ໃນໂອກາດທີ່ ຄະນະສື່ມວນຊົນຈາກລາວ ແລະ ຈີນ ເຂົ້າຮ່ວມກິດຈະກຳແລກປ່ຽນວັດທະນະທຳ ຂອງປະຊາຊົນຢູ່ຕາມຊາຍແດນ ລາວ-ຈີນ ໃນທ້າຍ ເດືອນມິຖຸນາ 2024 ໄດ້ໄປຢ້ຽມຢາມ ໂຮງໝໍປະຊາຊົນ ເມືອງຫລ້າ ກິ່ງແຂວງສິບສອງພັນນາ ແຂວງຢຸນນານ ສປ ຈີນ ເປັນໂຮງໝໍໃຫຍ່ທີ່ສຸດໃນ ເມືອງຫລ້າ ທີ່ໃຫ້ບໍລິການປິ່ນປົວຄົນເຈັບ ທີ່ດຳລົງຊີວິດຢູ່ຕາມຊາຍແດນ ລາວ-ຈີນ.
ທ່ານ ນາງ ຈ່າງ ຊູຢ້ຽນ (Zhang Xueyan) ຜູ້ອໍານວຍການ ໂຮງໝໍປະຊາຊົນ ເມືອງຫລ້າ ກິ່ງແຂວງ ສິບສອງພັນນາ ໃຫ້ຮູ້ວ່າ: ໂຮງໝໍແຫ່ງນີ້ ເປີດໃຫ້ບໍລິການສັງຄົມ ມາແຕ່ວັນທີ 14 ພຶດສະພາ 2024, ເປັນໂຮງຫມໍທີ່ສ້າງຂື້ນແທນ ໂຮງຫມໍຫລັງເກົ່າ ດ້ວຍງົບປະມານຂອງ ລັດຖະບານຈີນ ມູນຄ່າ 510 ລ້ານຢວນ, ມີເນື້ອທີ່ 100 ກວ່າເຮັກຕາ, ເປັນ ອາຄານ ທັນສະໄໝ ຄົບວົງຈອນ, ສາມາດຮອງຮັບຄົນເຈັບໄດ້ເກືອບ 600 ຕຽງ; ປະກອບມີແພດໝໍ 300 ກວ່າຄົນ, ພະຍາບານ 700 ກວ່າຄົນ. ນອກຈາກພະນັກງານ-ແພດ ທີ່ເປັນຄົນຈີນແລ້ວ ຍັງມີ ຄົນລາວ 20 ຄົນ ກໍາລັງເຮັດວຽກຢູ່ ສູນອາຫານ ຂອງ ໂຮງຫມໍແຫ່ງນີ້ ຊຶ່ງໄດ້ຮັບການອໍານວຍຄວາມສະດວກເປັນຢ່າງດີ ທັງທີ່ພັກ, ອາຫານ ແລະ ສະຫວັດດີການຕ່າງໆ.
ທ່ານ ຜູ້ອໍານວຍການໂຮງໝໍ ໃຫ້ຮູ້ອີກວ່າ: ຕາມສະຖິຕິ ປີ 2022 ມີຜູ້ເຂົ້າມາຮັບການປິ່ນປົວ 1.000 ກວ່າເທື່ອຄົນ, ນອນໂຮງໝໍ 160 ເທື່ອຄົນ; ປີ 2023 ມີຜູ້ເຂົ້າມາຮັບການປິ່ນປົວ ຫລາຍກ່ວາ 3.000 ເທື່ອຄົນ, ນອນໂຮງໝໍ ເກືອບ 400 ເທື່ອຄົນ , ໃນລະຫວ່າງ ເດືອນມັງກອນ – ເດືອນພຶດສະພາ ປີ 2024 ມີຜູ້ເຂົ້າມາຮັບການປິ່ນປົວ ຫລາຍກ່ວາ 2.000 ເທື່ອຄົນ, ນອນໂຮງໝໍ ຫລາຍກ່ວາ 300 ເທື່ອຄົນ. ນອກຈາກໃຫ້ບໍລິການ ຄົນຈີນແລ້ວ, ໂຮງໝໍແຫ່ງນີ້ ຍັງໃຫ້ບໍລິການປິ່ນປົວ ຄົນລາວຕື່ມອີກ ສະເພາະປີ 2023 ມີຄົນລາວເຂົ້າມາປິ່ນປົວ ຫລາຍກ່ວາ 3.000 ເທື່ອຄົນ. ຍ້ອນການເພີ່ມຂຶ້ນຂອງປະຊາກອນ ສະນັ້ນ ລັດຖະບານຈີນ ໄດ້ມີແຜນ ຈະຂະຫຍາຍໂຮງໝໍ ແຫ່ງນີ້ຕື່ມອີກ ຊຶ່ງຈະກໍ່ສ້າງຢູ່ໃກ້ກັນ ໃນເນື້ອທີ່ ຫລາຍກ່ວາ 70.000ຕາແມັດ ເພື່ອໃຫ້ສາມາດຮອງຮັບຄົນເຈັບ ເພີ່ມຂຶ້ນ. ຄວບຄູ່ກັບການເຮັດໜ້າທີ່ປິ່ນປົວ ແລະ ບໍລິການດ້ານສຸຂະພາບໃຫ້ແກ່ປະຊາຊົນ ທີ່ຢູ່ຕາມຊາຍແດນ ແລະ ບໍລິເວນໃກ້ຄຽງແລ້ວ, ໂຮງໝໍແຫ່ງນີ້ຍັງໄດ້ ມີການພົວພັນຮ່ວມມື ກັບ ໂຮງໝໍ ແຂວງຫລວງນໍ້າທາ ແລະ ໂຮງໝໍແຂວງຜົ້ງສາລີ ໂດຍຜ່ານການສໍາມະນາແລກປ່ຽນຄວາມຮູ້, ບົດຮຽນ ແລະ ປະສົບການຕາມໂຄງການຂໍ້ລິເລີ່ມ ໜຶ່ງແລວໜຶ່ງເສັ້ນທາງ ເພື່ອຮ່ວມມືຊ່ວຍເຫລືອເຊິ່ງກັນ ແລະກັນ ໂດຍສະເພາະທາງດ້ານວິຊາການ ແລະອຸປະກອນການແພດ.
