ປີ 2022 ນີ້ແຂວງວຽງຈັນ ຈັດຫລາຍກິດຈະກໍາ ໂອກາດສະເຫລີມສະຫລອງປີສາມັກຄີມິດຕະພາບລາວ-ຫວຽດນາມ ຄືວັນເຊັນສົນທິສັນຍາມິດຕະພາບ ແລະ ການຮ່ວມມືຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມຄົບຮອບ 60 ປີ ລວມເຖີງ ພິທີຫວນຄືນມູນເຊື້ອການພົວພັນຮ່ວມມືແບບພິເສດຮອບດ້ານ ຂອງແຂວງວຽງຈັນ ສ ປປ ລາວ ກັບບັນດາແຂວງຂອງ ສສ ຫວຽດນາມ ໃນທ້າຍປີນີ້ໃຫ້ມີບັນຍາກາດຟົດຟື້ນ ແລະ ເປັນຂະບວນກວ້າງຂວາງໃນທົ່ວແຂວງ.
ທ່ານນາງອິ່ນຄໍາ ພັນດາລາ ຫົວໜ້າພະແນກຖະແຫລງຂ່າວ, ວັດທະນະທໍາ ແລະທ່ອງທ່ຽວແຂວງວຽງຈັນໃຫ້ສໍາພາດວ່າ: ພິທີສະເຫລີມສະຫລອງ ປີສາມັກຄີທີ່ສໍາຄັນດັ່ງກ່າວ ພະແນກ ຖວທ ແຂວງວຽງຈັນແມ່ນມີຄວາມຮັບຜິດຊອບສຳຄັນຫລາຍອັນ ເປັນຕົ້ນແມ່ນການສັງລວມເກັບກໍາຂໍ້ມູນ, ຮູບພາບ ກ່ຽວກັບການພົວພັນຮ່ວມມືຂອງແຂວງວຽງຈັນກັບບັນດາແຂວງຂອງ ສສ ຫວຽດນາມ ເພື່ອຜະລິດປື້ມປະຫວັດສາດ, ລົງເກັບກຳຂ່າວ, ບົດ ກ່ຽວກັບໝາກຜົນແຫ່ງການຮ່ວມມື ຂອງບັນດາພະແນກການ, ອົງການ, ກົມກອງພາຍໃນແຂວງວຽງຈັນ , ບັນດານັກທຸລະກິດ ຜູ້ປະກອບການທີ່ເປັນຄົນຫວຽດນາມ ທີ່ມາລົງທຶນຢູ່ແຂວງວຽງຈັນ ເພື່ອໂຄສະນາຜ່ານສື່ມວນຊົນພາຍໃນແຂວງ ແລະສູນກາງໃຫ້ສັງຄົມໄດ້ຮັບຮູ້ຢ່າງທົ່ວເຖິງ ພ້ອມນີ້ຍັງໄດ້ກະກຽມຝຶກແອບໜ່ວຍສິລະປະຂອງສູນວັດທະນະທໍາເດັກແຂວງ ເພື່ອສະແດງຮັບໃຊ້ພິທິສໍາຄັນດັ່ງກ່າວ ໃຫ້ມີບັນຍາກາດຄຶກຄື້ນ ແລະເຕັມໄປດ້ວຍຄວາມໝາຍຄວາມສໍາຄັນ.
ທ່ານນາງອິ່ນຄໍາ ພັນດາລາ ໃຫ້ຮູ້ອີກວ່າ: ສໍາລັບການພົວພັນຮ່ວມມືກັບບັນດາແຂວງ ຂອງ ສສ ຫວຽດນາມ ໃນຂົງເຂດວຽກງານຖະແຫລງຂ່າວ, ວັດທະນະທຳ ແລະ ທ່ອງທ່ຽວນັ້ນ ນັບແຕ່ແຂວງວຽງຈັນໄດ້ມີການພົວພັນຮ່ວມມືກັບບັນດາແຂວງຂອງ ສສ ຫວຽດນາມ ເປັນຕົ້ນ ແມ່ນແຂວງຮາຍເຢື່ອງ ເຊິ່ງເປັນແຂວງແຮກສ່ຽວກັບແຂວງວຽງຈັນນັ້ນ ໃນຂົງເຂດວຽກງານຖະແຫລງຂ່າວ,ວັດທະນະທຳ ແລະ ທ່ອງທ່ຽວ ແມ່ນໄດ້ມີການພົວພັນຮ່ວມມືນຳກັນຢ່າງສະນິດແໜ້ນ ແລະ ເລີກເຊີ່ງ ເປັນຕົ້ນແມ່ນໄດ້ມີການແລກປ່ຽນຄະນະຜູ້ແທນໃນການຢ້ຽມຢາມ, ຖອດຖອນບົດຮຽນ ແລະເຊັນບົດບັນທຶກການຮ່ວມມືກັນໃນແຕ່ລະປີ, ມີການຊ່ວຍເຫລືອພັດທະນາຊັບພະຍາກອນມະນຸດ, ການພັດທະນາວຽກງານດ້ານວັດທະນະທໍາ, ການຮຽນພາສາຫວຽດນາມ, ການພັດທະນາການທ່ອງທ່ຽວ ແລະການຊ່ວຍເຫລືອອຸປະກອນຮັບໃຊ້ວຽກງານສື່ມວນຊົນຈໍານວນໜຶ່ງ, ນອກຈາກນີ້ພະແນກ ຖວທ ແຂວງວຽງຈັນ ຍັງໄດ້ຮ່ວມມືກັບແຂວງອ່ຽນບ່າຍ, ແຂວງຮາຍຟອງ ແລະແຂວງເງ້ອານຂອງຫວຽດນາມຕື່ມອີກ.
