ເນື່ອງໃນໂອກາດວັນປ່ອຍປາ ແລະ ສັດນໍ້າ ແຫ່ງຊາດ 13 ກໍລະກົດ 2024 ໄດ້ໜູນວຽນມາບັນຈົບຄົບຮອບອີກວາລະໜຶ່ງ ໃນຕອນເຊົ້າຂອງວັນທີ 12 ກໍລະກົດ 2024 ນີ້ ເມືອງໄຊຍະບູລີ ໄດ້ຈັດພິທີປ່ອຍປາຈໍານວນ 2 ແສນກວ່າໂຕ ຄືນສູ່ແຫຼ່ງນໍ້າທໍາມະຊາດ ທີ່ຜາມໄຊບ້ານປົ່ງ ໂດຍໃຫ້ກຽດເຂົ້າຮ່ວມພິທີ ມີທ່ານ ດວງຕາ ໄຊວຸດ ຮອງເລຂາພັກແຂວງໄຊຍະບູລີ, ທ່ານ ເສນ ພັນລັກ ເລຂາພັກເມືອງ ວ່າການເຈົ້າເມືອງໄຊຍະບູລີ, ຫົວໜ້າຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງເມືອງໄຊຍະບູລີ, ມີການນຳແຂວງ, ເມືອງ, ນັກທຸລະກິດ, ອົງການການປົກຄອງບ້ານ ເທດສະບານເມືອງໄຊຍະບູລີເຂົ້າຮ່ວມ.
ທ່ານ ເສນ ພັນລັກ ກ່າວວ່າ: ເພື່ອເປັນການຈັດຕັ້ງຜັນຂະຫຍາຍກົດໝາຍ ວ່າດ້ວຍສັດນ້ຳແລະ ການປະມົງ (ສະບັບປັບປຸງ) ແລະ ບັນດານິຕິກຳຕ່າງໆທີ່ກ່ຽວຂ້ອງ, ໃນໄລຍະທີ່ຜ່ານມາການນຳຂັ້ນຕ່າງໆກໍໄດ້ເອົາໃຈໃສ່ນໍາພາ ແລະ ຊີ້ນໍາຕໍ່ກັບການປົກປັກຮັກສາ, ການອະນຸລັກປ່າໄມ້, ສັດນ້ຳແລະ ສັດປ່າ ທັງນີ້ກໍເພື່ອແນໃສ່ເຮັດໃຫ້ຊັບພະຍາກອນປ່າໄມ້, ສັດນ້ຳ ແລະ ສັດປ່າ ໄດ້ຮັບການຄຸ້ມຄອງ ແລະ ເພີ່ມຄວາມອຸດົມສົມບູນໃຫ້ແກ່ທໍາມະຊາດ, ມີການຄຸ້ມຄອງນຳໃຊ້ແບບຍືນຍົງຕາມນະໂຍບາຍວາງອອກ ໂດຍບໍ່ມີວັນບົກແຫ້ງ.
ໃນປີ 2023 ຜ່ານມາ, ທົ່ວແຂວງໄຊຍະບູລີ ສາມາດປ່ອຍປາໄດ້ທັງໝົດ 43.942.600 ໂຕ, ສາມາດຜະລິດລູກປາໄດ້ຈຳນວນທັງໝົດ 17.478.000ໂຕ ແລະ ໃນປີ 2024 ມີແຜນສູ້ຊົນປ່ອຍປາໃຫ້ໄດ້ 53.193.000 ໂຕ. ໃນນີ້, ໄດ້ປ່ອຍກ່ອນວັນທີ 13 ກໍລະກົດ 2024 ຈໍານວນ 9.375.175 ໂຕ, ຈະປ່ອຍໃນວັນທີ 13 ກໍລະກົດ 2024 ນີ້ຈຳນວນ 781.000 ໂຕ, ມີ 29 ຈຸດໃນທົ່ວແຂວງ ແລະ ຈະປ່ອຍຫຼັງວັນທີ 13 ກໍລະກົດ 2024 ຈຳນວນ 43.036.825 ໂຕ.
ສະເພາະເມືອງໄຊຍະບູລີ ຂອງພວກເຮົາ ແມ່ນມີແຜນທີ່ຈະປ່ອຍປາທັງໝົດ ໃນຈຳນວນ 8.500.000 ໂຕ. ໃນນີ້ໄດ້ປ່ອຍລູກປາກ່ອນວັນທີ 13 ກໍລະກົດ 2024 ແລ້ວຈຳນວນ 1.800.000 ໂຕ, ປ່ອຍໃນວັນທີ 12 ກໍລະກົດ ປີ 2024 ເປັນຈຳນວນ 200.000 ໂຕ, ມີ 3 ຈຸດປ່ອຍຄື: ຈຸດທ່າບ້ານປົ່ງ, ຈຸດອ່າງຫ້ວຍແຄ່ນ ແລະ ຈຸດອ່າງນໍ້າຕຽນ ແລະ ໄດ້ມີແຜນສືບຕໍ່ທີ່ຈະປ່ອຍພາຍຫຼັງວັນທີ 13 ກໍລະກົດ 2024 ນີ້ມີຈຳນວນ 6.500.000 ໂຕ. ສະເພາະປາທີ່ປ່ອຍໃນປີນີ້ ແມ່ນປະກອບມີ: ປານິນ, ປາໄນ, ປາປາກ, ປາມາລີການ, ປາເກັດແລບ ແລະ ປາອິນເດຍ.
ທ່ານ ເສນ ພັນລັກ ຍັງຮຽກຮ້ອງມາຍັງຄະນະພັກ, ອົງການປົກຄອງໃນທຸກຂັ້ນ, ພະນັກງານ, ທະຫານ, ຕຳຫຼວດ, ນັກຮຽນຮູ້, ນັກສຶກສາ, ພໍ່ຄ້າຊາວຂາຍ, ນັກທຸລະກິດຕະຫຼອດຮອດປະຊາຊົນບັນດາເຜົ່າ ຈົ່ງຮ່ວມແຮງຮ່ວມໃຈກັນປ່ອຍປາລົງສູ່ໜອງນໍ້າ, ແຫຼ່ງນ້ຳທຳມະຊາດເພື່ອເປັນການປະກອບສ່ວນ ແລະ ຄືນຄວາມອຸດົມສົມບູນໃຫ້ກັບທໍາມະຊາດ ແລະ ພ້ອມກັນອະນຸລັກ, ປົກປັກຮັກສາສັດນ້ຳ-ສັດປ່າ ເຮັດໃຫ້ຊັບພະຍາກອນທຳມະຊາດ, ຊີວະນາໆພັນອັນລ້ຳຄ່າດັ່ງກ່າວ ໄດ້ຢູ່ຄຽງຄູ່ກັບພວກເຮົານີ້ຕະຫຼອດໄປ ໃນອະນາຄົດຂ້າງໜ້າ ໃຫ້ມີຄວາມໝັ້ນຄົງ ແລະ ຍືນນານ ດັ່ງຄໍາຂວັນທີ່ວ່າ: ຊົມເຊີຍວັນປ່ອຍປາ ແລະ ສັດນໍ້າແຫ່ງຊາດ ວັນທີ 13 ກໍລະກົດ ຈົ່ງພ້ອມກັນປ່ອຍປາ ແລະ ສັດນໍ້າ ຄືນສູ່ທໍາມະຊາດໃຫ້ມີຄວາມອຸດົມສົມບູນຕະຫຼອດໄປ ການປົກປັກຮັກສາປາ ແລະ ສັດນໍ້າ ແມ່ນພັນທະຂອງປວງຊົນທັງຊາດ.
ຂ່າວ-ພາບ: ລັດດາວອນ ແກ້ວໄພທູນ
