ວັນທີ 3 ກັນຍາ 2024 ສູນແກ້ໄຂຂໍ້ຂັດແຍ່ງທາງດ້ານເສດຖະກິດ ກະຊວງຍຸຕິທໍາ ຮ່ວມກັບ ຄະນະສານການຄ້າ ສານປະຊາຊົນສູງສຸດ ໄດ້ຈັດກອງປະຊຸມປັບປຸງເນື້ອໃນ ໃສ່ “ຮ່າງ” ບົດບັນທຶກຮ່ວມ ລະຫວ່າງ ສູນແກ້ໄຂຂໍ້ຂັດແຍ່ງທາງດ້ານເສດຖະກິດ ກະຊວງຍຸຕິທໍາ ແລະ ຄະນະສານການຄ້າ ສານປະຊາຊົນສູງສຸດ ວ່າດ້ວຍການກໍານົດກົນໄກການປະສານງານກ່ຽວກັບວຽກງານແກ້ໄຂຂໍ້ຂັດແຍ່ງທາງດ້ານເສດຖະກິດ
ຢູ່ໂຮງແຮມລາວພລາຊ່າ, ນະຄອນຫຼວງວຽງຈັນ ໂດຍການເປັນປະທານຮ່ວມຂອງ ທ່ານ ນາງ ດວງມະນີ ລາວມາວ ຫົວໜ້າສູນແກ້ໄຂຂໍ້ຂັດແຍ່ງທາງດ້ານເສດຖະກິດ ກະຊວງຍຸຕິທຳ ແລະ ທ່ານ ນາງ ຈັນຖະໜອມ ສີລິວັດ ຫົວໜ້າຄະນະສານການຄ້າ ສານປະຊາຊົນສູງສຸດ.
ຈຸດປະສົງ ເພື່ອປັບປຸງເນື້ອໃນຂອງ “ຮ່າງ” ບົດບັນທຶກຮ່ວມດັ່ງກ່າວ ໃຫ້ແທດເໝາະກັບການຈັດຕັ້ງປະຕິບັດວຽກງານຕົວຈິງ ຕາມພາລະບົດບາດ, ໜ້າທີ່ ແລະ ຂອບເຂດສິດຂອງ ສູນແກ້ໄຂຂໍ້ຂັດແຍ່ງທາງດ້ານເສດຖະກິດ ກະຊວງຍຸຕິທຳ ແລະ ຄະນະສານການຄ້າ ສານປະຊາຊົນສູງສຸດ ເພື່ອສ້າງກົນໄກການປະສານງານ ຂອງສອງພາກສ່ວນ ໃຫ້ຖືກຕ້ອງ, ວ່ອງໄວ, ມີຄວາມເປັນເອກະພາບ ແລະ ສອດຄ່ອງຕາມກົດໝາຍ ແນໃສ່ເຮັດໃຫ້ການຈັດຕັ້ງປະຕິບັດວຽກງານແກ້ໄຂຂໍ້ຂັດແຍ່ງທາງດ້ານເສດຖະກິດ ມີປະສິດທິພາບ ແລະ ປະສິດທິຜົນໃນຂອບເຂດທົ່ວປະເທດ.
ໃນພິທີ ທ່ານ ບຸນເພັງ ວົງໂພທອງ ຮອງຫົວໜ້າສູນແກ້ໄຂຂໍ້ຂັດແຍ່ງທາງດ້ານເສດຖະກິດ ໄດ້ຜ່ານ “ຮ່າງ” ບົດບັນທຶກຮ່ວມ ລະຫວ່າງ ສູນແກ້ໄຂຂໍ້ຂັດແຍ່ງທາງດ້ານເສດຖະກິດ ກະຊວງຍຸຕິທຳ ແລະ ຄະນະສານການຄ້າ ສານປະຊາຊົນສູງສຸດ ວ່າດ້ວຍການກຳນົດກົນໄກປະສານງານ ກ່ຽວກັບວຽກແກ້ໄຂຂໍ້ຂັດແຍ່ງທາງດ້ານເສດຖ ກິດ ຊຶ່ງຮ່າງດັ່ງກ່າວໄດ້ກຳນົດກົນໄກການປະສານງານ, ເນື້ອໃນການຈັດຕັ້ງປະຕິບັດ; ຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ພ້ອມກັນປະກອບຄຳຄິດເຫັນ ໃສ່ເນື້ອໃນຂອງ “ຮ່າງ” ບົດບັນທຶກດັ່ງກ່າວ ທີ່ເຫັນວ່າຍັງບໍ່ທັນສອດຄ່ອງຕາມກົດໝາຍ ເພື່ອເຮັດໃຫ້ “ຮ່າງ” ບົດບັນທຶກຮ່ວມດັ່ງກ່າວ ມີເນື້ອໃນຄົບຖ້ວນ, ສົມບູນ, ສອດຄ່ອງຕາມກົດໝາຍ ສາມາດນຳໄປຈັດຕັ່ງປະຕິບັດເຂົ້າໃນວຽກງານຕົວຈິງໃຫ້ມີປະສິດທິຜົນຍິ່ງຂຶ້ນ.
ຂ່າວ-ພາບ: ຊາຍພິມພອນ ສີຣິວົງໄຊ
