ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ປາຖະກະຖາວັນສື່ມວນຊົນລາວ ແລະ ການພິມຈຳໜ່າຍ ຄົບຮອບ 70 ປີ

ພິທີປາຖະກະຖາວັນສື່ມວນຊົນລາວ ແລະ ການພິມຈຳໜ່າຍ ຄົບຮອບ 70 ປີ ( 13 ສິງຫາ 1950-13 ສິງຫາ 2020) ໄດ້ຈັດຂຶ້ນໃນວັນທີ 13 ສິງຫານີ້ ຢູ່ສະໂມສອນໃຫຍ່ຂອງແຂວງ, ໃຫ້ກຽດເປັນປະທານ ແລະ ປາຖະ ກະຖາໂດຍທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີການນຳຂອງແຂວງ, ແຂກຖືກເຊີນ, ພະນັກງານອາວຸໂສບຳນານ ແລະ ພະນັກງານທົ່ວພະແນກ ຖວທ ເຂົ້າຮ່ວມຮັບຟັງ.
ໃນພິທີທ່ານປະທານໄດ້ຍົກໃຫ້ເຫັ່ນປະຫວັດຄວາມເປັນມາຂອງວຽກງານສື່ໃນໄລຍະຜ່ານມາ ເຊິ່ງມີບາງຕອນທ່ານໄດ້ເວົ້າວ່າ: ເພື່ອປະຕິບັດຕາມແນວທາງ-ແຜນນະໂຍບາຍ “ເປີດກວ້າງຂະຫຍາຍແນວໂຮມ, ຂະຫຍາຍສົງຄາມປະຊາຊົນຢ່າງແຂງແຮງ, ໜີບຮັດກຳລັງສັດຕູ…” ພັກເຮົາໄດ້ຮຽກໂຮມຜູ້ແທນຫຼາຍກວ່າ 150 ທ່ານທີ່ຕາງໜ້າໃຫ້ກຳລັງປະກອບອາວຸດ, ອົງການຈັດຕັ້ງມະຫາຊົນ, ສາສະໜາ, ປະຊາຊົນບັນດາເຜົ່າຈາກເຂດຕໍ່ຕ້ານ ແລະ ເຂດປົກຄອງຊົ່ວຄາວຂອງສັດຕູ ເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດໃນວັນທີ 13 ສິງຫາ 1950 ກອງປະຊຸມໄດ້ຕົກລົງສ້າງຕັ້ງ “ແນວລາວອິດສະຫລະ” ແລະ “ລັດຖະບານລາວຕໍ່ຕ້ານ”, ໂດຍມີສະເດັດເຈົ້າ ສຸພານຸວົງ ເປັນປະທານແນວລາວອິດສະລະ ແລະ ນາຍົກລັດຖະມົນຕີຂອງລັດຖະບານລາວຕໍ່ຕ້ານ ແລະ ໃນມື້ດຽວກັນນັ້ນ, ກອງປະຊຸມກໍໄດ້ຕົກລົງສ້າງຕັ້ງໜັງສືພິມປະຕິວັດຂອງຕົນຂຶ້ນໂດຍໃສ່ຊື່ວ່າ: ໜັງສືພິມ “ລາວອິດສະຫລະ”. ໜັງສືພິມນີ້, ຮູບນອກແມ່ນເປັນສຽງຂອງແນວລາວອິດສະລະ ແລະ ລັດຖະບານລາວຕໍ່ຕ້ານໃນເວລານັ້ນ, ຊຶ່ງເນື້ອແທ້ກໍແມ່ນໜັງສືພິມຂອງພັກ ແລະ ໄດ້ເລີ່ມພິມໜັງສືພິມລາວອິດສະຫລະ ປີ 1958-1959 ສະພາບທາງການເມືອງມີຄວາມເຄັ່ງຕຶງ, ລັດຖະບານຂອງສະເດັດເຈົ້າສຸວັນນະພູມມາ ຖືກໂຄ່ນລົ້ມ, ສະເດັດເຈົ້າສຸພານຸວົງ ແລະ ບັນດາຜູ້ນຳຂອງແນວລາວຮັກຊາດຖືກຈັບກຸມຄຸມຂັງເຂົ້າຄຸກໂພນເຄັງ, ຊຶ່ງໃນນັ້ນມີທ່ານ ສີຊະນະ ສີສານ ແລະ ທ່ານ ຄຳຜາຍ ບຸບຜາ ຫົວໜ້າໜັງສືພິມລາວຮັກຊາດ ກໍຖືກຈັບເຊັ່ນດຽວກັນ. ສະນັ້ນ, ໜັງສືພິມລາວຮັກຊາດ, ໂຮງພິມລວມທັງສຳນັກພິມກໍຖືກປິດ ແລະ ຢຸດຕິການຈຳໜ່າຍຊົ່ວຄາວ, ເດືອນສິງຫາ 1975 ຊຶ່ງເປັນໄລຍະຝ່າຍກຳລັງປະຕິວັດໄດ້ຮັບໄຊຊະນະໃນຂອບເຂດທົ່ວປະເທດ, ໜັງສືພິມ “ລາວຮັກຊາດ” ໄດ້ກັບຄືນມາຕັ້ງສຳນັກງານຢູ່ນະຄອນຫຼວງວຽງຈັນ ໂດຍປ່ຽນຊື່ເປັນໜັງສືພິມ “ສຽງປະຊາຊົນ” ຊຶ່ງຢູ່ໃນສະພາບແວດລ້ອມແຫ່ງບາດລ້ຽວປະຫວັດສາດ ທີ່ມີຄວາມໝາຍສຳຄັນພິເສດໃນການແບກຫາບໜ້າທີ່ອັນສັກກະລະບູຊາ ແລະ ມີກຽດສະຫງ່າຂອງໄຊຊະນະລວມ, ໄດ້ຍາດເອົາເອກະລາດ, ອິດສະລະພາບ ມາໃຫ້ປະຊາຊົນທັງຊາດ ຫຼັງຈາກກອງປະຊຸມໃຫຍ່ຄັ້ງທີ III ຂອງພັກໃນວັນທີ 22 ມີນາ 1983 ສູນກາງພັກປະຊາຊົນ ປະຕິວັດລາວ ໄດ້ຕົກລົງປ່ຽນຊື່ໜັງສືພິມ “ສຽງປະຊາຊົນ” ມາເປັນໜັງສືພິມ “ປະຊາຊົນ” ສຽງຂອງສູນກາງພັກ ປ ປ ລາວ ຈົນເຖິງປະຈຸບັນ ໜັງສືພິມປະຊາຊົນສຽງຂອງສູນກາງພັກໄດ້ຮັບການພັດທະນາ ແລະ ເຕີບໃຫຍ່ຂະຫຍາຍຕົວເປັນກ້າວໆບາງຄັ້ງມີຈຳນວນພິມ 8.000-10.000 ສະບັບ. ໃນໄລຍະແຕ່ປີ 1982-1985 ມີຍອດພິມຈຳໜ່າຍເຖິງ 22.000 ສະບັບ. ນັບແຕ່ມື້ສ້າງຕັ້ງຈົນເຖິງປະຈຸບັນ ໄດ້ມີການພົວພັນຮ່ວມມືກັນຢ່າງສະໜິດແໜ້ນລະຫວ່າງໜັງສືພິມປະຊາຊົນສຽງຂອງສູນກາງພັກ ປປ ລາວ ກັບໜັງສືພິມ ເຍິນເຢິນ ສຽງຂອງສູນກາງພັກກອມມູນິດຫວຽດນາມ ແລະ ໜັງສືພິມເຢິນໝິງຢື້ເປົ້າສຽງຂອງພັກກອມມູນິດຈີນ ແລະ ບັນດາປະເທດສັງຄົມນິຍົມອື່ນໆ. ມາໃນວັນທີ 13 ສິງຫາ 1960 ວິທະຍຸກະຈາຍສຽງຂອງຝ່າຍປະເທດລາວ ດ້ຮັບການສ້າງຕັ້ງຂຶ້ນດ້ວຍກຳລັງພິເສດຂອງສູນກາງພັກ ແລະ ໄດ້ດຳເນີນງານໄປໃນຂະນະທີ່ສະພາບການຂອງການປະຕິວັດລາວໄດ້ມີການປ່ຽນແປງຢ່າງແຂງແຮງ ພາຍຫຼັງປະເທດຊາດໄດ້ຮັບການປົດປ່ອຍ, ຈຶ່ງໄດ້ປ່ຽນຊື່ມາເປັນວິທະຍຸກະຈາຍສຽງແຫ່ງຊາດ ກໍ່ຄືວິທະຍຸກະຈາຍສຽງແຫ່ງຊາດລາວ ໃນເວລາຕໍ່ມາຈົນເຖິງປະຈຸບັນ. ເວົ້າລວມແລ້ວ, ນັບແຕ່ມື້ປົດປ່ອຍມາຮອດປະຈຸບັນ, ວິທະຍຸກະຈາຍສຽງແຫ່ງຊາດລາວຍັງເປັນສື່ທີ່ນຳໜ້າໃນການເຮັດໜ້າທີ່ໂຄສະນາເຜີຍແຜ່ແນວທາງຂອງພັກ, ການປົກປັກຮັກສາ ແລະ ພັດທະນາປະເທດຊາດຂອງປວງຊົນລາວດ້ວຍການລາຍງານຂ່າວທີ່ມີທັງພາສາລາວ, ຊົນເຜົ່າ, ຫວຽດນາມ, ຂະແມ, ໄທ, ຝຣັ່ງ ແລະ ພາສາອັງກິດ.
ສຳລັບແຂວງບໍລິຄຳໄຊ ເພື່ອຕອບສະໜອງດ້ານຂໍ້ມູນຂ່າວສານໃຫ້ກວ້າງຂວາງທົ່ວເຖິງກວ່າເກົ່າ ໂດຍການສົມທົບກັບແຂວງ, ເມືອງ ແລະ ກະຊວງ ໄດ້ສ້າງຕັ້ງສະຖານີວິທະຍຸຂະໜາດນ້ອຍ ຢູ່ບັນດາເມືອງທີ່ມີເງື່ອນໄຂ ຊຶ່ງປະຈຸບັນທົ່ວແຂວງມີສະຖານີວິທະຍຸທັງຫມົດ 5 ແຫ່ງ, ສະຖານນີວິທະຍຸຂັ້ນເມືອງ 4 ແຫ່ງ ອອກອາກາດສະເລ່ຍ 4-8 ຊົ່ວໂມງຕໍ່ວັນ, ວິທະຍຸຂັ້ນແຂວງ 1 ແຫ່ງ ອອກອາກາດ 16 ຊົ່ວໂມງຕໍ່ວັນ ແລະ ສະຖານີໂທລະພາບ 1 ແຫ່ງ ອອກອາກາດ ສະເລ່ຍ 4-6 ຊົ່ວໂມງຕໍ່ວັນ. ຮອດປີ 2001 ກໍໄດ້ສ້າງຕັ້ງວາລະສານບໍລິຄໍາໄຊ ລາຍໄຕມາດພິມຄັ້ງລະ 1.000 ຫົວ, ປີ 2007 ສ້າງຕັ້ງໜັງສືພິມບໍລິຄໍາໄຊ ຈັດພິມເປັນລາຍສັບປະດາຈັດພິມ 400 ສະບັບຕໍ່ອາທິດ ແລະ ປີ 2014 ໄດ້ສ້າງຕັ້ງເວບໄຊ-ສໍາເນົາຟີມບໍລິຄໍາໄຊ ແລະ ໄດ້ມີການເຄື່ອນໄຫວ ເປັນປົກກະຕິຕໍ່ເນື່ອງມາເຖິງປະຈຸບັນ ແລະ ພາຫະນະສື່ມວນຊົນຂັ້ນຮາກຖານບ້ານ ທີ່ຂາດບໍ່ໄດ້ກໍແມ່ນໂທລະໂຄ່ງ ຊຶ່ງໄດ້ນໍາໃຊ້ເກືອບ 100% ຂອງຈໍານວນບ້ານໃນທົ່ວແຂວງ. ມາເຖິງປະຈຸບັນ ແຂວງບໍລິຄຳໄຊ ຍັງໄດ້ນໍາໃຊ້ເຄືອຂ່າຍອິນເຕີເນັດ ອອກຂ່າວອອນລາຍເຊັ່ນ: ເຟກບຸກຂອງວິທະຍຸ, ໂທລະພາບ, ໜັງສືພິມ ແລະ ເວບໄຊ ໃນການໂພດຂໍ້ຄວາມ, ບົດຂ່າວ-ຮູບພາບ ແລະ ມີທັງຖ່າຍທອດສົດລາຍການວິທະຍຸ ເພື່ອເຮັດໃຫ້ສາມາດນໍາເອົາຂໍ້ມູນຂ່າວສານເຜີຍແຜ່ໃຫ້ເຂົ້າເຖິງເປົ້າໝາຍຢ່າງກວ້າງຂວາງ, ທຸກສະຖານທີ່ ແລະ ທຸກເວລາ ຜ່ານການຈັດຕັ້ງປະຕິບັດຕົວຈິງ ເຫັນວ່າໄດ້ຮັບການຕອບຮັບຈາກສັງຄົມເປັນຢ່າງດີ.ພ້ອມນີ້ໃນຕອນທ້າຍຂອງພິທີ ຍັງໄດ້ມີການປະດັບຫຼຽນໄຊແຮງງານ ຊັ້ນ II ໃຫ້ຈຳນວນ 33 ທ່ານ ແລະ 3 ກົມກອງ, ຫຼຽນໄຊແຮງງານ ຊັ້ນ III ຈຳນວນ 27 ທ່ານ, ປະດັບຫຼຽນກາແຮງງານ ຈຳນວນ 15 ທ່ານ ແລະ ໃບຍ້ອງຍໍຂອງລັດຖະບານ 227 ທ່ານ ທີ່ມີຜົນງານດີເດັ່ນ ປະກອບສ່ວນດ້ານເຫື່ອແຮງ ສະຕິປັນຍາ ເຂົ້າໃນການກະກຽມ ແລະ ຮັບໃຊ້ປີທ່ອງທ່ຽວລາວ 2018.