ກະຊວງປ້ອງກັນປະເທດຮ່ວມກັບສະຖານທູດຣັດເຊຍປະຈໍາລາວ ຈັດທິທີປາຖະກະຖາວັນສ້າງຕັ້ງສາຍພົວພັນການທູດລະຫວ່າງລາວ-ຣັດເຊຍ ວັນທີ 7 ຕຸລາ ຄົບຮອບ 62ປີ ໃນຕອນເຊົ້າວັນທີ 6 ຕຸລາ 2022 ຢູ່ຫ້ອງປະຊຸມໃຫຍ່ ກົມໃຫຍ່ການເມືອງກອງທັບ ມີພົນເອກ ຈັນສະຫມອນ ຈັນຍາລາດ ກໍາມະການກົມການເມືອງສູນກາງພັກ ເລຂາຄະນະພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ, ທ່ານວາລາດີເມຍ ກາລີນີນ ເອກອັກຄະລັດຖະທູດວິສາມັນຜູ້ມີອໍານາດເຕັມ ເເຫ່ງສະຫະພັນຣັດເຊຍ ປະຈໍາລາວ, ມີຄະນະພັກ-ຄະນະນໍາ,ພະນັກງານຫລັກເເຫລ່ງ, ນາຍເເລະພົນຫານ ອ້ອມຂ້າງກະຊວງປ້ອງກັນປະເທດ ພ້ອມດ້ວຍເເຂກຖືກເຊີນເຂົ້າຮ່ວມ.
ໂອກາດນີ້ ພົນໂທທອງລອຍ ສິລິວົງ ກໍາມະການສູນກາງພັກ ຮອງລັດຖະມົນຕີ ຫົວຫນ້າກົມໃຫຍ່ການເມືອງກອງທັບ ກະຊວງປ້ອງກັນປະເທດ ມີຄໍາເຫັນໃນພິທີວ່າ:ປະຫວັດເເຫ່ງການຕໍ່ສູ້ປົດປ່ອຍຊາດ ຂອງປະຊາຊົນລາວບັນດາເຜົ່າລ້ວນເເຕ່ໄດ້ຕິດພັນຢ່າງສະນິດເເຫນ້ນ,ເລິກເຊີ່ງກັບໄຊຊະນະອັນຍີ່ງໃຫຍ່ຂອງປະຊາຊົນຣັດເຊຍ ໂດຍສະເພາະການປະຕິວັດເດືອນຕຸລາຣັດເຊຍປີ1917 ເເລະ ໄຊຊະນະປົກປ້ອງປີຕຸພູມ ໃນສົງຄາມໂລກຄັ້ງທີ2 ໄຊຊະນະຂອງກອງທັບເເດງໂຊຫວຽດ ເຮັດໃຫ້ສົງຄາມໂລກຄັ້ງທີ2ຢຸດຕິລົງ ເປັນບ່ອນອີງພືນຖານສໍາຄັນເຮັດໃຫ້ສັງຄົມນີຍົມຂະຫຍາຍຕົວຢ່າງກວ້າງຂວາງ ເເລະ ເເຂງເເຮງ ສ້າງທ່ວງທ່າໃຫມ່ຍາດໄດ້ໄຊຊະນະ ໃນການຕໍ່ສູ້ຕ້ານລັດທິລ່າເມືອງຂື້ນເເບບເກົ່າເເລະໃຫມ່ ດັ່ງນັ້ນໃນມະຕິ6 ສະໄຫມທີ1ຂອງພັກປະຊາຊົນປະຕິວັດລາວ ພັກໄດ້ວາງເເນວທາງການຕ່າງປະເທດຢ່າງເເທດເຫມາະ ສອດຄ່ອງກັບສະພາບເງື່ອນໄຂຕົວຈີງ ໄດ້ເພີ່ມທະວີການພົວພັນທາງດ້ານເສດຖະກິດ ເເລະ ວັດທະນະທໍາກັບປະເທດຫວຽດນາມ,ຈີນ ລວມເຖີງບັນດາປະເທດສັງຄົມນິຍົມ,ກ້າວໄປເຖິງການສ້າງຕັ້ງສາຍພົວພັນທາງການທູດກັບບັນດາປະເທດສັງຄົມນິຍົມ ດ້ວຍເເນວທາງອັນຖືກຕ້ອງຂອງພັກ ສົມທົບກັບການເຄື່ອນໄຫວການຕ່າງປະເທດທີ່ເປັນຜົນດີໃຫ້ເເກ່ກໍາລັງປະຕິວັດ ບັນດາປະເທດຮັກຫອມສັນຕິພາບໃນໂລກ ມາເຖີງວັນທີ 7ຕຸລາ1960 ລັດຖະບານລາວໄດ້ສ້າງຕັ້ງສາຍພົວພັນທາງການທູດກັບອະດີດສະຫະພາບໂຊຫວຽດ ກໍ່ຄືສະຫະພັນຣັດເຊຍ ໃນປັດຈຸບັນ ເຊີ່ງປີນີ້ຄົບຮອບ62ປີ.
ພົນໂທທອງລອຍ ສິລິວົງ ມີຄໍາເຫັນຕື່ມວ່າ: ການສ້າງຕັ້ງສາຍພົວພັນທາງການທູດລະຫວ່າງລາວ-ຣັດເຊຍໃນປີ1960 ເປັນຂີດຫມາຍສໍາຄັນທາງປະຫວັດສາດ ເພາະໄດ້ດໍາເນີນໃນເງື່ອນໄຂທີ່ປະເທດເຮົາມີສອງຝ່າຍ ມີລະບອບການເມືອງທີ່ເເຕກຕ່າງກັນ ເເຕ່ການຕັ້ງສໍານັກງານສະຖານທູດສະຫະພາບໂຊຫວຽດໃນວຽງຈັນ ເເລະ ການເຄື່ອນໄຫວທາງການທູດຂອງສະຫະພາບໂຊຫວຽດເເມ່ນມີຜົນດີໃນທຸກດ້ານໃຫ້ເເກ່ກໍາລັງການປະຕິຫວັດຝ່າຍເເນວລາວຮັກຊາດ ເປັນບ່ອນອີງພື້ນຖານເຮັດໃຫ້ກໍາລັງການປະຕິວັດຢູ່ປະເທດລາວ ໄດ້ຮັບໄຊຊະນະ ສະຖາປະນາສາທາລະນະລັດປະຊາທິປະໄຕປະຊາຊົນລາວໃນວັນທີ 2ທັນວາ1975 ພາຍຫລັງທີ່ປະເທດຊາດໄດ້ຮັບການປົດປ່ອຍກໍ່ຄືໄລຍະປົກປັກຮັກສາເເລະສ້າງສາພັດທະນາປະເທດຊາດ ຣັດເຊຍໄດ້ສືບຕໍ່ໃຫ້ການຊ່ວຍເຫລືອລາວໃນຂົງເຂດຕ່າງໆໂດຍສະເພາະການພັດທະນາພື້ນຖານໂຄງລ່າງ, ສຶກສາທິການເເລະກິລາ,ສາທາລະນະສຸກ ,ວຽກງານການທະຫານ ເເລະ ວຽກງານອື່ນໆ.
ໂອກາດດຽວກັນນີ້ ທ່ານວາລາດີເມຍ ກາລີນີນ ເອກອັກຄະລັດຖະທູດວິສາມັນຜູ້ມີອໍານາດເຕັມ ເເຫ່ງສະຫະພັນຣັດເຊຍ ປະຈໍາລາວມີຄໍາເຫັນວ່າ: ນັບເເຕ່ຣັດເຊຍ ເເລະລາວໄດ້ຕັ້ງສ້າງຕັ້ງສາຍພົວພັນທາງການທູດຮ່ວມກັນຍີ່ງເຮັດໃຫ້ສອງປະເທດພວກເຮົາມີຄວາມຜູກພັນ ສະຫນີດສະຫນົມກັນຫລາຍຂື້ນເເລະນັບມື້ກ້າວເຂົ້າສູ່ລວງເລີກ ດ້ວຍເເນວທາງນະໂຍບາຍທີ່ຖືກຕ້ອງສອດຄ່ອງ ເເລະ ເເນວຄິດທີ່ຄ້າຍຄືກັນຕໍ່ບັນດາບັນຫາຕົ້ນຕໍຂອງໂລກ ເເລະ ຂົງເຂດ ເຮັດໃຫ້ສອງປະເທດພວກເຮົາມີຜົນສໍາເລັດໃນການປະສານງານກັນໃນເວທີສາກົນ, ພ້ອມດຽວກັນສອງປະເທດຣັດເຊຍ-ລາວຍັງສືບຕໍ່ເສີມຂະຫຍາຍສາຍພົວພັນຮ່ວມມືສອງຝ່າຍໃນລະດັບສູງ ເເລະ ອື່ນໆ ຄຽງຄູ່ກັນນີ້ຣັດເຊຍຈະສືບຕໍ່ໃຫ້ການຊ່ວຍເຫລືອລາວຢ່າງຕໍ່ເນື່ອງໃນທຸກຂົງເຂດວຽກງານ ໂດຍສະເພາະການພັດທະນາຊັບພະຍາກອນມະນຸດໃນຂົງເຂດການສຶກສາ, ວຽກງານການທະຫານ, ສາທາລະນະສຸກ, ການພັດທະນາພື້ນຖານໂຄງລ່າງ ລວມເຖີງດ້ານຕ່າງໆອີກຈໍານວນຫນື່ງ.
ໃນພີທີທີ່ມີຄວາມຫມາຍຄວາມສໍາຄັນນີ້ກະຊວງປ້ອງກັນປະເທດຮ່ວມກັບສະຖານທູດຣັດເຊຍປະຈໍາລາວ ຍັງຈັດງານວາງສະເເດງຮູບພາບມູນເຊື້ອການພົວພັນຮ່ວມມືນັບເເຕ່ອະດີດຈົນເຖີງປັດຈຸບັນ ລະຫວ່າງລາວ-ຣັດເຊຍເພື່ອເຮັດໃຫ້ການສະເຫລີມສະຫລອງ ວັນສ້າງຕັ້ງສາຍພົວພັນການທູດລະຫວ່າງລາວ-ຣັດເຊຍມີບັນຍາກາດຟົດຟື້ນຕື່ມອີກ.
ຂ່າວ-ພາບ:ເດດອາລຸນ ແກ້ວວິໄລ.
