ວັນທີ 30 ສິງຫາ 2024 ສູນກາງສະຫະພັນກຳມະບານລາວ ຮ່ວມກັບ ອົງການມູນລະນິທິພິທັກສະຕຣີ ຫຼື (AAT) ຈັດກອງປະຊຸມ ປິດໂຄງການປົກປ້ອງແມ່ຍິງ ແລະ ເດັກນ້ອຍຈາກການຕ້ານການຄ້າມະນຸດ ໄລຍະປີ 2022-2024 ແລະ ປຶກສາຫາລືແຜນການທິດທາງຕໍ່ໜ້າ ໃນການເຄື່ອນໄຫວກິດຈະກຳໂຄງການສືບຕໍ່ທີ່ເມືອງວັງວຽງ, ແຂວງວຽງຈັນ, ເປັນກຽດເຂົ້າຮ່ວມ ແລະ ກ່າວເປີດກອງປະຊຸມ ໂດຍທ່ານ ວິໄລ ວົງຂະເສີມ ຮອງປະທານຄະນະບໍລິຫານງານສູນກາງສະຫະພັນກຳມະບານລາວ, ທ່ານ ນາງ ສີລິລັດ ແສງສຸວັນ ຜູ້ປະສານງານມູນນິທິພິທັກສະຕຣີ, ເຂົ້າຮ່ວມຈາກສູນກາງສະຫະພັນກຳມະບານລາວ, ຕາງໜ້າຈາກສະຫະພັນກຳມະບານ 3 ແຂວງພື້ນທີ່ໂຄງການ ( ນະຄອນຫຼວງວຽງຈັນ, ແຂວງ ວຽງຈັນ, ແຂວງ ໄຊຍະບູລີ ແລະ ຕາງໜ້າຈາກກະຊວງການຕ່າງປະເທດ, ຕາງໜ້າຈາກກົມຕຳຫລວດສະກັດກັ້ນຕ້ານການຄ້າມະນຸດລະດັບຊາດ ແລະ ຕາງໜ້າສູນປົກປ້ອງແມ່ຍິງ ແລະ ເດັກນ້ອຍ ສູນກາງສະຫະພັນແມ່ຍິງລາວ.
ຈຸດປະສົງເພື່ອໂຄສະນາເຜີຍແຜ່ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈກ່ຽວກັບການເດີນທາງທີ່ມີຄວາມປອດໄພ, ການໄປເຮັດວຽກຢູ່ຕ່າງປະເທດ ແລະ ການແຕ່ງງານກັບຄົນຕ່າງປະເທດທີ່ຖືກ ຕ້ອງຕາມກົດໝາຍ, ພ້ອມກັນນັ້ນກໍ່ໄດ້ເຜີຍແຜ່ແນວທາງການປ້ອງກັນເພື່ອບໍ່ໃຫ້ຕົກເປັນເຫຍື່ອຂອງຂະບວນການຄ້າມະນຸດ.
ໃນກອງປະຊຸມ ໄດ້ຮັບຟັງລາຍງານການຈັດຕັ້ງປະຕິບັດໂຄງ ການໃນໄລຍະຜ່ານມາ ແຕ່ປີ 2022- 2024, ການລາຍງານຜົນການປະເມີນໂຄງການ ໃນ 3 ແຂວງພື້ນທີ່ໂຄງການ, ນຳສະເໜີແຜນຮ່າງໃນການສືບຕໍ່ໂຄງການ, ມີຄຳເຫັນໃສ່ບົດລາຍ ງານ ແລະ ແນະນຳການຈັດຕັ້ງປະຕິບັດໂຄງການໄລຍະຜ່ານມາ, ໃນໄລຍະ 2 ປີຜ່ານມາ ໄດ້ຈັດຕັ້ງປະຕິບັດເຄື່ອນໄຫວກິດຈະກຳຕົວຈິງ ໄດ້ມີການໂຄສະນາເຜີຍແຜ່ໃຫ້ຄວາມຮູ້ກັບປະຊາຊົນໃນບ້ານເປົ້າໝາຍ, ລົງໂຄສະນາຂອງແຕ່ລະແຂວງພື້ນທີ່ໂຄງ ການໄດ້ມີຫຼາຍຮູບຫຼາຍແບບ ເພື່ອໃຫ້ພໍ່ແມ່ປະຊາຊົນໄດ້ເຂົ້າໃຈງ່າຍ ແລະ ແທດເໝາະກັບສະພາບຕົວຈິງ.
ນອກຈາກ ການລົງໂຄສະນາຕົວຈິງແລ້ວ ທາງໂຄງການຍັງມີການຜະລິດສື່ໂຄສະ ນາ ຄື: ປ້າຍໂຄສະນາໂລອັບ 3 ປ້າຍ, ຜະລິດເສື້ອໂປໂລ ຈຳນວນ 270 ຜືນ, ຜະລິດເສື້ອຄໍມົນ ຈຳນວນ 200 ຜືນ, ຖົງຜ້າ 150 ຖົງ.
ທີ່ມາ: ສື່ກໍາມະບານລາວ
