ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ເພື່ອເຮັດໃຫ້ການກະກຽມການປ່ອຍປາ ເນື່ອງໂອກາດວັນປ່ອຍປາແຫ່ງຊາດ ແລະ ວັນຄ້າຍວັນເກີດຂອງທ່ານ ປະທານສຸພານຸວົງ ວັນທີ 13 ກໍລະກົດນີ້ໃຫ້ໄດ້ຮັບຜົນສຳເລັດຕາມແຜນ ແລະ ຄາດ ໝາຍທີ່ກຳນົດໄວ້
ທ່ານ ກາວີພອນ ພຸດທະວົງ ຫົວໜ້າກົມລ້ຽງສັດ ແລະ ການປະມົງ ກະຊວງກະສິກໍາ ແລະ ປ່າໄມ້ໃຫ້ສໍາພາດວ່າ: ກົມລ້ຽງສັດ ແລະ ການປະມົງໄດ້ສົມທົບກັບນະຄອນຫຼວງວຽງຈັນ ພ້ອມດ້ວຍພາກສ່ວນກ່ຽວຂ້ອງ ໂດຍສະເພາະຄະນະພັກຂັ້ນສູນກາງ ແລະ ອົງການປົກຄອງທ້ອງຖິ່ນທົ່ວປະເທດ ກະກຽມແຜນການ ແລະ ຂະບວນການປ່ອຍປາ, ສັດນໍ້າ ແລະ ສັດປ່າ ເພື່ອຄືນຄວາມອຸດົມ ສົມບູນລົງສູ່ທໍາມະຊາດ ແລະ ແຫລ່ງນໍ້າຕ່າງໆ.
ສໍາລັບຢູ່ນະຄອນຫຼວງວຽງຈັນໄດ້ປະສານພະແນກກະສິກໍາ ແລະ ປ່າໄມ ນະຄອນຫຼວງວຽງຈັນ ກະກຽມສະຖານທີ່ປ່ອຍປາ, ພ້ອມທັງຕິດຕັ້ງປ້າຍໂຄສະນາຄໍາຂວັນຢູ່ຕາມສະຖານທີ່ຕ່າງໆ ນອກນີ້ຍັງໄດ້ອອກແຈ້ງການກ່ຽວກັບການເພີ່ມທະວີຄວາມເອົາໃຈໃສ່ຊຸກຍູ້ການຜະລິດສັດນໍ້າປະຈໍາປີ ພ້ອມທັງໄດ້ອອກແຈ້ງການກ່ຽວກັບການເຄື່ອນໄຫວການສ້າງຂະບວນການ ເນື່ອງໃນວັນປ່ອຍປາແຫ່ງຊາດ ແລະ ວັນອະນຸລັດສັດນໍ້າສັດປ່າໃນວັນທີ 13 ກໍລະກົດປີນີ້ ແນໃສ່ເຮັດໃຫ້ວັນສໍາຄັນນີ້ ມີຄວາມໝາຍ ແລະ ບັນລຸຕາມແຜນການທີ່ວາງໄວ້, ເຊຶ່ງການຈັດຕັ້ງປະຕິບັດກິດຈະກຳດັ່ງກ່າວຕາມແຜນການຄາດຄະເນແມ່ນ ໃນວັນທີ 14 ກໍລະກົດ 2023. ສຳລັບຢູ່ນະຄອນຫຼວງວຽງຈັນສະຖານທີ່ແມ່ນຈະຈັດຢູ່ ບ້ານ ທ່າສະຫວ່າງ, ເມືອງໄຊທານີ, ນະຄອນຫຼວງວຽງຈັນ, ສ່ວນປາທີ່ຈະປ່ອຍໃນປີນີ້ປະກອບມີຫລາຍຊະນິດປາ ໂດຍເນັ້ນໃສ່ຊະນິດປາພື້ນເມືອງເຊັ່ນ: ປາປາກ, ປາສ້ອຍ, ປາກົດ, ປາເໜັ້ນ, ປາຊວາຍ, ກົບ ແລະ ຊະນິດອື່ນໆ.
ທ່ານ ກາວີພອນ ພຸດທະວົງ ຫົວໜ້າກົມລ້ຽງສັດ ແລະ ການປະມົງໃຫ້ຮູ້ຕື່ມອີກວ່າ: ເພື່ອເຮັດຂະບວນການປ່ອຍປາ ໃນໂອກາດວັນອະນຸລັກສັດນໍ້າສັດປ່າປີນີ້ເປັນຂະບວນກວ້າງຂວາງ, ທາງກົມລ້ຽງສັດ ແລະ ການປະມົງຍັງໄດ້ຊຸກຍູ້ໃຫ້ບັນດາເມືອງອ້ອມຂ້າງ ໂດຍສະເພາະແມ່ນສູນ, ສະຖານີໃຫ້ຂະຫຍາຍການລ້ຽງປາ ແລະ ສັດນໍ້າທຸກຮູບແບບ, ປັບປຸງເຕັກນິກ ພ້ອມທັງເພີ່ມທະວີການຜະລິດ ແລະ ສະໜອງແນວພັນປາ ແລະ ສັດນໍ້າໃຫ້ພຽງພໍກັບຄວາມຕ້ອງການຂອງຕະຫຼາດ ກໍຄືການສະໜອງລູກປາໃນວັນປ່ອຍປາແຫ່ງຊາດປີນີ້ໃຫ້ພຽງພໍກັບຄວາມຕ້ອງການ, ພ້ອມທັງຮຽກຮ້ອງໃຫ້ທຸກພາກສ່ວນຈົ່ງປະກອບສ່ວນ ແລະ ເອົາໃຈໃສ່ໃນການພັດທະນາ, ຄຸ້ມຄອງ, ອະນຸລັກຮັກສາປາ ແລະ ສັດນ້ໍາ ໃຫ້ຫຼາຍຂຶ້ນເພື່ອ ແນໃສ່ເພີ່ມຄວາມອຸດົມສົມບູນຂອງຊີວະນາໆພັນ ກໍຄືເປັນຊັບພະຍາກອນປະມົງອັນລໍ້າຄ່າ ທີ່ເປັນມໍລະດົກທາງທໍາມະຊາດຂອງຊາດໃຫ້ສາມາດຊົມໃຊ້ແບບຍືນຍົງ ແລະ ຢູ່ຄຽງຄູ່ກັບພວກເຮົາຕະຫຼອດໄປ.%
ໂດຍ: ບຸນຍັງ ພຸດສະຫວັດ