ປີນີ້ ລາວເຮົາ ມີຜູ້ເສຍຊີວິດຈາກອັກຄີໄພແລ້ວ 6 ຄົນ.
ນັບແຕ່ຕົ້ນເດືອນມັງກອນຫາເດືອນພຶດສະພາ ທົ່ວປະເທດເກີດອັກຄີໄພທັງຫມົດ 96 ຄັ້ງ, ມູນຄ່າຄວາມເສຍຫາຍ 38 ຕື້ກວ່າກີບ, ໃນນີ້ມີຜູ້ເສຍຊີວິດທັງຫມົດ 6 ຄົນ, ບາດເຈັບ 2 ຄົນ, ອາຄານທີ່ຢູ່ອາໄສເສຍຫາຍ 62 ຫລັງ, ວັດ 2 ຫລັງ, ໂຮງເລື່ອຍ 2 ຫລັງ,ຫໍຄອຍເດີ່ນບິນເກົ່າ 1 ຫລັງ, ທີ່ພັກກໍາມະກອນ 1 ຫລັງແລະອື່ນໆ.
ພັນເອກ ວິລະພອນ ວົງຄຳມູນຕີ ຫົວຫນ້າກົມຕຳຫລວດສະກັດກັ້ນ ແລະ ຕ້ານອັກຄີໄພ ກົມໃຫຍ່ຕຳຫລວດ ກະຊວງປ້ອງກັນຄວາມສະຫງົບໃຫ້ສຳພາດວ່າ: ອັກຄີໄພເກີດຂຶ້ນສ່ວນໃຫຍ່ແມ່ນມາຈາກສາເຫດໄຟຟ້າລັດວົງຈອນ,ເລິນເລີ້ຂາດສະຕິໃນການຊົມໃຊ້ຟື້ນໄຟ,ລະບົບເຕັກນິກຂັດຂ້ອງແລະອື່ນໆ. ໄລຍະຜ່ານມາອັກຄີໄພທີ່ເກີດຂຶ້ນສ້າງຄວາມເສຍຫາຍຫລາຍກວ່າຫມູ່ແມ່ນເຫດການໄຟໄຫມ້ສາງເກັບມ້ຽນເຄື່ອງຂອງຄົນຈີນເຊິ່ງເປັນສະຖານທີ່ສວນຫລິ້ນເຄື່ອງຫລິ້ນເກົ່າຢູ່ເຂດບ້ານຮ່ອງຄ້າ ເມືອງຈັນທະບູລີ ນະຄອນຫລວງວຽງຈັນ ເສຍຫາຍຫລາຍກວ່າ 10ລ້ານກວ່າຢວນສະກຸນເງິນຈີນ ແລ ະເຫດການໄຟໄຫມ້ລາມປ່າຈາກປະຊາຊົນຈູດໄຮ່ເພື່ອທຳການຜະລິດເຮັດໃຫ້ມີຜູ້ເສຍຊີວິດ 2 ຄົນ ຢູ່ເມືອງປາກແບງ ແຂວງອຸດົມໄຊ ແລະ ກໍລະນີອື່ນໆ.
ພັນເອກ ວິລະພອນ ວົງຄຳມູນຕີ ໃຫ້ຮູ້ຕື່ມວ່າ: ນັບແຕ່ຕົ້ນເດືອນມັງກອນຫາເດືອນພຶດສະພານີ້, ສະພາບອັກຄີໄພເກີດຂຶ້ນເຫັນວ່າມີທ່າອ່ຽງຫລຸດລົງຖ້າສົມທຽບໃນໄລຍະດຽວກັນຂອງປີຜ່ານມາເຖິງ 27 ຄັ້ງ ຫລື ປະມານ 21% ສາເຫດຫລຸດລົງເນື່ອງຈາກມີລາຍງານສະພາບເກີດອັກຄີໄພຫນ້ອຍລົງໂດຍສະເພາະໄຟໄຫມ້ລາມປ່າ ເຊິ່ງຄະນະພັກ,ຄະນະນຳກົມຕຳຫລວດສະກັດກັ້ນແລະຕ້ານອັັກຄີໄພ ກົມໃຫຍ່ຕຳຫລວດຈະໄດ້ສືບຕໍ່ເຝົ້າລະວັງແລະກຽມພ້ອມປະຈຳ ການຄອຍເຫດຕະຫລອດ 24ຊົ່ວໂມງ ເພື່ອຮັບໃຊ້ໃຫ້ແກ່ສັງຄົມກໍ່ຄືປະຊາຊົນໃນການສະກັດກັ້ນບັນຫາອັກຄີໄພທີ່ເກີດຂຶ້ນໃນປະຈຸບັນແລະຕໍ່ຫນ້າ.