ປີນີ້ ມີນັກຮຽນ 5,457 ຄົນ ສອບເສັງເຂົ້າມະຫາວິທະຍາໄລແຫ່ງຊາດ.
ມະຫາວິທະຍາໄລແຫ່ງຊາດ ຈັດສອບເສັງຄັດເລືອກເອົານັກສຶກສາເຂົ້າຮຽນສົກສຶກສາ 2024-2025 ໃນວັນທີ 10 ສິງຫາ 2024, ມີນັກສຶກສາເຂົ້າຮ່ວມສອບເສັງທັງໝົດສອບເສັງຕົວຈິງ 5,457 ຄົນ.
ການສອບເສັງໃນຄັ້ງນີ້ ຈັດຂຶ້ນຢູ່ສູນດຽວ ຄື ຢູ່ວິທະຍາເຂດດົງໂດກ ມີ 140 ຫ້ອງສອບເສັງ ຕາມແຕ່ລະວິຊາດັ່ງນີ້ : ຄະນະເສດຖະສາດ ສາຍທໍາມະຊາດ 59 ຫ້ອງ, ຄະນະວິທະຍາສາດທຳມະຊາດ ສາຍສັງຄົມ 29 ຫ້ອງ, ຄະນະວິທະຍາສາດສັງຄົມ ສາຍສັງຄົມ 28 ຫ້ອງ,ຄະນະອັກສອນສາດ ສາຍສັງຄົມ 72 ຫ້ອງ, ຄະນະສະຖາປັດຕະຍະກຳສາດ ສາຍສັງຄົມ 18 ຫ້ອງ, ຄະນະວິທະຍາສາດສິ່ງແວດລ້ອມ ສາຍສັງຄົມ 24 ຫ້ອງ.
ທ່ານ ຮສ. ປອ. ເດຊານຸລາດ ແສນດວງເດດ ວ່າການແທນອະທິການບໍດີ ມະຫາວິທະຍາໄລແຫ່ງຊາດ ໄດ້ໃຫ້ຮູ້ວ່າ : ການສອບເສັງເຂົ້າຮຽນໃນມະຫາວິທະຍາໄລແຫ່ງຊາດ ແມ່ນມີຫຼາຍລະບົບ ສະເພາະສອບເສັງໃນວັນທີ 10 ສິງຫາ 2024 ແມ່ນລະບົບຮຽນ 4 – 5 ປີ ແລະ ຜູ້ທີ່ຮຽນຊັ້ນສູງ ຕາມແຜນຮັບນັກສຶກສາ ແມ່ນ 7. 685 ຄົນ ແລະ ຈະມີການສອບເສັງເພີ່ມຕື່ມອີກໃນລະບົບອື່ນ. ສໍາລັບຜົນການສອບເສັງຈະປະກາດໃນຫຼັງຈາກສອບເສັງແລ້ວ 01 ເດືອນ ຫຼັງຈາກນັ້ນກໍ່ລົງທະບຽນເຂົ້າຮຽນເປັນປົກກະຕິ.
ວ່າການແທນອະທິການບໍດີ ຍັງໄດ້ຮຽກຮ້ອງມາຍັງຜູ້ປົກຄອງນັກຮຽນ ຈົ່ງຊຸກຍູ້ໃຫ້ລູກຕົນເອງໄດ້ຮໍ່າຮຽນ ແລະ ນັກຮຽນເອງທີ່ຮຽນຈົບມັດທະຍົມຕອນປາຍແລ້ວ ຈົ່ງສະໝັກເສັງເຂົ້າຮຽນວິຊາສະເພາະ ກ່ອນຈະໄປປະກອບອາຊີບ ບໍ່ວ່າຈະຮຽນພາກປົກກະຕິ ຫຼື ພາກພິເສດ ໂດຍການຮຽນ ແລະ ເຮັດປະກອບອາຊີບໄປນຳກໍ່ໄດ້.
