ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ເພື່ອປະຕິບັດແຜນຍຸທະສາດ ກ່ຽວກັບວຽກງານປ່າໄມ້ ທີ່ລັດຖະບານໄດ້ວາງອອກ ທັງເປັນການສ້າງຂະບວນການຂໍ່ານັບຮັບຕ້ອນ ວັນປູກຕົ້ນໄມ້ແຫ່ງຊາດ ກໍຄື ວັນເດັກນ້ອຍສາກົນ ວັນທີ 1 ເດືອນ ມິຖຸນາ ປີ 2024 ນີ້ ໃຫ້ເປັນຂະບວນຟົດຟື້ນ, ຮັບປະກັນການເພີ່ມຂຶ້ນຂອງພື້ນທີ່ສີຂຽວໃຫ້ທໍາມະຊາດ ກໍຄື ສ້າງສິ່ງແວດລ້ອມທີ່ດີ ໃນທົ່ວແຂວງຫຼວງພະບາງ. ອົງການປົກຄອງແຂວງໄດ້ກະກຽມເກັບແກ່ນ ຫຼື ແນວພັນໄມ້ປູກ ໃຫ້ໄດ້ 3.000 ກິໂລ, ຜະລິດເບ້ຍໄມ້ໃຫ້ໄດ້ 2 ລ້ານເບ້ຍ ແລະກະກຽມພື້ນທີ່ປູກໄມ້ໃຫ້ໄດ້ຢ່າງນ້ອຍ 500 ເຮັກຕາ.
ທ່ານ ສີວອນ ວົງຄຳຈັນ ຫົວໜ້າພະແນກກະສິກໍາ ແລະ ປ່າໄມ້ ແຂວງຫຼວງພະບາງ ໄດ້ໃຫ້ສໍາພາດ ທາງໂທລະສັບຕໍ່ນັກຂ່າວວິທະຍຸແຂວງ ໃນວັນທີ 30 ພຶດສະພາ ນີ້ ວ່າ: ໃນປີນີ້ ທົ່ວແຂວງຫຼວງພະບາງ ຈະປູກຕົ້ນໄມ້ໃນເນື້ອທີ່ 500 ກວ່າເຮັກຕາ, ມີເບ້ຍໄມ້ທັງໝົດ 2 ລ້ານເບ້ຍ, ສະເພາະການເປີດຂະບວນການປູກຕົ້ນໄມ້ໃນວັນທີ 1 ມິຖຸນາ ອົງການປົກຄອງແຂວງ ຈະຈັດພິທີປູກຢູ່ບ້ານດອນກາງ ຂອບເຂດພູພືງ ພູຜາທູນ ແລະບໍລິເວນນ້ຳຕົກ ຕາດກວາງຊີ ເຊິ່ງເປັນປ່າສະຫງວນຂອງແຂວງ, ໂດຍຈະປູກໃຫ້ໄດ້ 3,3 ເຮັກຕາ ລວມມີເບ້ຍໄມ້ 4.700 ເບ້ຍ,
ໃນນັ້ນ ໄດ້ເລັ່ງໃສ່ຕົ້ນໄມ້ຮັກສາແຫຼ່ງນ້ຳ ເຊັ່ນ: ຕົ້ນສົ້ມຝາດ, ກົກທອງ, ໄມ້ເຕ່ນ ແລະອື່ນໆ, ສ່ວນບັນດາເມືອງຈະຈັດຂະບວນການປູກຕາມເງື່ອນໄຂ ລວມເນື້ອທີ່ການປູກປະມານ 155 ເຮັກຕາ, ມີເບ້ຍໄມ້ທັງໝົດ 28.100 ເບ້ຍ, ນອກຈາກປູກເປັນຂະບວນການໃນວັນທີ 1 ມິຖຸນາ ຈະມີການສືບຕໍ່ປູກຕົ້ນໄມ້ຈົນກວ່າຈະສິ້ນສຸດລະດູຝົນ ໃຫ້ບັນລຸຕາມແຜນການຄື 500 ເຮັກຕາ.
ທີ່ມາ: ອາພຸເດດ ບຸບຜາ