ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ປິດຊຸດບຳລຸງພາສາອັງກິດ ຊຸດທີ 43 ໃຫ້ພະນັກງານກະຊວງການຕ່າງປະເທດ

ຕອນເຊົ້າວັນທີ 21 ສິງຫາ 2020, ສະຖາບັນການຕ່າງປະເທດ, ກະຊວງການຕ່າງປະເທດ ໄດ້ຈັດພິທີປິດຊຸດບຳລຸງພາສາອັງກິດ ຊຸດທີ 43 ໃຫ້ພະນັກງານກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ, ບັນດາກະຊວງອ້ອມຂ້າງສູນກາງ ແລະ ທ້ອງຖິ່ນ, ຈຳນວນ 77 ທ່ານ ໃນນັ້ນເພດຍິງ 41 ທ່ານ, ເຊິ່ງໄດ້ດໍາເນີນມາເປັນເວລາ 8 ເດືອນ (ເລີ່ມແຕ່ວັນທີ 20 ມັງກອນ – 21 ສິງຫາ 2020), ໂດຍການເປັນປະທານຂອງ ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີ ກະຊວງການຕ່າງປະເທດ.
ໃນພິທີດັ່ງກ່າວ, ທ່ານ ໄມ ໄຊຍະວົງສ໌, ຫົວໜ້າສະຖາບັນການຕ່າງປະເທດ ໄດ້ສະຫຼຸບລາຍງານຜົນສຳເລັດຂອງຊຸດບໍາລຸງພາສາອັງກິດ ຊຸດທີ 43, ເຊິ່ງໄດ້ຕີລາຄາວ່າ ຊຸດຮຽນດັ່ງກ່າວໄດ້ບັນລຸຜົນສໍາເລັດຕາມຄາດໝາຍທີ່ວາງໄວ້ ເຖິງວ່າໄດ້ຍຸດຮຽນຊົ່ວຄາວ ເປັນເວລາ 2 ເດືອນ ຍ້ອນຜົນກະທົບຈາກການແຜ່ລະບາດຂອງພະຍາດCovid-19 ກໍຕາມ, ແຕ່ຜູ້ເຂົ້າຮ່ວມບໍາລຸງຊຸດນີ້ ກໍສາມາດຍົກລະດັບພາສາອັງກິດໄດ້ໃນລະດັບທີ່ດີພໍສົມຄວນ ເປັນຕົ້ນການສົນທະນາ, ການນຳສະເໜີບົດ, ການຂຽນ ແລະ ການຟັງ ເພື່ອນໍາໄປໝູນໃຊ້ເຂົ້າໃນການປະຕິບັດວຽກງານວິຊາສະເພາະຢູ່ກົມກອງຂອງຕົນ.
ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີ ກະຊວງການຕ່າງປະເທດ, ໄດ້ໃຫ້ກຽດ ມອບໃບຢັ້ງຢືນໃຫ້ຜູ້ເຂົ້າຮ່ວມຝຶກອົບຮົມ ແລະໂອ້ລົມຕໍ່ພະນັກງານທີ່ສໍາເລັດການບໍາລຸງພາສາອັງກິດຄັ້ງນີ້, ໂດຍທ່ານໄດ້ເນັ້ນເຖິງຄວາມສຳຄັນ ແລະ ຄວາມຈຳເປັນຕໍ່ການຍົກລະດັບພາສາຕ່າງປະເທດ ແລະ ວິຊາສະເພາະ ເພື່ອເປັນເຄື່ອງມືໃນການພົວພັນຮ່ວມມືກັບສາກົນໃນໄລຍະໃໝ່, ໂດຍເລັ່ງໃສ່ປະຕິບັດແຜນບຸກທະລຸ 4 ດ້ານທີ່ກອງປະຊຸມໃຫ່ຍຂອງພັກ ຄັ້ງທີ X ວາງອອກ. ສະນັ້ນ, ການຍົກລະດັບພາສາອັງກິດ ຈຶ່ງເປັນວຽກງານໜຶ່ງທີ່ຈຳເປັນຕ້ອງໄດ້ເອົາໃຈໃສ່ຢ່າງຈິງຈັງ ແລະ ເພື່ອສ້າງພື້ນຖານຄວາມຮູ້ດ້ານພາສາຕ່າງປະເທດໃຫ້ແກ່ພະນັກງານລັດ ໃຫ້ມີຄວາມຮູ້-ຄວາມສາມາດສູງຂຶ້ນກວ່າເກົ່າ, ເຊິ່ງນອກຈາກໄດ້ນຳໃຊ້ເຂົ້າໃນວຽກງານປະຈໍາວັນແລ້ວ, ຍັງສາມາດນຳໄປໝູນໃຊ້ເຂົ້າໃນເວທີສາກົນເຊັ່ນ: ການເຂົ້າຮ່ວມກອງປະຊຸມສາກົນທັງພາຍໃນ ແລະ ຕ່າງປະເທດ, ກອງປະຊຸມສຳມະນາຖອດຖອນບົດຮຽນໃນຫົວຂໍ້ຕ່າງໆ ລວມທັງການຂຽນບົດ ຫຼື ເອກະສານທາງການຕ່າງໆ.
ຊຸດບຳລຸງພາສາອັງກິດ ຊຸດທີ 43 ໄດ້ດຳເນີນໄປຕາມແຜນ ທີ່ສະຖາບັນການຕ່າງປະເທດ ວາງອອກ. ນອກຈາກນັ້ນ, ຍັງໄດ້ສ້າງກິດຈະກຳການເຄື່ອນໄຫວນອກຫຼັກສູດ ເປັນຕົ້ນໄດ້ນໍາພາຜູ້ເຂົ້າຮວ່ມຝຶກອົບຮົມໄປທັດສະນະສຶກສາຢ້ຽມຢາມສູນຂໍ້ມູນ-ຂ່າວສານຄົນພິການ (COPE), ຢ້ຽມຢາມເຂື່ອນໄຟຟ້ານ້ຳງື່ມ 1 ແລະ ຈັດການແຂ່ງຂັນກິລາຕ່າງໆ ເພື່ອຮັບຕ້ອນວັນສໍາຄັນຕ່າງໆຂອງຊາດ ແລະ ເພື່ອເປັນການຮັດແໜ້ນຄວາມສາມັກຄີ ລະຫວ່າງ ພະນັກງານສະຖາບັນການຕ່າງປະເທດ ແລະ ຜູ້ເຂົ້າຮ່ວມຝຶກອົບຮົມທີ່ມາຈາກພາກສ່ວນອື່ນໆໃຫ້ມີບັນຍາກາດຟົດຟື້ນ ແລະ ແໜ້ນແຟ້ນກວ່າເກົ່າ.