ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ປີນີ້ສະເຫລີມສະຫລອງວັນກາແດງສາກົນ ພາຍໃຕ້ຫົວຂໍ້ຮັກສາຫຼັກມະນຸດສະທຳໃຫ້ຄົງຢູ່
ໃນວັນທີ່ 7 ພຶດສະພາ 2024ນີ້ ທ່ານ ວຽງສະຫວັນ ກະເສີມສຸກ ຫົວໜ້າອົງການກາແດງແຂວງຫຼວງພະບາງ ໄດ້ຖະແຫຼງຂ່າວຕໍ່ສື່ມວນຊົນ ກ່ຽວກັບການສະເຫຼີມສະຫຼອງ ວັນກາແດງ ແລະຊີກວົງເດືອນແດງສາກົນ ວັນທີ່ 8 ພຶດສະພາ ໃນປີ 2024 ນີ້ ໂຍທ່ານໄດ້ກ່າວເຖິງ ປະຫວັດຄວາມເປັນມາ ຕັ້ງແຕ່ມື້ກໍາເນີດ ຈົນຮອດປະຈຸບັນ, ຄວາມໝາຍ ຄວາມສໍາຄັນ ແລະ ຄໍາຂັວນປະຈໍາປີ 2024 ແລະ ຜົນງານການເຄື່ອນໄຫວຂອງວຽກງານຂອງອົງການກາແດງແຂວງຫຼວງພະບາງ
ບາງຕອນ ທ່ານ ກ່າວວ່າ: ວັນກາແດງ ແລະ ຊີກວົງເດືອນແດງສາກົນ ໄດ້ລິເລີ່ມ ພາຍຫຼັງສົງຄາມໂລກ ຄັ້ງທີ I, ບັນຫາດັ່ງກ່າວໄດ້ຍົກຂຶ້ນມາປຶກສາຫາລືກັນ ໃນກອງປະຊຸມໃຫຍ່ກາແດງສາກົນ ຄັ້ງທີ 14 ກ່ຽວກັບ “ ທຳນຽມປະຕິບັດ ທີ່ສາມາດຈັດຂຶ້ນໄດ້ທຸກໆປີ ໃນທົ່ວໂລກ ໄດ້ຮັບການສະເຫຼີມສະຫຼອງ ເປັນຄັ້ງທໍາອິດ ໃນວັນທີ 8 ພຶດສະພາ 1948. ຫົວຂໍ້ທາງການຂອງການສະເຫຼີມສະຫຼອງໃນແຕ່ລະປີ ແມ່ນໄດ້ພັດປ່ຽນຕາມເວລາ ແລະ ສະພາບການຕົວຈິງ.
ສຳລັບປີນີ້ ແມ່ນ ຄົບຮອບ 161 ປີ (1863-2024) ແຫ່ງການກໍ່ຕັ້ງຂະບວນການກາແດງ ແລະ ຊີກວົງເດືອນແດງສາກົນ ຊຶ່ງໄດ້ກຳນົດການສະເຫຼີມສະຫຼອງ ພາຍໃຕ້ຫົວຂໍ້ “ຮັກສາຫຼັກມະນຸດສະທຳໃຫ້ຄົງຢູ່” ຫຼື “Keeping Humanity Alive” ເພື່ອເປັນການຢໍ້າເຕືອນເຖິງສັດຕະຍາບັນອັນຢືນຍົງຂອງຂະບວນການກາແດງ ແລະ ວົງເດືອນແດງສາກົນ ທີ່ຕ້ອງການ ຮັກສາກຽດສັກສີຂອງມະນຸດ, ບັນເທົາຄວາມທຸກ ແລະ ຂະຫຍາຍການຊ່ວຍເຫຼືອປະຊາຊົນທີ່ກຳລັງປະເຊີນກັບສະຖານະການຮ້າຍແຮງ ໂດຍສະເພາະແມ່ນປະຊາຊົນຢູ່ເຂດຫ່າງໄກສອກຫຼີກ ແລະ ເຂົ້າເຖິງຫຍຸ້ງຍາກ.
ປີນີ້ ຄະນະກຳມະການກາແດງສາກົນ (ICRC),ສະຫະພັນກາແດງ ແລະ ຊີກວົງເດືອນແດງສາກົນ (IFRC) ຮ່ວມກັບ ບັນດາສະພາ, ອົງການກາແດງ ແລະ ຊີກວົງເດືອນແດງ ຫຼາຍ 190 ກວ່າປະເທດທົ່ວໂລກ ຮ່ວມກັນສະເຫຼີມສະຫຼອງ ເພືອຢັ້ງຢືນເຖິງຄວາມ ມຸ່ງໝັ້ນອັນໜັກແໜ້ນຂອງຂະບວນການກາແດງ ແລະ ຊີກວົງເດືອນແດງສາກົນ ຕໍ່ມວນມະນຸດຊາດ ພ້ອມທັງສະທ້ອນເຖິງ ຫຼັກການພື້ນຖານກາແດງ ແລະ ຊີກວົງເດືອນແດງຂອງພວກເຮົາ ປະກອບມີ: ມະນຸດສະທຳ (Humanity); ທ່ຽງທຳ (Impartiality); ເປັນກາງ (Neutrality); ເອກະລາດ (Independence); ສະໝັກໃຈ (Voluntary Service); ເອກະພາບ (Unity) ນໍ້າໃຈສາກົນ (Universality).
ທ່ານ ວຽງສະຫວັນ ກະເສີມສຸກ ຫົວໜ້າອົງການກາແດງແຂວງຫຼວງພະບາງກ່າວໃນຕອນທ້າຍວ່າ: ຄວາມຫັວງທີ່ຖືກຕັ້ງຂື້ນ ກໍ່ແມ່ນພວກເຮົາທຸກຄົນ ສາມາດເປັນຜູ້ມີນໍ້າໃຈເມດຕາ ຢ່າງຈິງໃຈ ຕໍ່ເພື່ອນມະນຸດດ້ວຍກັນ ຈະໜ້ອຍຫຼືຫຼາຍ, ນ້ອຍຫຼືໃຫ່ຍລ້ວນແລ້ວແຕ່ມີຄວາມໝາຍຄວາມສໍາຄັນ, ແຜ່ເມດຕາຈາກຄົນໜື່ງທີ່ມີເງື່ອນໄຂ ໄປສູ່ອີກຄົນໜື່ງທີ່ດ້ອຍໂອກາດໃນຊຸມຊົນ ທັງຕົວເມືອງ ແລະ ຊົນນະບົດ. ສະນັ້ນແນວຄິດມະນຸດສະທໍານີ້ ຈຶ່ງຈໍາເປັນຕ້ອງໄດ້ເສີມຂະຫຍາຍ ນັບມື້ນັບຫຼາຍຂຶ້ນ, ກ້ວາງຂວາງອອກ ພ້ອມກັນນັ້ນກໍ່ຕ້ອງ “ຮັກສາຫຼັກມະນຸດສະທຳໃຫ້ຄົງຢູ່” ຍືນຍົງຄົງຕົວ ຕິດພັນກັບສັງຄົມມະນຸດພວກເຮົາ ເພື່ອພ້ອມກັນຜ່ານຜ່າບັນດາວິກິດການທີ່ກ່າວມານັ້ນ
ສະເພາະອົງການກາແດງແຂວງຫຼວງພະບາງ ສ້າງຕັ້ງຂຶ້ນໃນວັນທີ່ 12 ຕຸລາ 1993; ເປັນອົງການຈັດຕັ້ງທາງສັງຄົມ ທີ່ເຄື່ອນໄຫວວຽກງານມະນຸດສະທໍາຢ່າງເປັນເອກະລາດ ຢູ່ພາຍໃຕ້ລັດຖະທໍາມະນູນ, ກົດໝາຍ ແລະ 07 ຫຼັກການພື້ນຖານ ຂອງຂະບວນການກາງແດງ ແລະ ຊີກວົງເດືອນສາກົນ, ໂດຍມີທ່ານເຈົ້າແຂວງ ເປັນປະທານ ກິດຕິມະສັກ, ມີຖານະເທົ່າກັບພະແນກການ ແລະ ອົງການຈັດຕັ້ງສັງຄົມອື່ນໆ ຂັ້ນແຂວງ; ມີພາລະບົດບາດໃນການຈັດຕັ້ງວຽກງານມະນຸດສະທຳປະຕິບັດຫຼັກການຊ່ວຍເຫຼືອເຊີ່ງກັນ ແລະ ກັນສ້າງສະພາບແວດລ້ອມທີ່ມີຄວາມສົມດູນ,ກົມກຽວກັນສາມັກຄີປອງດອງໃນສັງຄົມ ແລະ ມີການເຂົ້າຮ່ວມຂອງສັງຄົມ
ໃນປີ 2023 ຜ່ານມາ ອົງການກາແດງລາວແຂວງຫຼວງພະບາງ ໄດ້ເຄື່ອນໄຫວບໍລິການຮັບໃຊ້ ວຽກງານມະນຸດສະທໍາ ແກ່ສັງຄົມ ເປັນຈໍານວນຫຼວງຫຼາຍ ໃນນັ້ນ ເດັ່ນກ່ວາໝູ່ແມ່ນຂະບວນການ ຂົນຂວາຍຊອກຫາແຫຼ່ງທຶນ ແລະ ບັນເທົາທຸກແກ່ຜູ້ທີ່ໄດ້ຮັບຜົນກະທົບຈາກໄພທໍາມະຊາດ ແລະ ໄພທີ່ມະນຸດສ້າງຂຶ້ນ ໄດ້ຈໍານວນຫຼວງຫຼາຍ, ຂົນຂວາຍຈັດຫາເລືອດ ບັນລຸໄດ້ຫຼາຍກ່ວາ 5.400 ຖົງ, ຊ່ວຍເຫຼືອອຸປະຕິເຫດຕ່າງໆ ທ່ວງທັນເວລາ ແລະ ມີຄຸນນະພາບ; ເຄື່ອນໄຫວວຽກງານໂຄງການຮັກສາສຸຂະພາບຂັ້ນຕົ້ນ ແລະ ສົ່ງເສີມສຸຂະພາບແບບເຊື່ອມສານ ຊຶ່ງອົງການກາແດງແຂວງຮັບຜິດຊອບສຸຂະອະນາໄມໃນໂຮງຮຽນ ແລະ ການປ່ຽນແປງພຶດຕິກໍາຂອງນັກຮຽນຢູ່ເມືອງປາກແຊງ ແລະ ໂພນທອງ ແລະ ຍັງມີກິດຈະກໍາມະນຸດສະທໍາອື່ນໆອີກຈໍານວນຫຼວງຫຼາຍ ເປັນຕົ້ນແມ່ນການສືບທາວຫາຍາດພີ່ນ້ອງທີ່ພັດພາກຈາກກັນ, ການສ້າງອາສາສະມັກກາແດງ ແລະ ອົບຮົມວຽກງານປະຖົມພະຍາບານໃຫ້ສັງຄົມໄດ້ຢ່າງກ້ວາງຂວາງ.