ຄະນະໂຄສະນາອົບຮົມສູນກາງພັັກ ຈັດປາຖະກະຖາ ຜົນສຳ ເລັດກອງປະຊຸມຄົບຄະນະຄັ້ງທີ 3 ສະໄໝທີ XX ຂອງພັກກອມ ມູນິດຈີນ ຂຶ້ນໃນວັນທີ 8 ສິງຫາ 2024 ໂດຍໃຫ້ກຽດປາຖະກະ ຖາຂອງ ທ່ານ ນາງ ຟ່າງຮອງ ອັກເອກຄະລັດຖະທູດຜູ້ມີອຳນາດເຕັມ ແຫ່ງ ສປ ຈີນ ປະຈຳລາວ, ມີທ່ານ ລາວປາວຊົ່ງ ນະວົງໄຊ ຮອງຫົວໜ້າຄະນະໂຄສະນາອົບຮົມສູນກາງພັກ, ພ້ອມດ້ວຍຜູ້ຕາງໜ້າຈາກບັນດາກະຊວງ ອ້ອມຂ້າງສູນກາງເຂົ້າຮ່ວມ.
ທ່ານ ນາງ ຟ່າງຮອງ ໄດ້ຍົກໃຫ້ເຫັນຜົນສຳເລັດ ກອງປະຊຸມຄົບຄະນະຄັ້ງທີ 3 ສະໄໝທີ XX ຂອງພັກກອມມູນິດຈີນ ໄດ້ໄຂຂຶ້ນທີ່ນະຄອນຫລວງປັກກິ່ງ ໃນລະຫວ່າງວັນທີ 15-18 ສິງຫາ 2024 ເຊິ່ງກອງປະຊຸມດັ່ງກ່າວ ໄດ້ຕີລາຄາສູງຕໍ່ພຶດຕິກຳທີ່ສຳ ເລັດຜົນ ແລະ ຜົນງານອັນຍິ່ງໃຫຍ່ຂອງການລົງເລິກການປະຕິ ຮູບຢ່າງຮອບດ້ານ ນັບແຕ່ຍຸກໃໝ່ເປັນຕົ້ນມາ, ໄດ້ຄົ້ນຄວ້າບັນຫາທີ່ລົງເລິກການປະຕິຮູບຢ່າງຮອບດ້ານ ແລະ ຊຸກຍູ້ຄວາມທັນສະ ໄໝແບບຈີນ, ຊຶ່ງເຫັນວ່າໃນປັດຈຸບັນ ແລະ ໄລຍະຕໍ່ໜ້າ ແມ່ນໄລຍະທີ່ເປັນຂໍກຸນແຈສຳຄັນ ໃນການຊຸກຍູ້ພາລະກິດອັນຍິ່ງໃຫຍ່ ທີ່ສ້າງສາປະເທດໃຫ້ເຂັ້ມແຂງ ແລະ ຟື້ນຟູຄວາມຈະເລີນຂອງປະຊາຊາດຮອບດ້ານ ດ້ວຍຄວາມທັນສະໄໝແບບຈີນ ຊຶ່ງຄວາມທັນສະໄໝແບບຈີນ ແມ່ນໄດ້ຮັບການຊຸກຍູ້ ໃຫ້ກ້າວໄປຂ້າງໜ້າຢ່າງບໍ່ຢຸດຢັ້ງ ໃນຂະບວນການປະຕິຮູບ ແລະ ເປີດປະຕູສູ່ພາຍ ນອກຢ່າງແນ່ນອນ.
ກອງປະຊຸມດັ່ງກ່າວ ໄດ້ເນັ້ນໜັກກ່ຽວກັບການລົງເລິກການປະຕິຮູບຢ່າງຮອບດ້ານ, ຕ້ອງຍຶດໝັ້ນລັດທິມາກ-ເລນິນ, ແນວືຄິດເໝົາເຈີຕຸງ, ທິດສະດີເຕີ້ງສຽວພິງ; ສືບຕໍ່ປັບປຸງ ແລະ ພັດ ທະນາລະບອບສັງຄົມນິຍົມ ທີ່ມີສີສັນພິເສດຂອງຈີນໃຫ້ສົມບູນ, ຊຸກຍູ້ການຫັນເປັນທັນສະໄໝຂອງລະບົບ ແລະ ຄວາມສາມາດດ້ານການບໍລິຫານຂອງຊາດ. ນອກຈາກນີ້, ກອງປຊຸມຍັງໄດ້ວາງແຜນຢ່າງເປັນລະບົບ ກ່ຽວກັບການລົງເລິກການປະຕິຮູບຢ່າງຮອບດ້ານ ໂດຍສະເພາະ ການສ້າງໂຄງປະກອບເສດຖະກິດຕະ ຫລາດ ສັງຄົມນິຍົມໃນລະດັບສູງ, ປັບປຸງໂຄງປະກອບ ແລະ ກົນໄກຊຸກຍູ້ການພັດທະນາເສດຖະກິດ ທີ່ມີຄຸນນະພາບສູງໃຫ້ຄົບຖ້ວນ, ສ້າງໂຄງປະກອບ ແລະ ກົນໄກສະໜັບສະໜູນການປະ ດິດສ້າງໃໝ່ຮອບດ້ານ, ປັບປຸງລະບົບຄຸ້ມຄອງ ເສດຖະກິດມະຫາພາກໃຫ້ຄົບຖ້ວນ, ປັບປຸງໂຄງປະກອບ ແລະ ກົນໄກຊຸກຍູ້ພັດທະ ນາຕົວເມືອງ ແລະ ຊົນນະບົດ ແບບເຊື່ອມໂຍງເຂົ້າກັນໃຫ້ສົມບູນ, ປັບປຸງລະບົບການປົກຄອງປະເທດຕາມກົດໝາຍສັງຄົມນິຍົມໃຫ້ສົມບູນ, ປັບປຸງຊີວິດການເປັນຢູ່ຂອງປະຊາຊົນ.
ພ້ອມນີ້ ຍັງໄດ້ຄົ້ນຄວ້າຕີລາຄາສະພາບການ ແລະ ໜ້າທີ່ໃນປັດຈຸບັນ, ໂດຍເນັ້ນເຖິງການບັນລຸເປົ້າໝາຍ ພັດທະນາເສດຖະ ກິດ-ສັງຄົມໃນຕະຫລອດປີ ຢ່າງເດັດດ່ຽວບໍ່ຫວັ່ນໄຫວຄອນ ແຄນ, ຕ້ອງອີງຕາມແຜນນະໂຍບາຍຂອງສູນກາງພັກ ກ່ຽວກັບວຽກງານເສດຖະກິດ, ຈັດຕັ້ງປະຕິບັດນະໂຍບາຍມະຫາພາກໃຫ້ດີ, ຕັ້ງໜ້າເປີດກວ້າງຄວາມຕ້ອງການພາຍໃນປະເທດ, ພັດທະນາກຳລັງການຜະລິດໃນຄຸນນະພາບໃໝ່ ຕາມສະພາບເງື່ອນໄຂຕົວຈິງຂອງທ້ອງຖິ່ນ, ເລັ່ງລັດບຳລຸງສ້າງແຮງຂັບເຄື່ອນໃໝ່ດ້ານການຄ້າກັບຕ່າງປະເທດ, ຊຸກຍູ້ການພັດທະນາແບບສີຂຽວ ແລະ ກາກບອນຕໍ່າຢ່າງໜັກແໜ້ນ, ຮັບປະກັນ ແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ແລະ ອື່ນໆ.
