ປິດຊຸດຝຶກອົບຮົມພະນັກງານນໍາທ່ຽວ ລະດັບຊາດ ຄັ້ງທີ 30
ຊຸດຝຶກອົບຮົມພະນັກງານນໍາທ່ຽວ ລະດັບຊາດ ຄັ້ງທີ 30 ທີ່ດໍາເນີນມາແຕ່ ວັນທີ 06 ພຶດສະພາ ຫາ ວັນທີ 19 ກໍລະກົດ 2024 ໄດ້ປິດລົງດ້ວຍຜົນສໍາເລັດອັນຈົບງາມໃນຕອນເຊົ້າວັນທີ 19 ກໍລະກົດ 2024 ທີ່ສະຖາບັນສື່ມວນຊົນ ວັດທະນະທຳ ແລະ ທ່ອງທ່ຽວ. ໂດຍການເປັນປະທານຂອງ ທ່ານ ຄໍາຫຼ້າ ຍອຍສາຍຄຳ, ຫົວໜ້າສະຖາບັນສື່ມວນຊົນ, ວັດທະນະທຳ ແລະ ທ່ອງ ທ່ຽວ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ.
ທ່ານ ຄໍາຫຼ້າ ຍອຍສາຍຄຳ ໃຫ້ຮູ້ວ່າ: ຊຸດຝຶກອົບຮົມຄັ້ງນີ້ເປັນການປະກອບສ່ວນສໍາຄັນເຂົ້າໃນການພັດທະນາບຸກຄະລາກອນທ່ອງທ່ຽວລາວໃຫ້ມີຄວາມເຂັ້ມແຂງ ເວົ້າລວມ, ເວົ້າສະເພາະກໍ່ຄືການພັດທະນາພະນັກງານນໍາທ່ຽວລະດັບຊາດ ຂອງ ສປປ ລາວ ທີ່ມີຫຼາຍພາສາໃຫ້ໄດ້ທັງປະລິມານ ແລະ ຄຸນນະພາບ ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການໃນການບໍລິການນໍາທ່ຽວ ແລະ ສ້າງຄວາມເພິ່ງພໍໃຈໃຫ້ແກ່ນັກທ່ອງທ່ຽວໄດ້ຢ່າງມີປະສິດທິພາບສູງໃຫ້ສົມກັບຄໍາເວົ້າທີ່ວ່າ “ພະນັກງານນໍາທ່ຽວປຽບເໝືອນທູດວັດທະນະທຳ”.
ທ່ານກ່າວຕື່ມວ່າ: ເຖີງວ່າການຝຶກອົບຮົມຄັ້ງນີ້ບັນລຸຕາມຈຸດປະສົງ ແລະ ລະດັບຄາດໝາຍເປັນຢ່າງດີກໍຕາມ, ແຕ່ເປັນ ພຽງຜົນສໍາເລັດຂັ້ນພື້ນຖານເທົ່ານັ້ນ ຊຶ່ງໃນທາງປະຕິບັດຕົວຈິງ, ບັນດານັກສຳມະນາກອນທີ່ຜ່ານຊຸດຝຶກອົບຮົມໃນຄັ້ງນີ້ຍັງຈະຕ້ອງສືບຕໍ່ເອົາໃຈໃສ່ຝຶກຝົນຫລໍ່ຫລອມຕົນເອງ, ສືບຕໍ່ຄົ້ນຄວ້າບົດຮຽນ ແລະ ຊອກຮູ້ຮໍ່າຮຽນຕື່ມອີກ ເພື່ອເຮັດໃຫ້ການປະ ກອບອາຊີບນໍາທ່ຽວເປັນມືອາຊີບຍິ່ງຂຶ້ນ ປະສິດທິພາບສູງ ແລະ ໜ້າປະທັບໃຈແກ່ຜູ້ໃຊ້ບໍລິການ. ສາມາດສະໜອງການບໍລິການນໍາທ່ຽວໃຫ້ມີອີກອັນໜື່ງ, ສະເໜີມາຍັງຄະນະຮັບຜິດຊອບ, ຄະນະສະຖາບັນ, ຄູ-ອາຈານ ແລະ ພາກສ່ວນທີ່ກ່ຽວຂ້ອງຈົ່ງເພີ່ມທະວີການຮ່ວມມືທັງພາຍໃນ ແລະ ຕ່າງປະເທດ, ສືບຕໍ່ຄົ້ນຄວ້າ, ຊອກວິທີທາງອື່ນໆຕື່ມອີກ ເພື່ອພັດທະນາບຸກຄະລາກອນທ່ອງທ່ຽວລາວໃຫ້ມີຄຸນນະພາບທີ່ດີຂຶ້ນໄປເລື່ອຍໆ ໃຫ້ທຽບເທົ່າກັບພາກ ພື້ນອາຊຽນ ແລະ ສາກົນ.
ຊຸດຝຶກອົບຮົມຄັ້ງນີ້ ມີຜູ້ເຂົ້າຮ່ວມທັງໝົດ 84 ຄົນ, ຍິງ 55 ຄົນ, ໃນນີ້ມີ ພາສາອັງກິດ 38 ຄົນ, ພາສາຈີນ 12 ຄົນ, ພາສາເກົາຫຼີ 6 ຄົນ, ພາສາຫວຽດນາມ 6 ຄົນ, ແອັດສະປາຍໂຍນ 5 ຄົນ, ເຢຍລະມັນ 3 ຄົນ, ຝຣັ່ງ 4 ຄົນ, ໂຮນລັງ 2 ຄົນ, ອີຕາລີ 1 ຄົນ, ກຳປູເຈຍ 1 ຄົນ, ນອກຈາກນັ້ນແມ່ນພາສາໄທປະສົມກັບພາສາອື່ນໆ.
