ວັນທີ 15 ສິງຫາ 2024, ທີ່ໂຮງແຮມຄຣາວພລ່າຊ່າ, ນະຄອນ ຫຼວງວຽງຈັນ. ກະຊວງຍຸຕິທຳ ແລະ ມູນນິທິເອເຊຍ ປະຈໍາ ສປປ ລາວ ໄດ້ຈັດກອງປະຊຸມປິດໂຄງການສົ່ງເສີມການເຂົ້າເຖິງກົດ ໝາຍ ແລະ ຄວາມຍຸຕິທຳຂອງປະຊາຊົນ ໃນ ສປປ ລາວ ໄລຍະທີ 1 (ມັງກອນ 2020 – ກໍລະກົດ 2024) ແລະ ນຳສະເໜີຮ່າງບົດ ບັນທຶກຄວາມເຂົ້າໃຈ ສະບັບໃໝ່ ສຳລັບໂຄງການໄລຍະ 2.ໂດຍການເປັນປະທານຮ່ວມກອງປະຊຸມໂດຍ ທ່ານ ບຸນທາ ຊົງເຢີທ່າວ ຮອງລັດຖະມົນຕີກະຊວງຍຸຕິທຳ ແລະ ທ່ານ ທອດ ວໍເຊວ ( Mr. Todd Wassel ), ຜູ້ຕາງໜ້າອົງການມູນນິທິເອເຊຍ ປະຈໍາ ສປປ ລາວ.
ກອງປະຊຸມໄດ້ຮັບຟັງການສະເໜີຜົນສຳເລັດຂອງໂຄງການ ແລະ ການປະເມີນຜົນທ້າຍໂຄງການ. ຜ່ານການຈັດຕັ້ງປະຕິບັດໂຄງການສົ່ງເສີມການເຂົ້າເຖິງກົດໝາຍ ແລະ ຄວາມຍຸຕິທຳຂອງປະຊາຊົນ ໃນ ສປປ ໄລຍະທີ 1 ໂດຍການ ຮ່ວມມືກັບມູນນິທິເອເຊຍ ໄດ້ຮັບການສະໜັບສະໜູນທຶນຈາກອົງການພັດທະນາສາກົນປະເທດສະຫະລັດອາເມລິການ (USAID) ແລະ ມູນນິທິເເມັກຄອນນອລ) ໃນ 10 ແຂວງ ເປົ້າໝາຍຂອງໂຄງການ ຄື: ນະ ຄອນຫຼວງວຽງຈັນ, ແຂວງຜົ້ງສາລີ, ແຂວງອຸດົມໄຊ, ແຂວງຫຼວງນ້ຳທາ, ແຂວງໄຊຍະບູລີ, ແຂວງຫຼວງພະບາງ, ແຂວງວຽງຈັນ, ແຂວງສະຫວັນນະເຂດ, ແຂວງສາລະວັນ ແລະ ແຂວງຈຳປາສັກ.
ຜ່ານການຈັດຕັ້ງປະຕິບັດໂຄງການໄລຍະທີ 1 ເຫັນໄດ້ວ່າ:
– ສາມາດສ້າງຄວາມເຂັ້ມແຂງໃຫ້ແກ່ຫ້ອງການຊ່ວຍເຫຼືອທາງດ້ານກົດໝາຍ ໂດຍຜ່ານ ການຝຶກອົບຮົມສ້າງຄວາມອາດສາມາດໃຫ້ແກ່ພະນັກງານຂະແໜງຍຸຕິທຳ ທີ່ຮັບຜິດຊອບວຽກງານຊ່ວຍ ເຫຼືອທາງດ້ານກົດໝາຍ ແລະ ວຽກງານໄກ່ເກ່ຍຂໍ້ຂັດແຍ່ງຂັ້ນບ້ານ.
ຜ່ານການຝຶກອົບຮົມ ພະນັກງານທີ່ຮັບຜິດຊອບວຽກງານດັ່ງກ່າວ ສາມາດປະຕິບັດໜ້າທີ່ຂອງຕົນເອງໄດ້ດີ ແລະ ໃຫ້ການບໍລິການປະຊາຊົນ ໃນວຽກງານຊ່ວຍເຫຼືອທາງດ້ານກົດໝາຍໄດ້ຕາມພາລະບົດບາດຂອງຕົນ.
– ໄດ້ມີການຈັດຕັ້ງປະຕິບັດກິດຈະກຳການໂຄສະນາເຜີຍແຜ່ກົດໝາຍ ແລະ ຕັ້ງໂຕະໃຫ້ຄຳປຶກສາແບບເຄື່ອນທີ່ ໃຫ້ແກ່ປະຊາຊົນ ໂດຍສະເພາະ ໃນເຂດເທດສະບານ ແລະ ເຂດຫ່າງໄກສອກຫຼີກ ທີ່ມີຄວາມຈຳເປັນຕ້ອງໄດ້ນຳເອົາຂໍ້ມູນທາງດ້ານກົດໝາຍ ເພື່ອໃຫ້ປະຊາຊົນໄດ້ຮັບຮູ້ ແລະ ໄດ້ໃຫ້ຄຳປຶກສາທາງດ້ານກົດໝາຍ ແລະ ຊ່ວຍເຫຼືອທາງດ້ານກົດໝາຍແກ່ປະຊາຊົນຢ່າງເປັນປະຈໍາ ແລະ ຕໍ່ເນື່ອງ;
– ໄດ້ຮັບງົບປະມານສຳລັບການບໍລິຫານຫ້ອງການ ແລະ ກິດຈະກຳການໂຄສະນາເຜີຍແຜ່ກົດໝາຍ ແລະ ການຕັ້ງໂຕະໃຫ້ຄຳປຶກສາແບບເຄື່ອນທີ່ ຢ່າງເປັນປົກກະຕິ.
– ສຳລັບວຽກງານໄກ່ເກ່ຍຂໍ້ຂັດແຍ່ງຂັ້ນບ້ານ ຜ່ານມາໄດ້ຮັບການຝຶກອົບຮົມທັກສະການເປັນຄູຝຶກ ແລະ ທັກສະການໄກ່ເກ່ຍຂໍ້ຂັດແຍ່ງຂັ້ນບ້ານ ເຊິ່ງຄູຝຶກຈາກຂັ້ນແຂວງ ແລະ ຂັ້ນເມືອງ ບາງພື້ນທີ່ກໍໄດ້ມີການຝຶກໃຫ້ແກ່ຄະນະແກ້ໄຂຂໍ້ຂັດແຍ່ງຂັ້ນບ້ານ; ເຮັດໃຫ້ຄະນະແກ້ໄຂຂໍ້ຂັດແຍ່ງຂັ້ນບ້ານໃນບາງຂົງເຂດສາມາດໄກ່ເກ່ຍຂໍ້ຂັດແຍ່ງຂັ້ນບ້ານ ໄດ້ດຳເນີນການໄກ່ເກ່ຍຖືກຕ້ອງຕາມນິຕິກຳທີ່ໄດ້ກຳນົດໄວ້
ໃນຕອນບ່າຍ ຂອງວັນດຽວກັນ ທ່ານ ຄຳພອນ ສີປະເສີດ ຫົວໜ້າກົມຮ່ວມມືສາກົນ ແລະ ທ່ານ ນາງ ລິລ່ຽນ ແດງ ຫົວໜ້າແຜນງານຊ່ວຍເຫຼືອທາງດ້ານກົດໝາຍ ໄດ້ນຳພາກອງປະຊຸມ ເພື່ອປຶກສາຫາລື ຮ່າງບົດບັນທຶກຄວາມເຂົ້າໃຈ ສະບັບໃໝ່ ສຳລັບໂຄງການໄລຍະທີ 2. ຕາງໜ້າຈາກກົມຮ່ວມມືສາກົນ ໄດ້ນຳສະເໜີຮ່າງບົດບັນທຶກຄວາມເຂົ້າໃຈ ສະບັບໃໝ່ ສຳລັບໂຄງການໄລຍະທີ 2 ໂດຍສະເພາະ ຍຸດທະສາດໃໝ່ ສຳລັບການຈັດຕັ້ງປະຕິບັດກິດ ຈະກຳໂຄງການໃນໄລຍະທີ 2 ເຊິ່ງມີການຫັນທິດການຈັດຕັ້ງປະຕິ ບັດກິດຈະກຳ ແບບມີຈຸດສຸມດ້ວຍການ ຄັດເລືອກ ແລະ ສ້າງຫ້ອງການຕົວແບບໃນວຽກງານຊ່ວຍເຫຼືອທາງດ້ານກົດໝາຍ ແລະ ສ້າງຄວາມເຂັ້ມແຂງໃຫ້ແກ່ຄະນະແກ້ໄຂຂໍ້ຂັດແຍ່ງຂັ້້ນບ້ານ ແລະ ຈັດຕັ້ງປະຕິບັດກິດຈະກຳທີ່ໄດ້ຮັບຜົນປະໂຫຍດທີ່ສາມາດຖອດຖອນບົດຮຽນໄດ້ຈາກໄລຍະທີ1 ໂດຍລົງເລິກການສ້າງຄວາມອາດສາມາດ ດ້ານການຝຶກອົບຮົມ, ການຄຸ້ມຄອງ, ບໍລິ ຫານຂໍ້ມູນ ແລະ ການບໍລິການທາງດ້ານກົດໝາຍໃຫ້ມີຄຸນນະ ພາບສູງຂຶ້ນ.
ຂ່າວ: ກົມໂຄສະນາເຜີຍກົດໝາຍ ກະຊວງຍຸຕິທໍາ
