ໃນຈຳນວນທັງໝົດ 40 ສູນທົ່ວປະເທດ ພ້ອມທັງເກັບຕົວຢ່າງມາກວດວິເຄາະທັງໝົດ ແຕ່ບໍ່ພົບຜູ້ຕິດເຊື້ອ.

ໃນໂອກາດຖະແຫຼງຂ່າວປະຈຳວັນກ່ຽວກັບສະພາບການລະບາດຂອງພະຍາດໂຄວິດ-19 ໃນວັນທີ 10 ທັນວານີ້ ທີ່ກະຊວງສາທາລະນະສຸກ ດຣ ນາງ ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກແຈ້ງໃຫ້ຮູ້ວ່າ ປັດຈຸບັນ ສະພາບຜູ້ຕິດເຊື້ອ ແລະ ຜູ້ເສຍຊີວິດຍ້ອນພະຍາດໂຄວິດ-19 ໃນທົ່ວໂລກ ແລະ ປະເທດໃກ້ຄຽງຍັງມີ່ທ່າອ່ຽງເພີ່ມສູງຂື້ນຢ່າງຕໍ່ເນື່ອງ, ເພື່ອຫຼຸດຜ່ອນ ແລະ ຢັບຢັ້ງການລະບາດຂອງພະຍາດນີ້ ຮຽກຮ້ອງໃຫ້ທຸກພາກສ່ວນໃນສັງຄົມຈົ່ງພ້ອມກັນເອົາໃຈໃສ່ສືບຕໍ່ປະຕິບັດມາດຕະການປ້ອງກັນ ແລະ ສະກັດກັ້ນພະຍາດໂຄວິດ-19 ຢ່າງເຂັ້ມງວດ ໂດຍສະເພາະການດຳລົງຊີວິດປົກກະຕິແບບໃໝ່ ຫຼື ນິວນໍມໍ ໃຫ້ກາຍເປັນຄວາມຊິນເຄີຍ ເປັນຕົ້ນ ເວລາອອກຈາກເຮືອນຕ້ອງໃສ່ຜ້າອັດປາກ-ອັດດັງ, ໝັ່ນລ້າງມືເລື້ອຍໆດ້ວຍນ້ຳສະອາດ ໃສ່ສະບູ ຫຼື ເຈວລ້າງມືທີ່ມີນ້ຳຢາຂ້າເຊື້ອ ພ້ອມທັງຮັກສາໄລຍະຫ່າງ 1 ຫາ 2 ແມັດຂື້ນໄປ, ກິນອາຫານທີ່ສຸກ, ແຍກເຄື່ອງໃຊ້ສ່ວນຕົວບໍ່ໃຊ້ຮ່ວມກັບຜູ້ອື່ນ, ເມື່ອຮອດເຮືອນຄວນອາບນ້ຳ ແລະ ປ່ຽນເສື້ອຜ້າທັນທີ ທັງໝົດນີ້ແມ່ນເພື່ອປ້ອງກັນການລະບາດຂອງພະຍາດໂຄວິດ-19.

ໂອກາດນີ້ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ຍັງແຈ້ງໃຫ້ຮູ້ກ່ຽວກັບສະພາບການລະບາດຂອງພະຍາດໄຂ້ຍຸງລາຍ ຫຼື ໄຂ້ເລືອດອອກຢູ່ປະເທດເຮົາ ໃນວັນທີ 9 ທັນວານີ້ ມີຜູ້ຕິດເຊື້ອທັງໝົດ 18 ຄົນ ແລະ ບໍ່ມີຜູ້ເສຍຊີວິດ, ສ່ວນຕົວເລກຜູ້ຕິດເຊື້ອສະສົມທັງໝົດ 8,183 ຄົນ. ສຳລັບແຂວງທີ່ມີການລາຍງານຜູ້ຕິດເຊື້ອຫຼາຍກວ່າໝູ່ແມ່ນນະຄອນຫຼວງວຽງຈັນ ມີເຖິງ 1,891 ຄົນ, ຮອງລົງມາແມ່ນບໍລິຄຳໄຊ 934 ຄົນ, ບໍ່ແກ້ວ 742 ຄົນ ແລະ ແຂວງວຽງຈັນ 719 ຄົນ, ຈຳນວນຜູ້ເສຍຊີວິດທັງໝົດ 13 ຄົນ, ໃນນັ້ນ ນະຄອນຫຼວງ 4 ຄົນ, ບໍລິຄຳໄຊ 2 ຄົນ, ຄຳມ່ວນ 2 ຄົນ, ສ່ວນແຂວງໄຊຍະບູລີ, ຊຽງຂວາງ, ສະຫວັນນະເຂດ, ຜົ້ງສາລີ ແລະ ອຸດົມໄຊແຂວງລະ 1 ຄົນ.

Loading...